SHONGZĀ 36 - Kathara Bible (BSI)

¹ “Bezalel eina Oholiab kala sākathei mi kachiva̱na kathara shim sākhavai Prohona ot saikora sākashap kala thangkhamei sangmi kahai athum china Prohowui kakaso athishurda sāra.”

Mibingna Lemmet Kachungkha Khuirai

² Kala Mosesna Bezalel eina Oholiab, kala kashapa mi, kaja Prohona sākathei ning sangmi kahaia, ningli raza̱da kasatkhami kachiva̱na ot sākhavai hokhui.

³ Kala kathara shimwui ot chi sākhavai Israelnaobingna mingairareo kachigat saikora athumna Moseswui eina samphanga. Athumna lemmet kachigat ngathor kachida khuirāmi,

⁴ chiwui vang eina kathara shimwui ot kasābing china kachichāwui otpamwui eina athumna rāda,

⁵ Mosesli hānga, “Prohona ithumli kakaso athishurda sāvaiki kaji otli lāngmeida mibingna khuir haira.”

⁶ Chieina Mosesna kasoi kala rāmrah huptali tui chi ngayaovai, “Kathara shimwui ot sākhavai sha̱nao nilala, mayarnao nilala sāvaiki kajili lāngda machigatluiranu.” Chieina mibingna makhuira khavai khāmhaowa;

⁷ kaja athumwuili sāvaishapli lāngmeida kachungkha leisai.

Kazip khavai Kachonshim Kasā

⁸ Chieina sākathei athum saikorana tabernacle chi chonrān tharā eina sākhui; chi manakta hākakhui kazaira̱ kala khamaying, hungrisi, hungshi kahai chonsā eina sākhuida, cherubim themlāk eina sāsanga.

⁹ Chonrān ava̱va̱wui asān khuining maga̱da chishat, kala chonrān kachiva̱wui aretna khuining mati; chonrān saikora asān-aret ngaraichāsera.

¹⁰ Kala chonrān phangā asā akha sākhui, kala khangatei phangā chi asā akha sākhui.

¹¹ Kala ana chonrān ngaher khare chiwui amarei kachida apheili khamayinga eina hokthang khavai sāsanga; chi tākam eina kakhanewui marei chilila sāsanga.

¹² Ana chonrān akhali hokthāng khavai hangphangā, kala kakhane ngaherlila hokthāng khavai hangphangā da amarei chili sāsanga; kala hokthāng khavaibing chi akha eina akha mai ngasuna.

¹³ Kala ana sinā eina akhui hangphangā sākhuida, kala chonrānbing chi akha eina akha pānkhui ngarokta tabernacle saikora chi akha sākhuiya.

¹⁴ Kala ana tabernacletungli fakhavai meha eina chonrān tharāda akha sākhui.

¹⁵ Chonrān ava̱va̱wui asān khuining thumra, kala aretna mati, chonrān tharāda akha chi asān-aret saikora chi ngaraichāsera.

¹⁶ Ana chonrān phangā sakkha sākhui, khangatei tharuk chi sakkha sākhui.

¹⁷ Kala ana ngaherkha chiwui shokkhamayara chonrān amareili hokthāng khavai hangphangā sāsanga, kala chonrān ngaherkha ngashikkhui khavai chilila hangphangā sāsanga.

¹⁸ Kala ana pithraiwui akhui hangphangā sākhuida kachonshim tongda asā saikora chi akha sākhavai semkhuiya.

¹⁹ Kala ana kachonshimli fakham khavai mathen kahai yaohui kala mehui eina sākhui.

²⁰ Chiwui thili ana khaning khavai akombing acaciathing eina sākhui.

²¹ Akom kachiva̱wui asān khuining tharā, kala aretna khuining akha tangkhaina.

²² Akom ava̱va̱li ngasunkhui khavai amachat khanini kāngasakta tabernacle chiwui akom kachida sāsanga.

²³ Tabernaclewui vang ana akom hithāda sāsanga: azingshongwui akom maga̱,

²⁴ kala ana akom maga̱ chiwui khaning khavai aphei hangmati lupāsā eina sai, akom akhawui amachat khaniwui vang akharip, kala akom ava̱va̱wui vang amachat khanirip sāsanga.

²⁵ Kala Tabernaclewui kakhanevāk, atungshongwui vang, ana akom maga̱ sema,

²⁶ kala lupāsā eina kasā, akom ava̱va̱wui aphei khanirip da aphei hangmati sākhui.

²⁷ Kala tabernacle khanukshongwui atungshong ana akom tharuk sema.

²⁸ Kala ana tabernaclewui khanuk achithekli sangkhavai akom khani sema.

²⁹ Chibing chi azingli mangashikmana kha atungli hokthāng khavaipamli ngasunkhui, chithāda chithek khaniwui vang khani sākhui.

³⁰ Lupāsā aphei eina ngasoda chili akom chishat lei: akom ava̱va̱li aphei khanini da tharāda tharuka.

³¹ Kala acaciathing eina phākashut kala tabernacle chiwui arāp akhawui akomwui phākashut phangā,

³² kala arāp akhavākwui akom phākashut phangā, kala tabernacle khanukshongwui zingtunshong akomwui vang phākashut phangā da ana sākhui.

³³ Ana alungthungli kasanga phākashut thing chi akomwui vākatang khanini ungshung vāshungda sāsanga.

³⁴ Kala ana akombing chi sinā eina rommithai, kala phākashut thingbing chieina hokthāng khavai akhuibing chi sinā eina romsera.

³⁵ Kala mairār chi khamayinga, hungrisi, hungshi kahai kala manakta hākakhui kazaira̱ chonsā eina sākhuida cherubim themlāk eina yeksanga.

³⁶ Kala hiwui vang ana acaciathing eina pākra̱ mati sākhuilaga sinā eina rommithai; chiwui hokkhui khavaibing sinā eina sai, kala khaning khavai akhui mati lupāsā eina heikhui.

³⁷ Ana khāmong chonrān chila khamayinga, hungrisi, hungshi kahai kala manakta hākakui kazaira̱ eina sākakhui chonsā kala kapim eina yekkasanga eina sākhui;

³⁸ kala chiwui hokkhui khavai kakā pākra̱ phangāla sākhui, kala pakra̱bing chi sinā eina rommithai, kala hokkhavai khara̱bing chi sinā eina sai, kha aphei phangā chiya pithrai eina sai.