WUNGVA̱-WUNGVĀ 10 - Kathara Bible (BSI)

Tola

¹ Abimelechwui thili Israel kanshokmi khavai Issacharwui mi Dodowui naomayara Puah, awui naomayara Tola shoka; kala a Ephraimwui kaphungram Shamir kaho kha̱ chili pamsai.

² Kala ana Israelli kum maga̱da kathum mungsai. Chiwui thili a thihaowa, kala Shamirli chifahaowa.

³ Awui thili Gileadwui Jairna kum maga̱da khani munga.

⁴ Gadha ava̱va̱rip katonga awui naomayara thumrā leisai, kala ashiwui keinung thumrā Gilead ngaleili, Havvoth-jair hoda aja rāshungda lei.

⁵ Kala Jair thihaida ali Kamonli chifahaowa.

Ammonnaobingna Israelnaoli Singkakhareng

⁶ Kala Israelwui mibingna Prohowui mangāli makhayā otmāng saluishitta Baal eina Ashtaroth, Syria, Sidon, Moab, Ammon, kala Philistinewui varebingli otram ngatha̱thuihaida Proholi horhaowa, ali otram mangatha̱thuwa.

⁷ Kala Prohowui malungkhavāt Israelwuitungli tāhaowa, kala ana athumli Philistine kala Ammonnaobingwui pāngli horsangmihaowa;

⁸ kala chikum Israelnaobingli rekhareklak eina singkharenga. Jordan makānda khalei Ammor ngalei, kaja Gilead kaho chili kum tharāda chishat Israelwui mibing saikorali rekhareklak eina sai.

⁹ Kala Ammonnaobingna Jordan kankāda Judah, Benjamin, kala Ephraimwui shimkhurli ngararda Israelna khananglāk eina okthuisai.

¹⁰ Kala Israelwui mibingna Proholi ngakaoda hānga, “Ithumna nawui mangāli morei sāhaira, kaja ithumwui Vareli horhaida Baalbingli otram ngatha̱haowa.”

¹¹ Kala Prohona Israelwui mibingli hānga, “Egyptnaobing, Amornaobing, Ammonnao, kala Philistinenaobingwui eina ina nathumli makankhuimala?

¹² Sidonnaobing, Amaleknaobing, kala Maonaobingna nathumli rekhareka, kala nathumna ili khangakao chitharan athumwui pāng eina ina nathumli kankhui.

¹³ Kha nathumna ili horhailaga khangatei varebingli khorumhaowa; chiwui vang ara ina nathumli makanmiluimara.

¹⁴ Nathumna kapangkakhui varebing chili angakaolu; nathumwui kakhanang atamli athumna kanmiranu.”

¹⁵ Kala Israelwui mibingna Proholi hānga, “Ithum morei sāhaira; nana phāra kaji chi sālu; kha aja ithumna seihā sāda kakankhuimilu da poli.”

¹⁶ Kala athumna yurbingwui varebing horserhaida Proholi otram ngatha̱luishita; kala Israelwui kakhanang chi ana theilaga makhāngrarthuwa.

¹⁷ Khaleilaga Ammonnaobingna rai sākhavai Gileadli rairum rāsai, kala Israelwui mibingla kazipkhuiserlaga Mizpahli rairum sāhaowa.

¹⁸ Chieina mibing kala Gileadwui kathānabingla akha eina akha hāngngaroka, “Ammonnaobingli khipāna ngararrikaprakhala? Chipana Gilead saikorawui atungli akhavā sāra.”