SHONGZĀ 22 - Kathara Bible (BSI)

Kharunwui Ain

¹ “Mi akhana mukkā nilala, yao nilala leekhuida shaothathailala, yorhailala, mukkā akhawui vang mukkā phangā, yao akhawui vang yao mati khale china runra. Runphalungra, khikha makhalei miakha ali yorhaora.

² Leekakhui sei nilala, gadhā nilala, yao nilala kharing eina awui pāngli leisakha khale china aman akhashida mataida runkāra.

³ Khale akhana shim shaokhaizangda ali tukkhuida shaoda thihaiakha, ashee katāwui shongrān maleimana;

⁴ kha chi zimik shoknamhaikha, ashee chiwui vang shongrān leira.

⁵ “Mi akhana khangateiwui luili nilala, drakhā yāmguili nilala, sei hompamakha, lah chihohaida mi khangateiwui lui ashaimihaiakha, awui luiwui kala drakhā yāmguiwui athei mathāmeikap kaji chieina runra.

⁶ “Mei sa̱laga maithuihaida zātshim nilala, māthei nilala, lah lui nilala chuitāmihaiakha mei kasa̱pa china runserphalungra.

⁷ “Mi akhana khongnainaoli pheisā nilala, ot nilala haimi ngasakta khongnaipawui shim eina leethuihaiakha, kala khalepa chi kalikha tukkhuihaiakha, khalepa china akha mataisanglaga runra.

⁸ Kha kalikha khalepa chi matukkhuirarakha shimva̱ china khongnaipa chiwui ot chili apāng saza̱ya, masāza̱mana kaji theikhavai Varewui mangali vāra.

⁹ “Shitkasang vātngarokta, mukkā nilala, gadhā nilala, yaonilala, kashankachon nilala, maningakha ot katei shimān kahaiwui vang, akhana ‘Hi iwuina,’ jiakha khaniniwui tuishot chi Varewui mangāli khuirāra; kala Varena khayon khamipa china ali akhashida mataida runra.

¹⁰ “Mi akhana gadhā nilala, mukkā nilala, yao nilala lah sha̱kei khangatei nilala khongnaiwuili haisālaga kathi, lah khamā kaza̱, kala khipānakha matheila homthuimihaiakha,

¹¹ ot chili pāng masāza̱mana kaji theikhavai Prohowui mangāli khanini shākhi sāra; kala akhavāpa china shākhi kasā chi mayāda khikha marunmara.

¹² Kha kalikhada awui pāng eina leethuihaiakha akhavāli aman runra.

¹³ Kalikhada sāna shaimihaiakha theikhui khavai angun khuiungchitheira; kala shaimi kahai chiwui vang khikha marunmara.

¹⁴ “Kalikhada mi akhana khongnainaowui sha̱kei khuisālaga akhavā mazangla khamā kaza̱ kala kathi kathā shokhaiakha, ana aman peichaoda runra.

¹⁵ Kalikhada akhavāla ngasosākha, marunmara; kalikhada chi khamasā ngasāsākha, khamasā chiwui aman mira.

Acham-aram eina Dharmawui Ainbing

¹⁶ “Kalikhada shakzā khavai mangamārang kaji kachingva̱ sha̱naoli mi akhana ngasopimihaiakha, manho milaga ali apreiva̱ sāngasakra.

¹⁷ Kalikhada ngalava̱ shāvāna mamiphalungmara jihaiakha kachingva̱ ngalānao akhawui manholi ngaraikacha pheisā miphalungra.

¹⁸ “Nathumna laivā kasā sha̱naoli maokthui ngasakpaimara.

¹⁹ “Sāli phasā khangaso mili shaothatphalungra.

²⁰ “Proho maningla vare khangateili pha̱kaphayā mili zakshilāk eina shimān ngasakra.

²¹ “Kha̱mili khayon ot masāpaimana, lah marekharekpaimana, kaja nathumla Egypt ngaleili kha̱mi sāsai.

²² Ra̱meinaoli lah marānaoli marekharekpaimana;

²³ nathumna athumli chotngasakta ili athumna ngakaoakha ina athumwui khangakao chi shāmilakra;

²⁴ iwui malungkhavāt mei thada chuida ina nathumli raighai eina sāthathaida napreiva̱ ngarā ra̱meihaora, kala nanao ngarā marāhaora.

²⁵ “Nathumwui ngachaili nathumli ngasokapama iwui mi kachāmbingli lupā shināmakha, athumle kashinām thāda masāpaimara, athumwui eina atar makhuipaimara.

²⁶ Kalikhada nawui khongnainaowui kachon hamda khuilala zimik matunranglakha hanmihaolu;

²⁷ Kaja nawui khongnaipa chiwui fasang khavai kachon chimāng sāsāpai; mipa china khangatei khi fapirakhala? Kala nawui khongnaipa china ili ngakaoakha, chi ina shāmira, kaja iya lumashankathana.

²⁸ “Nathumna Vareli mamashātpaimana kala nathumwui khamungalila makhonshipaimara.

²⁹ “Nawui mā khamin tharan kala athei-arai minda phākakhui tharan kachigat mahuipaimara. “Naomayara naochizai ili miphalungra.

³⁰ Chi tākam eina seila, yaola: shinithang ava̱li ngasopam ngasakra; kachishata thang nathumna ili miphalungra.

³¹ “Nathum iwui vang tharchigat kahai mi sāra; chiwui vang eina khararli sāna sāthat kahai khazursā mashaipaimana, fali hormihaolu.