SHONGZĀ 26 - Kathara Bible (BSI)

Tabernacle

¹ “Chili lāngda nathumna tabernacle chi sākhuilaga chi khānkhavai khamaying, hungrisi kala kahunga khamenga kazaira̱ hākhuilaga sakakhuiya, cherubim mathālak eina yekkasang chonrān tharāla sakhuiki kajina.

² Chonrān kachiva̱wui kasāng khuining maga̱da chishat, kala kapāk khuining matira; chonrān saikora asān-aret ngaraichāserra.

³ Chonrān phangā, akha eina akha ngashikkha sāra, kala khangatei phangā chi akha eina akha ngashikkha sāra.

⁴ Khare chonrān phangā chiwui shokkhamayar amareili kachon khamayinga angathān sāsangra, chi tākam eina khangatei phangā chiwui shokhamayāra amareibinglila sāsangra.

⁵ Chonrān akhali angathān hangphangā kāra, kala kakhane chonrān chilila angathān hangphangā kara; chonrān khaniwui angathānbing chi ngarei ngasungda sāsangra.

⁶ Kala nathumna sinākhui hangphangā sākhuilaga chonrān khani chi, sinākhui ava̱va̱ra, angathān khanini hokrumkhuida tabernacle chi akha sāngasaklu.”

⁷ “Nathumna tabernacleli fakhavai mesam eina chonrān tharāda akha sākhuilu, chithāda nathumna chonrān tharāda akha semra

⁸ Chonrān ava̱va̱wui asān khuining thumrāra, kala aret khuining matira; kala chonrān tharāda akha chi asān-aret ngaraichāserra.

⁹ Chonrān phangā chi nathumna ngashikkhuilu kala khangatei tharuk chi ngashikkhuilaga, katharuka chi tipkhani sālaga kachonshimwui mangāshong fasanglu.

¹⁰ Chonrān lākhavākwui shokkhamayara amareili angathān hangphangā sāsanglu, kala chonrān kakhanewui shokkhamayar amareibinglila angathān hangphangā sāsanglu.

¹¹ Kala pithraiwui akhui hangphangā nathumna sākhuilaga angathānli huisangda kachonshimwui chonrānbing chi akha sangasaklu.

¹² Kachonshimli sāsanglaga chonrān tangkhai katai chi tabernaclewui akhanukshong fakhamlu.

¹³ Kala kachonshimwui chonrān katai chi, lākhashong khuiningkha, kala lākhavāk khuiningkha da chi tabernaclewui arāpli lākharipta fakāntālu.”

¹⁴ “Kala nathumna kachonshim chi fakhavai yaohui eina mehui mathenlaga sākhuira.

¹⁵ “Kala nathumna tabernaclewui arāp acaciathing eina akom marānshak-shak sāsangra.

¹⁶ Akom ava̱va̱wui asān khuining tharārā, kala aret kachiva̱ akom chiwui khuining akha tangkhaira.

¹⁷ Ngasunkhui khavai akom ava̱va̱li amachat khanini kāserra; chithāda tabernaclewui akom saikorali sāra.

¹⁸ Nana tabernaclewui vang akom semkhuira: azingshongwui vang maga̱;

¹⁹ kala akom maga̱ wui azingli lupāsāwui khaning khavai hangmati, chiwui amachat khaniwui vang akom akhali khaning khavai khani, kala chiwui amachat khaniwui vang akom akhali khaning khavai khani sāra.

²⁰ Kala tabernaclewui kakhaneshong, atungshong akom maga̱ sangra,

²¹ kala athumwui lupāsāwui khaning khavai hangmati, akom akhawui azingli khaning khavai khani kala khangatei akom akhawui azingli khaning khavai khani;

²² kala tabernacle khanukwui zingtunshong akom tharuk sāsangra.

²³ Kala nathumna khanukshongwui achithekli sangkhavai akom khani sākhuira;

²⁴ khani chi azingli ngateira, kha atungli akhur khawut chili ngasunkhui ngasakra; china lākharipwui achithek sāra.

²⁵ Kala chili akom chishat leira, athumwui khaning khavai lupāsā eina sāra chi khaning khavai tharāda tharukra; akom akhawui azingli khaning khavai khanira, kala khangatei akom akhawui azingli khani leira.”

²⁶ “Kala nana acaciathing eina phākashut sākhuira, Tabernaclewui lākhashongwui akomwui vang phangāra,

²⁷ kala phākashut tabernaclewui lakhashong akomwui vang phangā, kala phākashut tabernaclewui zingtunshongwui arāpwui akomwui vang phangā da sākhuira.

²⁸ Alungthungli kazanga phākashut chi akomwui alungthungli ungshung-vāshungda thara̱vāra.

²⁹ Akom katonga sinā eina romra, kala phākashut thara̱sang khavai sinākhui sāsangra; phākashutla sinā heirorserra.

³⁰ Kala phungreitungli nali chithei kahai chiwui athishurda tabernacle chi khaningkāra.”

³¹ “Kala nathumna khamayinga, hungrisi kala hungshi kahai kala manakta hākakhui kazaira̱ eina themlāk eina sākakhui chonsāwui mairār sākhuida cherubim yeksangra;

³² kala nathumna acaciathing eina kasā pākra̱ mati sinā romkahaiya, sināwui hokkhui khavai kakā kala lupāsāwui apheili kakhaning pākra̱ mati chili kangruihaira.

³³ Mairār chi angathān eina kangruida ningkhami oko chi chiwui alungli khuizangra; kala mairār china kathar eina tharmeikap kaje pam khanili ngatei ngasakra.

³⁴ Lukhamashan pamkhong chi ningkhami okotungli haida tharmeikap kaje pamli runghaira.

³⁵ Kala nathumna table chi mairārwui ayārshong haira, kala tabernaclewui azingshongwui thaomeishong chi tableli kārodahaira, kala nathumna table chi atungshong haira.”

³⁶ “Kala kachonshim chiwui khāmongli chonrān akha sākhuida, khamayinga, hungrisi kala hungshi kahai kala manakta hākakhui kazaira̱ eina sākakhui kala kapim eina phorkasang kachon eina sāsanglu.

³⁷ Chonrānwui vang acaciathing eina pākra̱ phangā sākhuilaga sinā heirorra; chiwui hokkhui khavaibing chila sinā eina sāra, kala khaning khavai pithraiwui aphei phangā sākhuira.”