SHONGZĀ 18 - Kathara Bible (BSI)

Jethrona Mosesli Akhayang

¹ Midianwui pāngmon, Moseswui awova̱ Jethrona kashoshok saikora, kaja Varena Moseswui vang kala awui mi Israelnaobingli kathāda samimamei kala Egyptwui eina kathāda thānshokmi kaji chi shai.

² Chitharan Mosesna apreiva̱ Zipporahli chithot kahaiwui thili awova̱ Jethrona, Zipporahli awui nao khani,

³ akhawui aming Gershom kaho; (kaja ana hānga, “I mi kateiwui ngaleili kapāna kha̱mi ngasāsai”),

⁴ kala akhapāli Eliezer, kaho anili (kaja ana hānga, “Ishāvāwui Vare, ili ngachonkhamena, kala Pharaohwui raighaiwui eina ili kanmi”) khuiluihaowa.

⁵ Mosesna Varewui phungreili pamda leilakha awova̱ Jethrona awui naomayara khani kala apreiva̱li thānrārāsai.

⁶ Kala mi akhana Mosesli, “Nawo Jethrona napreiva̱ eina nanaomayara khanili thānrārāda lei” da kahāng eina,

⁷ Mosesna awova̱li angarok khavai vai, ana khayākashi chitheida maya̱khui; kala ani akha eina akha khi shokmamei kaji ngazeklaga kachonshimli zanga.

⁸ Chiwui thili Prohona Pharaohli kala Egyptnaobingli Israelli khi samamei kaji saikora Mosesna awova̱li hāngsera, shongfali zatlakha kakhanang samkaphang, kala Prohona ngatangkhami saikora hāngsera.

⁹ Prohona Israelli kaphā sāmi kahai saikora, Egyptnaobingwui eina ngatangkhami saikorawui vang Jethrona mathāna.

¹⁰ Jethrona hānga, “Egyptnaobingwui eina kala Pharaohwui eina ngatangkhame Proholi soranu.

¹¹ Ara ina theihaira kaja Prohona vare kateibingli hakmeiya, khikhalajila ana mibingli Egyptnaobingna zakshilak eina kasāwui eina ngatangkhuimi.”

¹² Kala Moseswui awova̱ Jethrona Vareli rikkatā kachigat kala pha̱kaphayā akha sai, kala Aaronna Israelwui ararbing saikorali thānrāda Varewui mangāli Moseswui awova̱li phazāruma.

Bicharsamebing Kapangkasang

¹³ Akhama kathā Mosesna mibingwui bichar sāmi khavai pama, kala athumna ngathor eina thuilaga ngazin eina tangda ali kuimareida nganingpama.

¹⁴ Moseswui awova̱na ana awui mibingwui vang kasāsā chi theilaga hānga, “Mibingwui vang nana sāda khalei hi khikhala? Namāng pamlaga kateibingli ngathor eina thuilaga ngazin eina tangda nganing khangasakla?”

¹⁵ Kala Mosesna awova̱li hānga, “Kachiwui vangkhala kaja athumna ili Varewui pongli rākhangahānna,

¹⁶ athumwuili tuishot leihaiakha iwuili rāda ina athum akha eina akhawui bichar sami, ina Varewui shiyan-chikan kala ana tamchithei kahai chi athumli hāngchithei.”

¹⁷ Moseswui awova̱na ali hānga, “Nana sāda khalei hi maphāmana.

¹⁸ Na kala nali khangayur mibing hi kachangkhat eina khanangnāhaora, kaja ot hi nawui vang ritnai; namāngna masārarmara.

¹⁹ Iwui tui nganālu, ina hangchitheiga, Varena ngasomiranu! Mibingwui vang nana Varewui mangāli nganingmida athumwui tuishot chi hāngmira,

²⁰ athumli shiyan chikan tuitak kala athumna zatrān apong chi theingasaklu kala athumna khi sarānkhala kaji theingasaklu.

²¹ Kala nana mibingwui ngachaili sāshapa, Vareli khangachee mibing, shitsang kapaibing, kala pheizā kazāli ningkakachaibing, thing-thingwui, shāshāwui, hangphangā-ngāwui kala tharā-rāwui akhavā sākhavai kapangkhuilu.

²² Bichar saikora athumna sāranu, khamatataiya tuishot kachiva nawuili khuirāranu kha kapaipai athumna sāda nawui kharit ot athumna ngayarda phungrumakha nawui vang ngavengmeira.

²³ Hithāda saakha Varena mayāmida, nala khāngshapra, kala mi saikora hi athumwui shimli chingri eina latungra.”

²⁴ Awova̱wui tui khuida ana hāngkahai saikora Mosesna chithāda sai.

²⁵ Kala Israel katongawui eina kashapa mibing kapangkhuida, thing-thingwui, shāshāwui, hangphangā-ngāwui kala tharā-rāwui kathāna sāngasaka.

²⁶ Chithāda sāda atam kachida athumna mibingli bichar sāmi; kasaksakmāng Mosesli khuivai; kha kapapai athumna sāsera.

²⁷ Chiwui thili Mosesna awova̱li pākhailaga aramshong ungngasakhaowa.