SHONGZĀ 20 - Kathara Bible (BSI)

Ningkhami Tharā

¹ Kala Varena tui saikora hi hānga,

² “Egypt ngalei, narkahai shimwui eina nathumli thānshokkhame Proho nathumwui Vare chi ina.

³ “I maningla vare katei maleimana,

⁴ “Nathumna nathum khalattawui vang rukkakhuia ama̱ lah atungshong kazingramlila, azingshong okathuilila, okathuiwui azingli khalei lah ngayili khalei otli khangamāna ama̱ masakhuipaimara;

⁵ athumli khayāmashipaimara lah makhorumpaimara; khikhalajila Proho nathumwui Vare iya mikpaikashe Varena, ili ningkakachaiali avāva̱ ngarāwui naongarāli naothot kakathuma kala khamate eina tangda tandi khame,

⁶ kha ili leishida ningkhami saikora khamayonabing thingthingli makhangachei leikashi chitheikhamena.

⁷ “Leimamāngli Proho nawui Varewui ming masingpaimana; kaja Prohona awui aming leimamangli kasinga chili mayonmana majimara.

⁸ “Sabbath zimiksho mamalaihaila tharda mayonlu.

⁹ Tharukthang nathumna yāng chishotta nathumwui ot saikora sāra;

¹⁰ kha kashinethang Proho nathumwui Varewui sabbathna; chithang nala, nanaomayarala, nanaongalava̱la, rao mayarnaola, rao sha̱naola, sha̱keila, kha̱lungli khalei kha̱mi saikora ot akhala masāmara;

¹¹ khikhalajila Prohona tharukthangwui alungli kazingram, kala okathui, ngayi kala chiwui alungli khalei saikora sai, kha kashinethang ngasāmkhui; chieina Prohona sabbaththang somida tharchikata.

¹² “Nava̱ navāli khayāshilu, chithākha Proho nathumwui Varena khami ram chili okpeira.

¹³ “Mi mashaothatpaimana.

¹⁴ “Maphophāpaimana.

¹⁵ “Maleepaimana.

¹⁶ “Nawui khongnainaoli makhamayāwui mikhanam shakhi masāpaimana.

¹⁷ “Nawui khongnaiwui shim maningchangpaimana; nawui khongnaiwui preiva̱, awui rao mayarnao, rao sha̱nao, mukkā, gadhā, awui khaleilei maningchāngpaimana.”

Mibingwui Khangachee

¹⁸ Kazing khangashum kala talla̱khon kashā eina kala rikhān ngasheida phungreili meikhut kashok chi kathei eina mibingna ngacheehaida kathirhaowa; kala khalāda nganinga,

¹⁹ kala Mosesli hānga, “Nana ithumli hānglu, ithum nganāra; kha Varena ithumli mamatuiaranu, ithum thihaipaishina.”

²⁰ Mosesna mibingli hānga, “Mangacheealu, kaja Varena nathumli chithei khavai rāhaira, chieina Vareli khangachee chi nathumwui leida chieina nathumn morei masāmara.”

²¹ Kala Varena khaleipam muiyā kashāli Mosesna vānganaiya, kha mibingna khalāda nganinga.

Hanphutwui Ain

²² Prohona Mosesli hānga, “Israelnaobingli hithāda hānglu: ‘Ina kazingramwui eina nathumli khangazek nathum khalattana theihaira.

²³ Ili ngasopam khavai nathumna lupāsāwui meoma̱ masākhuipaimana, lah nathum khalattana sināwui meoma̱la masākhuipaimna.

²⁴ Ngalei eina hanphut akha sākhuilaga nathumna chili rikkatā hanphut kala ningyatchigat sāra, yaola, seila pha̱phayāra; kala ina iwui ming theingasakta phaningung ngasakkhangai apam kachida ina nathumli rāda somichingra.

²⁵ Iwui vang nathumna ngalungwui hanphut saakha shankakhui ngalung eina masāpaimara; kaja ngalungtungli nathumwui khutlai sanghaiakha nathumna sāmakhaohaora.

²⁶ Kala nathumna iwui hanphutli chonchak eina makāpaimana, nathumwui khamahong theipaishina.’”