SOLOMONWUI LAA 2 - Kathara Bible (BSI)

Ngalāva̱

¹ Iva Sharonwui awona, tampākwui timrāwona.

Mayara

² Ka̱shātlungli timrāwon kaphor thāda, iwui leikashiva̱ ngalānao ngachaili lei.

Ngalāva̱

³ Ngahongthing alungli theithukrong thāda, iwui leikashela yaronnaobingwui alungli chithai. Mathānlak eina awui khaya̱zingli ina pamkhui, kala awui athei ina khamazap tharan shima.

⁴ Ana ili morkasong pamli thānvai, kala iwuitungli awui leikashina philān sai.

⁵ Ili drakhātheikao eina phauimilu, theithukthei eina ning mathing ngasakmilu; kaja ili leishāt kazāt za̱haira.

⁶ Iyavo, awui uipāngna ikuizingli, yāpāngna ili vamsi kaje chong!

Mayara

⁷ O Jerusalemwui naongalāva̱bing, seichui kala ramwui chaonao mingsinda ina kahāngna, leikashi ningyāng maungranglakha, makharakmialu, khamathotla mamathotmialu.

Ngalāva̱

⁸ Iwui leikashewui akhon! Yanglu, a rārāli, phungreili ngawokkai kaphungnaoli ngalongshang ngalongtā da.

⁹ Iwui leikashe seichuinao thai, kala chaonao thai. Yanglu, ishi phākho khanukshong nganingda lei, charfa eina yangzangda lei, phākhokhurli ra̱yangda lei.

¹⁰ Iwui leikashena ili hānga, “Thuilu, iwui leikashiva̱, iwui khamathāva̱, rālu;

¹¹ kaja yanglu, si kānhaira, zingrot kupta thuihaira.

¹² Ngaleili awon wonphokhaira, laa kasā atam rāhaira; nāsha̱wui kakhong iramli shāhaira.

¹³ Khaorārongna athei matheiphokhaira, kala drakhārongna awon wonuda; anganam shokphokura. Ngakarthuilu, iwui leikashiva̱, iwui khamathāva̱, rālu.

Mayara

¹⁴ Lunghārtungli khaleiva̱ O iwui nāsha̱, lungkai tungli khangathumva̱, nazak ili kachitheilu, nakhon ili kashā ngasaklu, kaja nakhon leishirihai, kala nazak ningshāt kai!

¹⁵ Ramfabing chi tukkhuimilu, yāmgui sākazamkhame ramfabing chi, kaja ishiwui drakhārong wonmahungda lei.”

Ngalāva̱

¹⁶ Iwui leikashe iwuina, I awuina, ana awui yao timrāwon ngachaili phāshai ngasaka.

¹⁷ Kazing mayingranglakha, khaya̱ mayongthuiranglakha, seichuinao thāda kala kaphungtungli kazata chaonao thāda latunglu, iwui leikashe.