WUNGVA̱-WUNGVĀ 11 - Kathara Bible (BSI)

Jeptha

¹ Chitharan Jeptha hoda Gileadnaobingwui rai kapinga mi akha leisai, kha a khayora akhawui naomayara sāsai. Gilead Jepthawui avāva̱na.

² Kala Gilead preiva̱la mayarnao kachungkha lei, kala athum kharar eina Jepthali, “Nava ishāvāwui shimlui masamphangmara, kaja na sha̱nao khangateiwui naona” da ali kashama.

³ Chieina Jephthana achinā ngarāwui eina yāmda Tob ngaleili apāna, kala makānkhanā mibingna ali ngasoda ngathi rai sāzata.

⁴ Atam khaleilaga Ammonnaobingna Israelli rai ngarara.

⁵ Chiwui vang Gileadwui khararnaobingna Tobli vāda Jepthali houng khavai vai,

⁶ kala athumna Jepthali hānga, “Ammonnaobingli ngarar khavai nana ithumwui akhava ungsālu.”

⁷ Kha Jepthana Gileadwui khararnaobingli hānga, “Nathumna ili yangkharingda ishāvāwui shim eina kasham kahai maningmala? Ara kakhanang atamli khisāda ili rahokhala?”

⁸ Kala athumna Jepthali hānga, “Chiwui vang ara ithumna nali phākharāna, ithumli nana thānda Ammonnaobingli ngararda Gileadwui mi saikorawuitungli nana kathāna sālu.”

⁹ Jepthana Gileadwui khararnaobingli hānga, “Ina shimli ungluishitta nathumli ngasoda Ammonnaobingli khangarar tharan Prohona athumli iwui pāngli sangmiakha I nathumwui akhavā sāra.”

¹⁰ Athumna Jepthali hānga, “Prohona ithumwui ngachaili shākhina; ithumna kachangkhat eina nana kahāng chi sāra.”

¹¹ Chieina Jepthana athumli ngasoungda athum saikorawui kathāna sāhaowa; kala Jepthana hāngkhangai tui saikora Mizpahli leilakha Prohowui mangāli hāngsera.

¹² Chieina Jepthana Ammonnaobingwui awungali paome chihovāda hānga, “Ina khi sāhaoda iwui ngalei khuikhavai rākhangararkhala?”

¹³ Kala Ammon awungana Jepthawui paomebingli ngahānkāda hānga, “Israelwui mibingna Egyptwui eina kashok tharan iwui lam ngapaithuihaowa, Arnon eina thuilaga Jabbok, kala Jordan vāshungda khuithui kahaina; chiwui vang eina ara chingri eina hanmihaolu.”

¹⁴ Kala Jepthana paomebing chihoda Ammonwui awungali ahānglui ngasaka,

¹⁵ “Jepthana hithāda hānga: Israelwui mibing Moabwui lam lah Ammonwui lamla makhuilakmana,

¹⁶ kha Israelna Egyptwui eina kashok tharan, lamhāngwui eina Red Seashong vālaga Kadeshli kashokna.

¹⁷ Atam chili Israelna Edom awungali paomebing chihoda ‘Ithum nawui ngalei eina kānkhuihaoga,’ da hānga; kha Edom awungana mashāmithuwa. Kala Moabwui awungalila chihovai, kha anala mamayāmithuwa. Chiwui vang eina Israelna Kadeshli pama.

¹⁸ Chiwui thili athumna lamhāngshong eina Edom ngalei kuikhui, Moab ngaleila kuikhuida Moabwui zingshoshong ashoka; kala Arnonwui lākhavāk rāmrah sāda vāpama; kha athumna Moab ngaleili mazatvāmana, kaja Arnonna Moab ngaleiwui tharina.

¹⁹ Chiwui thili Israelna Shihon Amorwui awunga, kaja Heshbonwui awungali paomebing chihoda, ‘Ithumli nawui ngalei hieina ithumwui ngaleili ungkhavai kakān ngasakmilu da ithumna kapona’ da hānga.

²⁰ Kha Sihonna awui thari Israelli kānngasakki kaji ningmaonghaida, awui raimi kazipkhuida Jahazli rairum sālaga Israelli rai sai.

²¹ Kha Proho Israelwui Varena Sihon kala awui mibing saikorali Israelwui pāngli horsangmihaida athumli mihaowa; chiwui vang Amornaobingna kapapam saikora chi Israelna khuikahaina.

²² Kala athumna Amornaobingwui ngalei saikora, Arnon eina thuilaga Jabbok eina tangda, kala lamhāng eina thuilaga Jordan vāshungda khuikahaina.

²³ Chithāda Israelwui Vare Prohona Amorbingli Israelnaobingwui vang ngapaikhuimi kahaina; kala chi nathumna hankhuiluira kajila?

²⁴ Nathumwui vare Chemoshna nathumli khayar shimlui chi nathum maningchāngmala? Kala ithumwui Vare Prohona ithumli ngapaikhuikhami chi ithumwui sāshon sāthaira.

²⁵ Maobwui awunga, Zipporwui naomayara Balakli nana phākhamei khi leikhala? Ana Israelli kharar khangarok kala rai kasā leila?

²⁶ Israelna Heshbonli kala chiwui kha̱bingli pānlakha, kala Aroerli kala chiwui kha̱bingli pānlakha, kala Arnonwui kongpheili khalei keinung kachiva̱li kum shākathum kāshungda kapān atamli na chibing chi khisāda mayuikhuimakhala?

²⁷ Chiwui vang iwui khalāng khikha maleimana, kha ili nathumna rai rakatā hi khayona; Proho, bichar kasaa china Israelwui mibing eina Ammonnaobingwui ngachaili mashun bichar samiranu.”

²⁸ Kha Jepthana pao kachiphun chili Ammon awungana khikha matheimithuwa.

²⁹ Chiwui thili Prohowui manglāna Jepthali zangmida ana Gilead eina Manasseh kānvai, chiwui eina phonda Gileadwui Mizpahli kānda Ammonnaobingli vai.

³⁰ Kala Jepthana Proholi khangashit akha sāda hānga, “Ammonnaobingli nana iwui pāngli horsangmiakha,

³¹ rai yuihaida ina shim hankhaung chitharan ishi khāmongwui eina shokngarokkhare mi chi, ina Prohowui vang rikkatā kachigat sāda chigatra.”

³² Chieina Jepthana Ammon ngalei kānvada angarara, kala Prohona awui pāngli horsangmi.

³³ Kala ana Aroer eina thuilaga Minnithwui luinganaili khalei, Abel-keramim vāshungda, keinung kachungkha yaikathānmihaowa. Chithāda Ammonnaobingli Israelwui mibingna yuichaohaowa.

Jepthawui Naongalāva̱

³⁴ Chiwui thili Jepthana Mizpahli awui shimli unga; kala yanglu, anao ngalāva̱na timbrel khonglaga pheichak sāda ali shok ngarokrāsai. Awui nao chimānga, ali lāngda naongalāvala, naomayarala maleimana.

³⁵ Kala ana ali theilaga kachon serkhākta hānga, “Iyavo, inao ngalāva! nana ili maishi ngasakhaira, ili khanang khangasak chi na ngasāhaira; kaja ina Proholi khamor eina ngashit kahai chi makhalanluipaimara.”

³⁶ Anao ngalāva̱na ali ngahānkai, “Avā, nana Proholi hāngkahai leiakha, nakhamor eina hāngtā kahai chiwui athishurda ili sālu; ara nawui yangkashe Ammonnaobingli Prohona nawui vang athut khuimihaira.”

³⁷ Kala ana avāva̱li hānga, “Iwui vang hi kasā ngasakmilu; kachāng khaniwui vang, ina phungreili vāda yaoung-yaova sāda, I kala iwui ngasotnaobingna mafathuila thihaoki kajiwui vang chapngachā khavai kachihomilu.”

³⁸ Kala ana, “Vālu” da hānga. Kala ana kachāng khaniwui vang chihohaowa; a eina ngasotnaobing, mafathuila thiki kajiwui wukkakhanang sāda phungreili vāda chapngachai.

³⁹ Kala kachāng khani kākapei eina avāvawuili latunga, kala awui ngashit kahai athishurda sāhaowa. A mayarnaoli matheilakrangsai.

⁴⁰ Chiwui vang Israelwui naongalāvabingna, Gileadpa Jepthawui naongalāvawui vang kum kachida zimiksho matithang chapngachāchinga. Kala chi Israelwui alungli ngashan ngasāhaowa.