SHONGZĀ 30 - Kathara Bible (BSI)

Nganamkaphā Hanphut

¹ “Nana nganamkaphā riktā khavai hanphut akha sākhuira, hi acaciathing eina sākhuira.

² Chiwui kasāng khuiningkha, kala khuiningkha pākta asān-aret ngaraichāra, kala awui asān khuining khani juira; chiwui angachi asā akha sāngasakra.

³ Kala nana chiwuitungli arāpla, kuimareida kala angachibingla sinā eina romserlu, laga sinā eina kuimareida akhamong sāsangra.

⁴ Akhamong chiwui azingli sināwui akhui lākharip ngarei ngasungda khaninili sāsanglu; phungkazat chitharan, chili thingphān thara̱sang khavaina.

⁵ Nana thingphān chi acaciathing eina sālaga sinā heimitrorra.

⁶ Kala chi mairārwui alungshong ningkhami oko ngalemli, kala chiwui atungli khalei lukhamashan pamkhong mangāli hailu, ina nali chili samphangra.

⁷ Kala Aaronna nganamkaphā chi hanphut chiwuitungli riktāra, ngathor kachida Aaronna thaomei chi sakhamathā chitharan ana riktāra,

⁸ kala ngazinshong Aaronna thaomei kashar tharan chi ana riktāra, kala Prohowui mangāli nathumna naothot kachida hi sāchingra.

⁹ Makathara anganam nilala, rikkatā kachigat nilala, tharāzat kachigat nilala, ra̱shakshirei chiwuitungli machigatpaimana.

¹⁰ Aaronna hanphut hiwui angachibingli suiham chigat sāwui ashee chi neora, suiham chigat kumkhali akha shida thot kachida sāchingra; hi Prohowui mangāli tharmathengmeikap kajina.”

Pheomi khavai Pheisā

¹¹ Prohona Mosesli hānga,

¹² “Nana Israelnaobingwui mishān kakhui tharan, athum ava̱va̱ khalatta ngatangman miphalungra, kaja kashān chitharan athumwui ngachaili sākazāt marā khavaina.

¹³ Mishān kashānli kazang kachiva̱na hithāda miphalungra: kathara shimwui shekel athishurda mi kachiva̱na shekel makhai Proholi kachigat sāda mira.

¹⁴ Mishānli kazanga kum maga̱ kāshung kahaiya kala chiwui atungbing mi kachiva̱na Proho wui vang kachigat hi mira.

¹⁵ Nathum khalattali pheomi khavai Proholi khami chitharan kashāngana shekel makhaili chungmeida mamimara kala kachāmana shekel makhaili suitāda mamimara.

¹⁶ Israelnaobingwui eina pheomi khavaiwui lupā chi nana khuilaga kazip khavai kachonshimwui ot sākhavai sālu, kaja nathum khalattawui vāng pheomi khavainada Prohowui mangāli Israelnaobingna phaningung khavaina.”

Khongsai

¹⁷ Prohona Mosesli hānga,

¹⁸ “Pheokhavai pithraiwui khongsai akha kala chi rungkhavai pithraiwui aphei akha sākhuilu. Kala chi kazip khavai kachonshim eina hanphutwui ngachaili haida tara̱ sanghailu,

¹⁹ Chili Aaron kala awui naongarāna pheipāng pheora.

²⁰ Athumna kazip khavai kachonshimli kazang chitharan, lah athumna hanphutpamli rāda Proho wui vāng otram khangatha̱ mei eina rikkatā kachigat chitharan, athum tara̱ eina pheora, chi masaakha athum thira.

²¹ Athumna athumwui pāng kala athumwui phei pheora, masākha thira: hi katang makhavai, ali kala awui ara̱-azā mithot tāshungda athumwui shiyan sāra.”

Neokhavai Thao

²² Chili lāngda Prohona Mosesli hānga,

²³ “Mathāmeikap kaje nganamkaphā yur — nganamkaphā myrrh ara̱, shekel shāphangāman, nganamkaphā sākom, chiwui tangkhai, chiya shākhani hangphangāman, ngawokrung kahai nganamkaphā mathira̱ shākhani hangphangā man,

²⁴ kala (kathara shimwui shekel athishurda) cassia shāphangāwui, kala olive thao lengkhor akha khuilaga;

²⁵ kala thao kashunga mina kasā thāda saikora hi manātlaga kathara neokhavai thao semkhuira; hi kathara neokhavai thao sāra.

²⁶ Kala nana hi eina kazip khavai kachonshim kala ningkhami oko chili nana neomira,

²⁷ table kala chiwui khorkhongbing, kala thaomeishong kala chiwui khorkhongbing, kala nganamkaphā thao rikkhavai hanphut,

²⁸ kala rikkatā kachigatwui kala chiwui khorkhongbing kala khongsaila chiwui apheila katonga ngasoda.

²⁹ Tharmathengmeikap kaje ngasā khavai nana tharchigatra; chili sākaza̱ saikora chi kathara ngasāhaora.

³⁰ Kala nana Aaron kala awui naomayarabingli pāngmon sāda ili otram ngatha̱mi khavai nana thao neomida tharchigatlu.

³¹ Kala nana Israelnaobingli, ‘Hi nathumwui naothot peida iwui kathara neokhavai thao ngasāra da hānglu.

³² Hi icham-chama miwui phasāli maheirorpaimana, kala hili ngaraichāda masemkhuipaimana; hiya katharana, kala hi nathumwui vang kathara ngasāra.

³³ Kachikathāna hili ngaraichāda manātkhuiakha, kala kha̱mili hi neomiakha awui yurwui eina katathaora.’ ”

Nganamkaphā Thao

³⁴ Kala Prohona Mosesli hānga, “Nganamkaphā yur, stacte, onycha, kala galbanum, nganamkaphā yur ngasoda mathingrik kahai frankincense (akhum ngaraichāda),

³⁵ nganamkaphā thao kashunga mina kasā thāda machi sanglaga mathingrik tharmathenglak eina semkhuilu,

³⁶ kala nana ngayarda shaokhanākkhuilu, kala kazip khavai kachonshimwui ningkhami oko mangāli ina nali samphang khavai pam chili ngayarda hailu; hi nawui vang tharmathengmeikap kaje ngasāra.

³⁷ Kala hithāda manātlu da hāngkahai athishurda nana semkakhui thao chi nawui vang masāpaimana, hi Proho mingli nawui vang kathar otna.

³⁸ Kachikathāna nganamkaphā thao sāda hili ngaraichāda sakhuiakha awui yurwui eina katathaora,”