SHONGZĀ 3 - Kathara Bible (BSI)

Varena Mosesli Kaho

¹ Chitharan Mosesna Midianwui pāngmon, awova̱ Jethrowui yao homsai; kala lamhāngwui zingtunshong Horeb, Varewui phungreili homvai.

² Kala Prohowui kazingrao akha thingpompa̱ akhali meiwon eina ali rāchithei. Ana yanga, kala thingpompa̱ chi meiwon kālala machuitāmana.

³ Chieina Mosesna hānga, “Kathāda thing chi machuitāmakhala, ina lākhavāk chi vāyangkhuira.”

⁴ Ana nganaida ayang khavai khavā chi Prohona theida, Varena thingpom chiwui eina ali hoi, “Moses! Moses!” Ana ngahānkai, “I hili lei.”

⁵ Chieina ana hānga, “Marānganaialu; napheiwui eina pheihop khuishokhaolu, kaja nana khanganingpam chi kathara apamna.”

⁶ Kala ana hānga, “I navā ngarāwui Vare, Abrahamwui Vare, Isaacwui Vare, kala Jacobwui Vare china.” Kala Mosesna amai kafahaowa, kaja a Vareli yangki kaji ngacheehaowa.

⁷ Chieina Prohona hānga, “Egyptli khalei iwui mibingwui kachotkachāng ina theihaira, kala kashinabingwui vang eina ringkhangā ina shāhaira, ina athumwui kakhanang saikora theihaira.

⁸ Chieina athumli Egyptnaobingwui eina kanshok khavai, kala chiwui eina thānshokta seina̱ eina khuira̱ khalonga khamathā kala khamashā apam Canaannao, Hitnao, Amornao, Periznaobing, Hivnaobing, kala Jebusnaobingwui ngaleili thānvā khavai I katāna.

⁹ Ara yanglu, Israelnaobingwui ringkhangā ina shāhaira. Kala Egyptnaobingna rekakharek chi theihaira.

¹⁰ Chithāda sāda rālu, Egyptwui eina iwui mibing, Israelnaobingli thānshok khavai ina nali Pharaohwuili chihovāra.”

¹¹ Kha Mosesna Vareli ngahānkai, “I khipada ina Pharaohli vāda Egyptwui eina Israelnaobingli thānshokrakhala?”

¹² Ana hānga, “Ina nali ngasomira: kala nali ina kachihona kaji hieina theikhuira: Egyptwui eina athumli thānkashok tharan, Vareli nathumna phungrei hili otram ngatha̱ra.”

¹³ Kha Mosesna Vareli hānga, “Ina Israelnaobingli ‘Navā ngarāwui Varena ili kachihona,’ da akahāng chitharan athumna, ‘Awui aming khipa hokhala?’ da ngahānakha ina khi ngahānkārakhala?”

¹⁴ Varena Mosesli hānga, “I CHI INA.” Ana hānglui, “Israelnaobingli, ‘I kaho china ili nathumwuili chihokharāna’ da hānglu.”

¹⁵ Kala Varenala Mosesli hānga, “Israelnaobingli hithāda ahānglu, ‘Proho, navā ngarāwui Vare, Abrahamwui Vare, Isaacwui Vare, kala Jacobwui Varena ili nathumwuili chihokharāna’ hi katang makhavai iwui mingna,” nathumwui thot kachida ili phaningungki kajina.

¹⁶ Zatlu, kala Israelwui khararnaobingli kazipkhuida hānglu, Prohona navā ngarāwui Vare Abrahamwui Vare, Isaacwui Vare, kala Jacobwui Varena ili rāchitheida kahāngna, Egyptli nathumli kasāsā chi ina theiserhaira;

¹⁷ kala ina khangashitna, Egypt ngaleili kakhanang kachotwui eina thānshokta Canaannaobing, Hitnaobing, Amor, Periznaobing, Hivnaobing, kala Jebusnaobingwui ngalei seina̱ eina khuira̱ khalong chili thānvāra.

¹⁸ “Athumna nawui tui khuira; kala Israel ararbingli ngasoda nathum Egypt awungali ahāngra, ‘Proho, Hebrewwui Vare, ithumli samphanghaira; chieina nali kapona kaja ithumwui Proho Vareli pha̱phayā khavai kathumthangzat lamhāngli kha-vā ngasakmilu.’”

¹⁹ Pangshapa akhana tandi kasā maningakha Egyptwui awungana nathumli mamayāmara kaji ina thei.

²⁰ Chieina ina ipāng katingda Egyptli sākhangayi matakhak kahai tandi mira, chitharan mayānaora.

²¹ Ina nathumli Egyptnaobingna khayā shingasakra chithāda sāda iwui mibingna kathui tharan, athumna pāng khamasai eina mathuimara.

²² Israel prei kachiva̱na awui Egypt khongnaiva̱, kala awui shimli yaothuikharāva̱, athumwui eina lupāla, kashan-kachonla pokhuida, chi nanaongarā, mayarnao sha̱naobingli chiphunhaora; Egyptnaobingwui lan khuithuihaora.