TITUS 2 - Kathara Bible (BSI)

Khamashung Pheisintui

¹ Kha tamkachithei khamathā chili khangaruma chi nana chishutphalungra.

² Khararnaobingli ngarakzakhai khavai, ningkā khavai, khalatta ngarinthei khavai, shitkasang, leikashi kala kakhāngli nganingtit khavai tamchitheilu.

³ Chithada preirarbingli kathara preirarwui mirin zatkhavai hāngchitheilu. Athum morkasāp lah khamarip otsakli mazangphalungmara. Kaphā chi khikhala da lārongpongbingna tamkhui khavai

⁴ athumna lārongpongbingli gahara ngarā eina naongarāli leishi khavai,

⁵ ningkakāva̱, shim pānkatheiva̱, lumashankatheiva̱ kala gahara ngarāwui kahāng khanganava̱ sākhavai tamchitheiphalungra; chithākha Varewui eina kharā chānpao chili mi khipānakha mamashātmara.

⁶ Chithada sāda yaronnaobinglila athum khalatta ngarinshap khavai kasatsanglu.

⁷ Apong saikorali na khalatta acham-aram kaphāwui ngayoyan sāphalungra. Nawui tamkachitheili ningkathar kala ningkasang eina sālu.

⁸ Maphenkapai tui matuilu, chithākha ithumwui apongli athumna makaphā khikha hāngkhavai masamphangmada yangkashibing khayakkhuira.

⁹ Raobingna athumwui akhavābingwui kahāng nganā khavai kala apong kachiva̱li ningyāng ungngasak khavai tamchitheilu. Athumli mangakaishi ngasakalu

¹⁰ kala malee ngasakalu, kha athumna atam kachida kaphā kala kahāng khanganā lei kaji chitheiphalungra. Chithākha athumwui otsak saikorali ithumwui Huikhame Varewui pongli tamkachithei chi aman leingasakra.

¹¹ Kaja mikumo saikorali huikhui khavai Varena awui lukhamashan chitheimihaira.

¹² Lukhamashan china ithumli Vare makathei mirin kala okathuiwui khamathang horngasakhailaga khalatta khangarin mirin, mashungrik eina kala Vareli theida okathui hili okthui khavai tamchitheimi.

¹³ Ithumna kachihān khamahaiya zimiksholi ngaraida ithumwui Huikhame Jishu Khrista kala hakkhamahā Varewui tekhamatei chi rāthanghon

¹⁴ makaphā makhayāwui eina ngatangkhuida awui kathara kala khamareka mi sākhavai a khalatta ithumwui vang chigatmi.

¹⁵ Kasatkasang eina ngasoda mangasunglakla kahāngla hāngmachinlu. Mi khipānakha nali mayangkateo ngasaklu.