WUNGVA̱-WUNGVĀ 13 - Kathara Bible (BSI)

Samson Kapharā

¹ Kala Israelnaobingna Prohowui mangāli makhayā otmāng saluida Prohona athumli Philistinenaobingwui pāngli kum hangmati horsangmihaowa.

² Kala Zorahli Dan shangwui mi akha leisai, awui ming Manoah hoi; apreiva̱ nao shumhaokada nao maleimana.

³ Kala Prohowui kazingrao china preiva̱ chili rāchitheida hānga, “Yanglu, na nao shumhaida naongarā maleimana; kha nana naoda mayarnao akha pharākhuira.

⁴ Chiwui vang eina ningngasharlu, drakhāra̱ranu, zamsheiranu, mamangalu, kala makathar mashai-mashakalu.

⁵ Kaja yanglu, nana nao vaida mayarnao akha pharāra. Kuisikhai akuitungli maparpaimara, kaja kapharāwui eina thuida nao hi Varewui mangāli Nazirite akha ngasāra; kala Philistinenaobingwui pāng eina ana Israelli kankashok ot sāphokra.”

⁶ Chieina preiva̱̱ china agaharali unghānga, “Varewui mi akha ili rāchitheiya; awui azak Varewui kazingrao thai, ngacheekhailaka. A kachiwui eina rākhala da ina mangahānmana, kala ana awui ming mahāngmana.

⁷ Kha ana ili, yanglu, na nao vaida mayarnao akha pharāra; chiwui vang drakhāra̱ranu, zamsheiranu, mamangalu, makathar mashai-mashakalu, kaja kapharā eina thuilaga thithang eina tangda naomayara chi Varewui mangāli Naziritena” da hānga.

⁸ Chieina Manoahna Proholi ngakaoda hānga, “O, Proho, nana chihokharā Varewui mi chili chihorāmiluida, nao hi kapharā tharan kathāda sāmameira kaji kharātamchithei ngasaklu.”

⁹ Kala Varena Manoahwui tui khuisangmida, Varewui kazingrao chi apreiva̱na luili leilakha rārāsālui; kha atam chili agahara Manoah maleisāmana.

¹⁰ Kala preiva̱ china katotsisi yongunglaga agaharali “Yanglu, achonthang ili rākahānga mi chi rāhaira” da hānga.

¹¹ Kala Manoahna ngakarthuida apreiva̱li shurvada mipa chili hānga, “Preiva̱ hili rākahānga chi nala?” Ana, “Ina” da ngahānkai.

¹² Kala Manoahna hānga, “Nana kahāng chi ungshungakha, nao hiwui acham-aram kathārakhala, kala ana khi sāmameira̱khala?”

¹³ Kala Prohowui kazingrao china Manoahli hānga, “Ina preiva̱li hāngkahai saikora chi a ning ngasharlak eina sāranu.

¹⁴ Drakhārong eina kashok akhala mashairanu, drakhāra̱ lah zamsheila mamangranu, makathar otla mashairanu; ina kaso kahai saikora chi ana mayontitranu.”

¹⁵ Manoahna Prohowui kazingrao chili hānga, “Lumashanmida kasha̱kha khangaraimisālu, nawui vang yaonao akha taithatmiga.”

¹⁶ Kala Prohowui kazingrao china Manoahli hānga, “Nana ili ngarailu jiakha, ina nawui kashakazā mazāmara; kha nana rikkatā kachigat ngarānhaiakha Proholi chigatlu.” (Kaja a Prohowui kazingraona kaji Manoah matheisāmana).

¹⁷ Kala Manoahna Prohowui kazingrao chili hānga, “Nali khipa hokhala, kaja nawui kahāng hi ungshungthang nali khayākashi miga.”

¹⁸ Kala Prohowui kazingrao china ali hānga, “Hi matakhak kahai otna da theilaga, khisāda nana iwui ming ngathingkhala?”

¹⁹ Chieina Manoahna yaonao eina tharāzātchigat chi khuilaga lungguitungli matakhak kahai ot kasā Proholi chigata.

²⁰ Kala hanphut chiwui meikhut kazingramshong kakā eina Prohowui kazingrao chi meikhutli ngasoda kāhaowa, chi theilaga Manoah kala apreiva̱ ngaleili kui mashunzanga.

²¹ Prohowui rao chi Manoah eina apreiva̱li machitheiluithuwa. Chieina Manoahna a Prohowui kazingraonada theikhui.

²² Kala Monoahna apreiva̱li hānga, “Ini mashoila thilakra, kaja inina Vareli theihaira.”

²³ Kha apreiva̱na ali hānga, “Prohona inili thikhavai sasi kaja ana inina pāng eina rikkatā kachigat, kala tharāzāt kachigat chi makhuimimara, lah hikathā ot saikora hi machitheimara, lah hithāda inili mahāngmathinmara.”

²⁴ Kala apreiva̱ china mayarnao akha pharākhuida awui ming Samson hoi; kala nao china rarmamānda Prohona ali somi,

²⁵ Kala Zorah eina Eshta-ol ngachaili Mahaneh-dan kaho apam chili leilakha Prohowui manglāna ning thuikhamathuk ngasakphokhaowa.