SHONGZĀ 23 - Kathara Bible (BSI)

Mashun eina Lukhamashan

¹ “Nathum mikhanam tui mamatuipaimara. Makaphā mili ngasoda mikhanam shākhi masāpaimara.

² Makaphā sākhavai yarui chungkhameili mashurpaimara; lah tuishotli yarui chungkhameiwui michang zangda mashun nguimi khavai shākhi masāpaimara.

³ lah kachāmawui tuishotli mijang masāpaimara.

⁴ “Yangkashewui mukkā nilala, gadhā nilala ma̱zatkasa theiakha ali khuiungmilu.

⁵ Nali ningkakachaiya mipa chiwui gadhā otphunna mangakarthukmada leisākha thāda mayanghaialu, kha khāngmathotmilu.

⁶ “Nathum kachāma miwui mashun mamatuikhayeipaimara.

⁷ Mikhanamwui kaphenli mazanglakalu; kala khayon makhalei kala khamashung-khangarong mili mashaothatalu; kaja makaphā mili ina machihomara.

⁸ Pheizā makhuipaimara, kaja pheizāna akhavābingli mik ngapeo ngasaka, kala khamashungali yonngasaka.”

⁹ “Nathumna kha̱mili marekharekpaimara, kha̱mi khangasāwui ning kathakhala kaji nathumla thei, kaja nathumla Egypt ngaleili kha̱mi sāsai.

Sabbath Zingkum

¹⁰ “Kumtharukwui vang nathumna lui vāsangda heiun hātkhuira.

¹¹ Kha kashine kum nathumna lamphohailaga ngasāmkhui ngasakra. Kaja kachāmnaobingna zākhavai kala athumna katai chi ramsāna shaipaira. Chi tākam eina drakhā yāmguila, olive yāmguila chithāda sāra.

¹² “Tharukthang nathumwui ot sāra, kha kashinethang ngasāmkhuida; nathumwui mukkāla, gadhāla ngasāmkhuipaira, kala lokahaia raosha̱naowui naomayarabingla, kha̱minaola ngasāmkhuipaira.

¹³ “Ina hāngkahai saikora nganālu kala khangatei varebingwui ming masinglakalu, chili lāngda nathum khamorwui eina nilala mashāranu.

Khangachā Phanitbing

¹⁴ “Kumkhali kathum shida nathumna iwui phanit sāra.

¹⁵ Ina hāngkahai thāda khawok makazang khamui phanit sāra; hāngkahai thāda Abib kachāngwui atamli shinithang khawok makazang khamui shaira, kaja chiwui atamli nathumna Egyptwui eina shoka. Khipakha iwui mangāli pāng khamasai eina marāpaimara.

¹⁶ “Nathumna luili khayao theishiraiwui matheikhare athei chieina ngasoda māhā phanit mayonlu. “Kumpeili nathumna luiwui eina theishirai kazipkakhui tharan chumpha̱ phanit mayonlu.

¹⁷ Kumkhali kathum shida mayarnao kachiva̱na Proho Varewui mangāli rānganingra.

¹⁸ “Ili pha̱phayā khavai ashee chieina ngasoda khawok kazanga khamui machigatpaimara, lah iwui zātkhānwui athao ngathor eina tangda kahaila mahaipaimara.

¹⁹ “Nathum ngaleiwui matheikhare athei chi nathumwui Proho Varewui shimli khuirāra. “Nathumna yaonao awui ava̱wui na̱ra̱ eina mahangshaipaimana.

Israelnaobingli Thānkhavai Kazingrao

²⁰ “Yanglu, ina ngarānmi kahai apam chili nathumli thānvāmi khavai kala mayonmi khavai nathumwui mangāli ina kazingrao akha chihora.

²¹ Ali nganāda awui tui khuisanglu; ali mangakaishialu; kaja ana nathumwui khayon mapheomimara kaja iwui ming ali lei.

²² Kha nathumna awui tui khuida ina kahāng chi saserakha, nathumwui yangkashe chi iwui yangkashena, nathumli khangasunga chili ina ngasungra.

²³ Iwui kazingraona nathumli thānmida Amornaobing, Hitnaobing, Periznaobing, Canaannaobing, Hivnaobing kala Jebusnaobingwui apamli vāzangda, kala ina athumli shimān ngasak kahai chitharan,

²⁴ athumwui varebingli makhorumpaimara, lah otramla mangatha̱paimara, athumwui kasā thadala masāpaimara, kha saikora chi sākazammiserhaida pākra̱ eina tangda akha̱ sāngasaklu.

²⁵ Proho nathumwui Vareli otram ngatha̱lu, ina nathumwui khamui eina tara̱li somira; kala ina nathumwui eina kazāt khuithuimihaora.

²⁶ Nathumwui pamli khipashikha nao horkahai maleimara, nao kashumla mavaimara; nathumwui mirin ina chipemmira.

²⁷ “Iwui khangachee khangachā mangāli rida chihoda nathumna ngararki kaji mibing saikorali pa̱ngapā ngasakra, kala ina yangkashebing nathumwui eina yāmngasakra.

²⁸ Kala ina nathumwui mangāli rida raipao shāngasakta Hivnao, Canaannaobing kala Hitnaobing yāmngasakra.

²⁹ Ina athumli kumkhawui alungliva makashammara, kaja ramchohaikha nathumwui vang ramsā chungnahaora.

³⁰ Nathumna chungsang mamānda lam chi makhuingakānranglakha eina tangda teomamei eina kasham mamānra.

³¹ Kala nathumwui thari Red Sea eina thuilaga Philistinewui ngayi vāshungda, kala lamhāng eina thuilaga Euphrates eina tangda sāra; kaja lam chiwui mibing nathumwui pāngli horsangmihaida nathumna kashamshokhaora.

³² Nathumna athumli nilala, athumwui varebingli nilala tuingashit masāpaimara.

³³ Athum nathumwui ngaleili mapampaimara, kaja athumna nathumli morei sāngasakpaishina; nathumna athumwui varebingli otram ngatha̱akha, kachangkhat eina chi nathumwui vang khalen ngasāra.”