SHONGZĀ 19 - Kathara Bible (BSI)

Sinai Kaphungli Kapam

¹ Israelnaobingna Egypt ngaleiwui eina shokta chāngwok kakathumawui kharethang athumna Sinai kaphungli vāshunga.

² Athumna Rephidimwui eina zatta Sinai lamhāngli vākashung eina, athumna lamhāngli angasāma, phungreiwui mangāshong Israelnaobingna angasāma.

³ Kala Mosesna Vareli samphang khavai kai, kala Prohona phungreiwui eina ali hoda hānga, “Nana Jacob shimkhurli kala Israelnaobingli hithāda hāngra:

⁴ Egyptnaobingli ina kasā, kaja khalāngwui angachāng eina ina nathumli kathāda phungzat kala kathāda iwuili khuirākhala kaji chi nathumna theihaira.

⁵ Chiwui vang eina ara iwui tui nganāda iwui tuingashit mayonakha, miyur saikorawui ngachaili nathum iwui mi sāra, kaja okathui hi iwuisera,

⁶ kala iwui vang nathum pāngmonwui wungram kala kathara yur sāra. Israelnaobingli nana hāngki kaji tui chi hina.”

⁷ Chieina Mosesna rāda ararbingli hokhuilaga, Prohona ali kahāng tui saikora chi athumli hāngchithei.

⁸ Kala mibing saikorana khokkha sāda ngahānkāda hānga, “Prohona hāngkahai tui saikora ithumna sāra.” Kala Mosesna mibingwui tui chi Proholi hānga.

⁹ Chiwui thili Prohona Mosesli hānga, “Yanglu ina nali khangazek chi mibingna shākhavai kala mirin peida nali shitsang khavai ina muiyā kashā akhawui alungli rāra.” Chieina Mosesna mibingwui tui chi Proholi vāhānga.

¹⁰ Kala Prohona Mosesli hānga, “Mibingwuili vāda aja eina akhama tharchigat ngasaklu; athumwui kashankachon ngasa̱ ngasaklu;

¹¹ kala kakathumathangwui vang khangarān saserranu, kaja kakathumathang mi saikorana theikhavai Prohona Sinai Kaphungli tāra.

¹² Kala nana mibingwui vang kuimareida leirin akha khānhailaga hānglu, ‘Ningngasharlu, phungreili makāpaimara, lah leiretlila masāza̱paimara; phungreili sakaza̱a mi chili chithitra;

¹³ ali pāng masāza̱paimara, kha ngalung eina horthatra lah malā eina kapthatra; miranu, sāranu, maring ngasakmara.’ Talla̱khon panglāk eina kakhong tharan mibingna phungreili kāpaira.”

¹⁴ Chieina Mosesna phungreiwui eina tāda mibingli tharchigata; kala athumna athumwui kashankachon ngasa̱sera.

¹⁵ Kala ana mibingli hānga, “Kakathumathang chi khangarān sāserlu, sha̱nao ngalemli mavālu.”

¹⁶ Kakathumathangwui ngathor kazing ngashumda rikhān ngasheiya, kala muiyā kashā akha phungreitungli ngapuirora, kala talla̱khon panglāk eina khongda rāmrahli khalei mibing saikora kathirhaowa.

¹⁷ Chiwui thili Vareli samphang khavai Mosesna mibingli rāmrahwui eina thānvai, kala athumna phungreipheili anganinga.

¹⁸ Kala Sinai Kaphungli meikhutna ngapuiphinhaowa; kaja Prohona chiwuitungli mei eina tai; kala chiwui meikhut shālui kachui thāda kai, kala phungrei katonga nganuka.

¹⁹ Talla̱khon chi pangmamān kaji eina Mosesna matuiphoka kala Varena khangashumkhon eina ngahānkai.

²⁰ Prohona Sinai Kaphungli tai, phungreitonli tāda Mosesli phungreitonli kāluda hoi, kala Mosesna kai.

²¹ Kala Prohona Mosesli hānga, “Proholi yangkida athumna manamzang khavai zanghāngmachinlu, chi maningakha mi kachungkha thihaipaishina.

²² Kala Prohowui ngalemli rāki kaje pāngmonbing china athum khalatta tharchigatranu; chi maningakha Prohona tandi mira.”

²³ Kala Mosesna Proholi hānga, “Mibinga Sinai Kaphungli makāpaimara, kaja nakhalattana ‘Phungrei kuimareida leirin khānhaida tharchigatlu’ da hānghai dalei.”

²⁴ Prohona hānga, “Aaronli zanghokhuida kālu, kha khangatei pāngmonlapai kala mibing khipākha Proholi kākhavai manamkāpaimana; Prohona athumli tandi mipaishina.”

²⁵ Chieina Mosesna tālaga mibingli zanghānga.