SHONGZĀ 32 - Kathara Bible (BSI)

Sinā Seinao

¹ Mosesna phungreiwui eina matālak kaji chi theilaga mibingna achinā Aaronwui ngalemli athum khalatta kazipkhuida hānga, “Ithumli thānmi khavai vare akha sāmilu; kaja Egypt ngaleiwui eina thānshokkhame Mosesli khi shokhaokhala da ithum matheithura.”

² Chieina Aaronna athumli hānga, “Napreiva̱̱ ngarā, nanaomayara ngarā kala naongalava̱ ngarāna khanāli khangathet sinā saikora khuirālu.”

³ Chieina athumna khanāli khangathet sinā saikora khuishokta Aaronli khuivāmi.

⁴ Kala ana athumwui pāngli khalei sinā chi khuida, khutlai eina sināwui seinao ama̱ akha sākhui. Kala athumna, “O Israelnaobing! hibing hi nathumwui varebingna, Egypt ngaleiwui eina thānshokkhamebing china!” da hānga.

⁵ Aaronna chi theilaga chiwui mangāli hanphut akha sākhui, kala Aaronna vaoshokta hānga “Akhama Prohowui vang phanit akha sāra.”

⁶ Akhama kathā athumna ngathorthāk ngakarthuida rikkatā kachigat kala ningyatchigatwui vang khuirai, kala mibingna phāshak phāzāda kala ngakarthuida lumshilao sai.

⁷ Kala Prohona Mosesli hānga, “Taulu, kaja Egypt ngaleiwui eina nana thānkashok nawui mibing athum khalatta sāmakhaohaira;

⁸ Ina kakasowui eina athumna ngalāngda apong khangateili ngareithuihaira. Pāng eina sināwui seinao ama̱ sākhuida khoruma, kapha̱la pha̱ya kala hithāda, ‘O Israelnaobing, Hi nathumwui varebingna, Egypt ngaleiwui eina thānshokkhame china!’” da hānga.

⁹ Kala Prohona Mosesli hānga, “Yanglu, ina mibing hili theihaira, marākkapaiya mimānga.

¹⁰ Ara chithāda sāda iningkhānra, iwui malungkhavāt mei kachui thāda ina athumli mutngasakra; kha nawui eina yur kahakva̱ akha sāngasakra.”

¹¹ Kha Mosesna awui Proho Vareli poda hānga, “O Proho, Kahaka pangshap kala kapanga pāng eina ngasoda Egypt ngaleiwui eina nana thānshok kahai nawui mibingli khisāda hiyākha malungvātrakhala?

¹² ‘Phungreili ashaothat khavai kala okathuiwui eina shimān ngasak khavai ana makaphā khangarān leida athumli thānkashokna’ da khisāda Egyptnaobingli hāngngasakrakhala? Sakashi malungkhavāt kala nawui mibingli makaphā taki kajiwui eina ngacheimilu.

¹³ Nawui raobing Abraham, Isaac kala Israelli phaningungmilu, kala na khalattana athumli ‘Ina nawui ara̱-azā kazingramwui sirāyākha ngasa ngasakra, kala ina ngashit kahai lam saikora hi nawui ara̱-azāli ina mira, kala athumna katang mavaila pānra’ da shākhi sāda hāngkahaina.”

¹⁴ Kala awui mibingli sākashi sākida kaphaningwui eina Prohona ning ngacheihaowa.

¹⁵ Kala Mosesna ngareikhuida tuingashitwui lungphek khaninili kapikasang chi singphungda phungreiwui eina tai; lungphek khani chi lākkhala lākkhala kapingasunga.

¹⁶ Lungphek khani chi Vare themsakna, kakapila lungphek chili Varena kapikasangna.

¹⁷ Mibingwui khangavaowui akhon-akhak chi shālaga Joshuana Mosesli hānga, “Rāmrah chili raikhon shāli.”

¹⁸ Kha ana hānga, “Chi rai khayuiwui akhon maningmana; lah makhayuiwui chapkhangachā akhonla maningmana; kha laa kasakhon ina shai.”

¹⁹ Kala rāmrahpamli ungzangkhaleoda ana seinao kala pheichak kasā chi theilaga, Moseswui malungkhavāt mei kachui thāhaowa, kala apāngli kasing lungphek chi hortāda phungrei pheili horkhaihaowa.

²⁰ Kala athumna sākakhui seinao chi ana khuilaga meili riktai, kala akha̱ sāngasakta chi tara̱li manātlaga Israelwui mibingli mangngasaka.

²¹ Kala Mosesna Aaronli, “Mibing hina nali khi sāhaoda nana athumwuitungli hiyakha hakkhamahā morei phungsangmikhala?” da hānga.

²² Chieina Aaronna ngahānkai, “Iwui ameina malung mavatmiranu; mibing hili nana katheina, athum makaphā ningchānglaka.

²³ Kaja athumna ili, ‘Ithumli thānzatmi khavai varebing milu, khikhalajila Egypt ngaleiwui eina thānkashoka Moses kali vāhaokhala kaji ithum matheithura’ da hānga.

²⁴ Chieina ina ‘Sinā khalei mi china khuirālu’ da hānga; kala athumna khuirāda ina meili sanglaga seinao hi kashokna.”

²⁵ Mibingna ningkhān kasā chi Mosesna theilaga (kaja athumwui yangkashebingwui mangāli athum khalatta khayāmalā khavai Aaronna ningkhān sāngasakhaowa).

²⁶ Mosesna rāmrahwui ngaveili nganingda, “Prohowui vang khipā leikhala, ili rālu” da hānga. Kala Levinaobing athum saikora kazipkhuida awuili rai.

²⁷ Kala ana athumli hānga, “Israelwui Proho Varena kahāngna, mi kachiva̱na kachichāwui raighai ngapiphungda rāmrahlungli zatung-zatvāda rāmrah peida ngaveiwui eina ngaveili achināla, ngasotnaola, khongnainaola shaothatlu.”

²⁸ Kala Leviwui naomayarabingna Moseswui kakaso athishurda sai, kala chithang pikatā mi thing kathum sha̱khana.

²⁹ Kala Mosesna hānga, “Aja zimiksho ana nathumli somi khavai nathumna naongarā kala chinaongarāli mashivāmla Proholi otram ngatha̱ khavai nathum khalatta tharchisinhaira.”

³⁰ Akhama kathā Mosesna mibingli hānga, “Nathumna morei kahakva̱ sāhaira. Ara ina Proholi kāra; nathumwui vang ina chamnāmipairada phaninga.”

³¹ Chieina Mosesna Proholi vāhāngluishita, “Iyavo, mibing hina kahaka morei sāhaira; athumna sinā eina athumwui varebing sākhuihaira.

³² Kha ara, nana mayāmiakha athumwui morei pheomilu—chi maningakha nawui lairikli kapi kahai iwui ming chi khuishokmihaolu da ina nali seihā sāda poli.”

³³ Kha Prohona Mosesli hānga, “Ili morei kasā mi chili iwui lairikwui eina ina ali khuishokhaora.

³⁴ Kha ara, taulu, kala ina hāngkahai apam chili mibingli thānvālu; yanglu, iwui kazingraona nathumwui mangāli zatra. Chithālala, I kharā chitharan, ina athumwui morei chi athumwuitungli hāngsangra.”

³⁵ Kala Prohona mibingwuitungli mimao chihovai, kaja Aaronna semkhami seinao chi athumna sākakhuiwui vangna.