TITUS 1 - Kathara Bible (BSI)

Shālam Tui

¹ Varewui rao kala Jishu Khristawui paokazata Paul, ithumwui dharmarinna khamashung tamchithei kahai chili thānmi khavai kala Varena kapangkhui kahai miyurwui shitkasangli ngachonmi khavai ili kapangkhuida kachihona.

² Chi makashimān mirinwui kachihānli pheisin sai. Makakapika Varena okathui masāranglakha mirin chi ngashitmihaikasāna,

³ kala retkahai atam chili awui paokaphāli phongshokmiya. Hi ili chisin kahaina, kala chi ithumwui Huikhame Varewui kakaso eina hākashokna.

⁴ Ina shitkasangwui lungli inaomayara hokapaiya Titusli kagapina: Avāva̱ Varivara kala ithumwui Huikhame Khrista Jishuwui lukhamashan kala chingri kahai tāshungmiranu.

Creteli Titusna Ot Kasā

⁵ Sakhangayi apam kachiva̱li churchwui kathāna kapangsang khavai ina nali Creteli chipam kahaina. Ina hāngchithei kahai chi phaningunglu.

⁶ Kathāna saki kaje mi chi shāt makakā sāphalungra, preiva̱ akhamāngphalungra, naongarāla shitkasanga, kapā ot masāla kahāng khanganā ngasāphalungra.

⁷ Kaja yaokahoma hiya Varewui lanse akha sāda shātmakakā mi sāphalungra, malangsophalungmara, malungmavātzarphalungmara, khamarip, khangashao kala tongzā khavai khangamar ot masāphalungmara.

⁸ Kha kha̱mimāli ngahānkatha, kaphā sākhangaia, khalatta ngarinkatha, khamashunga, kathara chamsin katheia sāphalungra.

⁹ Tamchithei kahai khamashung tui chi singtitphalungra. Chithākha khamashung tamkachithei chi ana hāngchitheishapra, kala tui khangayātbing chili athumwui khayon chitheishapra.

¹⁰ Kaja pāreklaga ngakaikashe kala mikhanama mi kachungkha lei, mataimeikapta chi Jihudibingna.

¹¹ Athumna tongzā khavai hokhamahā matamchitheikhangayi chi tamchitheida shimkhur katongali pa̱ngapā ngasaka. Chikathā chi khāmphalungra.

¹² Cretenaobing athum khalattawui ngachaili marān akhana “Cretewui mibinga atam kachiva̱li kakapik, makaphā ramsā, ngachangmakakā kala morkahakbingna” da hānga.

¹³ Awui tui chi mashunglaka. Chiwui vang athumli saklak eina hāngmachinphalungra. Chithākha athumwui shitkasang ngatarpaira.

¹⁴ Kala khamashung horkahaia mibingwui eina kashok mikumowui ningkhami kala Jihudibingwui phorchān manganāsangluimara.

¹⁵ Katharabingwui vanga ot saikora tharsera. Kha khamakhao mashitkasangbingwui vanga khikhala kathar maleimana. Kaja awui ning kala mashun-makhui hi makhaoserhaowa.

¹⁶ Athumna Vareli thei da hānga, kha athumwui otsakva chili mamayāmana. Athum hiya kaphā ot sākhavai matik makachā, yangkharingkapai kala kahāng makhanganābingna.