TITUS 3 - Kathara Bible (BSI)

Vareshi Acham

¹ Khamungabing eina pangshap kasingabingli mayā khavai, athumwui kahāng nganā khavai, kala khamashung ot sāngairareohai khavai nawui mibingli phaningung ngasaklu.

² Khipalikha kashi tui mamatui khavai, makharar khavai, kha malungnim khavai, mashit khavai kala mi saikorali ngahānthei khavai hānglu.

³ Ithum atam akhali mangma̱sai, kahāngla manganāsāmana kala khangui pongli zatsai. Mik khamathak, pha̱sāwui ringkaphāmangli phāda kala yuikashi yangkashina pemhaida akha eina akha yangkharing ngaroksai.

⁴ Kha ithumwui huikhame Varewui lukhamashan kala leikashi phongkhami tharan,

⁵ ithumli ana huimi. Ithumna khamashung khangarong ot kasāwui vang maningmana; kha awui lukhamashan mangā eina pheomihaida Manglā Katharana pharā khangasak mirin kadhar chi ithumli thada mi.

⁶ Ithumwui Huikhame Jishu Khristawui mangā eina Varena ithumwuitungli Manglā Kathara pemting eina heirormi.

⁷ Chieina awui lukhamashan mangā eina ithumli mashungmida ithumna kachihān makashimān kharing mirin chi samphang ngasaka.

⁸ Hi khamashunga chānsamna; Ina nali hiwui pongli saklak eina hāng ngasakngai. Chithākha Vareli shitkasangabingna kaphā ot kasāli chekchinmeira kala hikathā hi mibingwui vang phai kala kānnai.

⁹ Kha mangkhama̱wui ngaphat khangarok, miun kaphei, ningkhokkha makasā kala ainwui pongli khararkhangarokli mazangalu. Chi makankhanā otmānga.

¹⁰ Kaikhangasaka mi chili khani shida hāngmachinlu. Chiwui thiliva khikha mahāngluilu.

¹¹ Kaja hikathā mi hiya morei kasā kala makathara mina da nana thei. Awui moreina a yonna da theikhui ngasakra.

Khanaowa Tui

¹² Artemus nilala. Tychicus nilala, ina nawuili chihokharā tharan kashap eina tangda Nicopolisli rākhavai sālu. Khikhalajila ina sikachāng atamli chili pamkhavai ngarānhaira.

¹³ Phayetme Zenas eina Apollosli kashap eina thākta chihoungmilu. Ani khavāt malei khavaila yangmilu.

¹⁴ Kachangkhat darkar khalei chi mishap khavai ithumwui mibingna kaphā ot kasāli ngalang chigathei khavai tamkhuiphalungra kala aremawui mirin maringphalungmara.

¹⁵ Ili ngasokapambing saikorana nali shālam chiphunli. Shitkasanglungli shālam chiphunli. Shitkasanglungli ithumli leikashebing chili ithumwui shālam hāngmihailu. Nathum saikorali Varewui lukhamashan china ngasomichingranu.