SOLOMONWUI LAA 4 - Kathara Bible (BSI)

Khām kahaiana Khām kahaiva̱li Kaso Mayara

¹ Yanglu, nali yangngaishuna, iwui leikashiva̱, yanglu, nali yangngaishuna! Namik nāsha̱nao thāda mairārli theizanga. Nakuisam Gilead kaphungli me ashangva̱ kazat thai.

² Nahāna, yaohah chichāp kahaia anao makashumva̱, khanini ngathānkazata ra̱vailaga kashok thai.

³ Namorchai kazaira̱ hungping kahai thai, kala nakhamor yangngailaka. Namaisor kabothei ngakaipak kahai thai nawui mairār alungli.

⁴ Nakahung Davidwui tārong thai, kapingbingwui chāngvei, talla̱ thingkha kāngyui khavai pam thai.

⁵ Nasungthei chaonao khani thai, seichuinaowui ngashirkatā timrāwon pamli phākashai thai.

⁶ Kazing mayingranglakha, khaya̱ makānthuiranglakha, myrrhwui phungreili frankincensewui kaphungli ina totot vāhaora.

⁷ Nava yikransanhai, iwui leikashiva̱; nawuili khavāt maleimana.

⁸ Lebanonwui eina ili ngasothuiusa, iwui khām kahaiva̱, Lebanonwui eina ili ngasothuiusa. Amanawui kaphungton eina, Senir kala Harmonwui kaphungton eina, kazingkha̱khurwui eina, kuirāng kaphung eina, thuiusa.

⁹ Ining nana sākazamhaira, izarva̱, iwui khām kahaiva̱, nawui miktheknao akha eina, ining nana sākazamhaira, nawui chāra̱-chāsān akha eina.

¹⁰ Nawui leikashi teokha shimle! izarva̱, iwui khām kahaiva̱, drakhāra̱lila nawui leikashina shimmeikhāra, nawui thao nganamkaphā khangateili henmeikhāra!

¹¹ Iwui khām kahaiva̱, namorchai khuira̱ thāda shima; namaleli khuira̱ eina seina lei; nawui kachonnganam Lebanon nganam thai.

¹² Izarva̱, iwui khām kahaiva̱, yāmgui ngavei kahai, ngaveitit kahai yāmgui, saphintit kahai ura̱na.

¹³ Nawui ashon kabothei yāmgui mathameikap kaje athei, henna eina nardna pema.

Mayara

¹⁴ Nard, saffron, calamus, sākom khamatataiya frankincense thingyur pema, myrrh kala aloe khamataiya nganamkaphā ayur eina ngasoda—

¹⁵ yāmguiwui ura̱, kharinga tara̱wui ra̱khong, kala Lebanon eina longkatā kong!

¹⁶ O atungwui masi, thuilu, O azingwui masi, phanrālu! Iwui yāmguili phanda, anganam ngayaoranu. Athei mathāmeikap kaji chi iwui leikashena rāphāshairanu.