WUNGVA̱-WUNGVĀ 12 - Kathara Bible (BSI)

Jeptha eina Ephraim

¹ Ephraimwui mibingli rai sākhavai kazipkhuilaga athumna Zaphon kānda vai, kala Jepthali hānga, “Ammonnaobingli ngarar khavai kānkhavā tharan khisāda ithumli mahothukhala? Nathumwui shim nathum zangda mei sa̱tāra.”

² Kala Jepthana athumli hānga, “Ithumna Ammonnaobingli shakchangda ngararhaira, ina nathumli kaho tharan, nathumna ithumli athumwui pangwui eina makanmimana.

³ Kala nathumna makanmimara kaji ina theilaga, ina imanglā ipāngli sanglaga Ammonnaobingwui lamli akhangararna, kala Prohona athumli ithumwui pāngli horsangmi; laga aja ithumli nathumna ngarar khavai kharā hi khiwui kakhalatkhala?”

⁴ Chiwui thili Jepthana Gileadwui mi saikorali kazipkhuida Ephraimli ngarara, kala Gileadwui mibingna Ephraimwui mibingli sāthathaowa; khikhalajila, “Nathum Ephraimwui kala Manassehwui alungli yāmkazata mina” da athumli hānga.

⁵ Kala Ephraimnaobing mayāmshok khavai Gileadnaobingna Jordan raipan chi ngapaikhui. Kala Ephraimwui yāmkazatabingna, “I chishong kauka” da kapo tharan, Gileadnaobingna, “Ephraimnaola?” da ngahāna. Ana “Maningmana” da ngahānkākha,

⁶ chithakha “Shibbolethnaona” da hānglu, kala ana male mangatarla “Sibbolethnaona” da hāngakha, athumna tukkhuilaga Jordan kānkhavaili shaothata. Chithāda Ephraimnaobing thing hangmatida khani chili thisanga.

⁷ Jephthana Israelli kum tharuk mungsai, Gileadwui Jeptha thihaida awui keinung Gileadli chifahaowa.

Ibzan, Elon, kala Abdon

⁸ Awui thili Bethlehemwui Ibzanna Israelli mungsai.

⁹ Awui naomayara thumrā lei; kala naongalāva̱ thumrā khalei chi shang khangateili fachithotsera, kala naomayarabingli khangatei ayarwui ngalā thumrā khuisangmi. Ana Israelli kum shini mungsai.

¹⁰ Ibzan thihaida Bethlehemli chifahaowa.

¹¹ Awui thili Zebulunwui Elonna Israelli kum tharā mungsai.

¹² A thihaida Zebulun ngalei Aijalon kaho apam chili chifahaowa.

¹³ Awui thili Hillelwui naomayara Pirathonwui Abdonna Israelli mungsai.

¹⁴ Anaomayara hangmati, kala ara̱ngarā thumra, da athum hangshinina gadhā tongsai. Ana Israelli kum chishat munga.

¹⁵ Chieina Pirathonpa Hillelwui naomayara Abdon thihaida Amalek kaphungramli khalei Ephraimwui apam Pirithonli chifahaowa.