SOLOMONWUI LAA 8 - Kathara Bible (BSI)

¹ Iyāvo na ipā thasalala, ishava̱wui na̱ eina nganaokhuisālala! Ina nali ayarli samphangsi kaje, ina nali maya̱khuira, kala khipānakha ili mayangkharingmara.

² Ina nali ishāva̱wui shimli, kala ili vaikhui khavai kāli thanungra. Ina nali nganamkaphā khamanata drakhāra̱ mangkhavai mira, kabotheira̱la mimangra.

³ Iyavo, awui uipāngna ikuitungli yāpāngna ili vamsi kaja!

Mayara

⁴ O Jerusalemwui naongalāva̱bing, ina kapona, leikashi ningyāng maungranglakha makharākalu, khamathotla mamathotalu.

Khām kahaiva̱li Ringphākharum Chorus

⁵ lamhāngwui eina ungkharā awui leikasheli shaikazatvā chi khipākhala? Theithuktheipamli ina nali mathotkhui. Chili nava̱na naora̱sai, nali pharākakhuiva̱ naora̱sai.

Mayara

⁶ Napāngtheili mahor khanam thāda ili naningli namshanmilu; kaja leikashi hi kathi thāda panga; yuikashi chikhurwui sākashi thai. Chi mei thāda chuishoka, sakashe meiwon thāda ngasheiya.

⁷ Tara̱ kachungkhana leikashiwui ra̱kachang mavānmirarmana, tara̱ kaphongnala makheithuirarmana. Mi akhana leikashiwui vang awui shimwui lan saikora ngatha̱sa jilala machāpmimara.

Chorus

⁸ Izarva̱ kateona akha lei, ana̱ maokranga. Izara̱li rākhangahān tharan ithum kathausikhala?

⁹ A phākho sāsāsi kaje, lupāsāwui raipan sākhuira; kha a khāmong sāsāsi kaje, ithumna ali cedar chikhai eina romphinhaora.

Ngalāva̱

¹⁰ I phākho sāsai, isungthei dolan thai; chieina I awui mikyanli chingri kahai khuikharāva̱ thai.

¹¹ Baal-hamonli Solomonwui drakhā yāmgui akha lei; kala drakhā yāmgui khamasaali mihaowa; athum ava̱va̱na atheiman lupāsā thingthing khuirāmiki kajina.

¹² Iwui drakhā yāmgui, iwui chi, I khalattawui vangna; O Solomon, nana thingkha leilapai, kala athei khamasābingna shākhani leilapai.

¹³ O yāmguili kapamana, iwui ngasotnaobingna nakhon nganāli; ili kashāngasakmilu.

¹⁴ Thaklu, iwui leikashiva̱, seichuinao, chaovānao thāda nganamkaphā kaphungtungli.