SOLOMONWUI LAA 7 - Kathara Bible (BSI)Mayara 1 Naphei pheihop teokha tongngayili O awungva̱ kathava̱! khanguma nakhaishāng khanganee kathemana sākakhui chāra̱-chāsān thai. 2 Nahaitong drakhāra̱ mavatlak kaje khoramnaona, nawukva timrāwonna kuinam kahai kehu mathun kahaina. 3 Nasungthei khanini chaonao khani, ngashirkatā thai. 4 Nakahung mafahāwui dolan thai, namikna Bath-rabbim ngaveiwui Heshbon ra̱khong thai. Nanātāng Damascus ngashāntāp kaje Lebanonwui dolan thai. 5 Nakuina nali Carmel kaphung thāda ngahonmi, nawui mengjin kahai kuisamna khanganaiya kachon thai; Nawui sam theilaga awungala mayāmrarmana. Khām kahaiva̱li Ringphākharum 6 Na teokha ngatikrihaikhala, O leikashiva̱, yangkhangaiva̱! 7 Asho-alep khaneirong mangatei! Nasungthei khaneithei mazān mangapei! 8 Khaneirongli yakkāda ina aphāng kāyonkhuira da ina hānga. Iyāvo, nasungthei che drakhāthei mazān mathāphalung! kala nakhakkhā theithukthei khut mathāphalung, 9 nawui maya̱kakhui ahā eina morchaili nganaiyok eina mathāmeikap kaji drakhāra̱ longkatā thai. Ngalāva̱ 10 I iwui leikashewuina, kala awui malungkachāng ilina. 11 Rālu, iwui leikashe, ini luili yaothuisa kala kha̱kha̱li zunvāsa; 12 ngathorthakva̱ drakhā yāmguili vāda ashon mashonhairakhala ayangsa; drakhārong awon mangachakkhaihaira kala kabotheila mawonhairakhala? Chili iwui leikashi nali chitheira. 13 Mandrake nganamphokhaira, athei kadharla, kachamla athei shaikaphā saikora khāmongpheili iniwui vang ina kaziphaira, O iwui leikashe. |
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
Bible Society of India