WUNGVA̱-WUNGVĀ 18 - Kathara Bible (BSI)

Micah eina Danbing

¹ Atam chitharan Israelli awunga maleisāmana. Kala chitharan Dannaobingna Israel yurwui shimlui khangayar chili ashi yar masamphangthuda athumwui pamkhavai phāzatsai.

² Chiwui vang shang katonga Zorah kala Esta-olwui zangda kapingpinga mi phangā kapangkhuilaga ngathumda lam vāra̱yang khavai chihoi, kala athumli hithāda hānga, “Lam chi mathāda ayangkhuilu.” Kala athumna Ephraim kaphungramli vāda Micahwui shimli azanga.

³ Athumna Micahwui shimli leilakha Levipawui akhon chi machuthaida ali ngareivāda ngahāna, “Nali khipāna hili thānrakhala? Na apam hili khi ot sali?”

⁴ Kala ana athumli hānga, “Micahna ili hithāda khangarān samida ili talop milaga awui pāngmon phāsang kahaina.”

⁵ Kala athumna ali hānga, “Ithumna kapona, kaja ithumna sāzatta khalei hi ungshungraka maungshungra kaji Vareli khangahānmilu.”

⁶ Chieina pāngmon china hānga, “Chingri eina zatulu, nathumna kazazat pamli Prohona yangmida lei.”

⁷ Chieina athum phangā chi zatlaga Laishli vāshunga, kala chili khaleibing, va̱rihap ningkakashakla malei kala okathuiwui shong khavāt maleima, lanla kachungkha lei, kala Sidonnaobingwui eina katāvali khaleiwui vang otsakla mangarumana.

⁸ Kala athumna Zorahli kala Eshta-olli latungda achinā ngarāli samkaphang tharan, kathākhala? da ngahāna.

⁹ Athumna ngahānkai, “Ngakarthuilu, kala ithum vāda vāngararusa, kaja ithumna ngalei chi theihaira, ngalei chi tumlaka. Chieina nathum khikha masāmarala? Mahuinganaoasa, vālaga ngalei chi akhui khavai sāsa.

¹⁰ Nathumna khavā tharan, athuma yansāngsa̱ eina leisara. Lamla mashālaka, mha, okathuili khalei ot saikora mavatlak kaja apam chi Varena nathumwui pāngli mihaira.”

¹¹ Zorah kala Eshta-olwui Dan shangna raisāri shaksālaga mi shātharuk zatphokhaowa,

¹² kala athumna Judahwui alungli khalei Kiriath-jerimli rairum asai. Chiwui vang apam chili Mahaneh-dan hokahaina, aja rāshungda Kiriath-jerimwui zingtunshong lei.

¹³ Kala chiwui eina athumna Ephraimwui kaphungramli vāda Micahwui shimli azanga.

¹⁴ Chieina rida Laishli ngathumda akhayanga athum phangā china achinābingli hānga, “Nathum shim hili ephod, teraphim, chankakhui mima, heikakhui meoma̱ khalei chi theila? Chieina khi saakha phārakhala kaji machuklu?”

¹⁵ Chieina athumna Micahwui shimli kapama Levipa chili vāda, kathamameirakhala kaji angahānyanga.

¹⁶ Chitharan Danwui mibingna raisāri shaksāda athumwui zeighai-ngahā singda athum mi shātharuk china ngavei zangkhavaili nganinga;

¹⁷ kala pāngmon china raimi shātharukli ngasoda ngaveipamli leilakha, rida ara̱khayanga athum phangā china alungli zanglaga ephod, teraphim, chankakhui mima, heikakhui meoma̱ chi zangkhui.

¹⁸ Kala athumna Micahwui shimli ephod, yekkakhui mima, heikakhui meoma̱ chi zangkakhui tharan pāngmon china, “Nathum khi kasākhala?” da ngahāna.

¹⁹ Kala athumna ali hānga, “Nakhamorli pāng kafada kasaikha pamlu; ithum ngasothuiusa, kala ithumwui avāva̱ sāda pāngmon sāthalu. Mi akhawui shimli pāngmon kasā phameika, Israel shang kala shimkhur katongawui pāngmon kasā phameikhala?”

²⁰ Chieina pāngmon chiwui ningli ringphāhaoda ana ephod, teraphim, chankakhui mima, heikakhui meoma̱ chi khuiphungda athumli shurthuihaowa.

²¹ Chieina athumna athumwui naongarā, sha̱kei, otbingli rida zatngasaklaga athumna kachuiphungda thuihaowa.

²² Athumna Micahwui shim eina katāva̱ thuikahai eina, awui khongnainaobingli hokhuilaga Dannaobingli kharomvai.

²³ Kala athumna Dannaobingli akhavao eina athumna ngareiungda Micahli hānga, “Khi kachot leihaoda mi hiyākha thānkharākhala?”

²⁴ Ana hānga, “Nathumna ina sākakhui varebing kala pāngmon khuithuihaira, ara iwuili khi leilikhala? Laga nathumna ili ‘Khi kachot leihaokhala’ kajila?”

²⁵ Chieina Dannaobingna ali hānga, “Nakhon chi ithumwui alungli mashā ngasakalu, malungvātkazar mi zangsāda nali saza̱paishina, kala na eina nawui shimkhurwui manglāla shimānpaishina.”

²⁶ Chi hāngphunglaga Dannaobing chi athumwui apongshong thuihaowa, kala Micahna athumli mayuimara kaja theida shimli latunghaowa.

²⁷ Kala Micahna sākakhui otbing eina awui pāngmonli khuiphungda athumna Laishli vāshunga, chiwui mibing vari eina kala yansāngsa̱ eina pamsāda athumna raighai eina asathatserhailaga keinungla mei thottamihaowa.

²⁸ Kala Sidonwui mibingla tanāhaida marākanrarthuwa, kala khangatei khipālikha khangashik maleisāthuwa. Hi Beth-rehobwui tampākli kashokna. Kala athumna keinung chi sakāluishitta chili somhaowa.

²⁹ Kala Israelli kapharā athumwui awova̱ Danwui ming khuida keinung chili Dan hohaowa; kha keinung chi khareli Laish hosai.

³⁰ Kala Dannaobingna semkakhui meoma̱ chi athumwui vare sāda hailaga Moseswui nao Gershomna kapharā Jonathan kala awui naomayara ngalei chili raopamli matukvāranglakha eina tangda Dan shangwui pāngmon sāngasaka.

³¹ Varewui shim Shilohli leilakha eina tangda Micahna semkakhui meoma̱ chi athumna haisachinga.