SHONGZĀ 14 - Kathara Bible (BSI)

Red Sea Kakān

¹ Chiwui thili Prohona Mosesli hānga,

² “Israelnaobingli latungda, Pi-ha-hirothwui mangāli, Migdol eina ngayiwui ngachai Baal-zephon mangāli, ngasām khavai hānglu; nathumna chili kāroda ngayipheili ungngasāmra.

³ Kaja Pharaohna Israelnaobingwui pongli, ‘Lamhāngli apong maphākhuimada Israelnaobing ma̱zatta lei’ da hāngra.

⁴ Kala ina Pharaohwui wuklung mararmihaida, athumli kharomvāluira, kala Pharaohli kala awui mibingli iwui tekhamatei theingasakra, kala Egyptnaobingna I Prohona kaji theikhuira.” Kala athumna chithāda sai.

⁵ Mibing yāmhaira kaji kashā eina Egyptwui awunga Pharaohla, awui raobingla ning ngacheida hānga, “Ithumli otram khangatha̱wui eina Israelnaobingli chiho kahai hi ithumna khi kasākhala?”

⁶ Chieina ana siguigari khangarān sālaga raimi thānthuwa,

⁷ kala siguigari shātharuk kapangkhuida kala Egyptli khalei siguigari eina chiwui otva̱bingli ngasoda vāhaowa.

⁸ Kala Varena Egyptwui awunga Pharaohwui wuklung mararmihaida Israelnaobingna pinglak eina zatkahai chiwui thi kharomvai.

⁹ Pharaohwui siguibing, siguigari, sigui katongabing, raimi zangda kharomvai, kala Baal-zephon mangāli khalei Pi-ha-hiroth ngayipheili angaphankhuihaowa.

¹⁰ Pharaohna akhanganai tharan, Israelnaobingna ngashānungda Egyptnaobing rākharā chi thei, kala athum ngacheelakhaowa, kala Israelnaobingna Proholi ngakaowa,

¹¹ kala athumna Mosesli hānga, “Egyptli chikhur maleithuda lamhāngli thikhavai nana ithumli thānkashokla? Nana ithumli Egyptwui eina thānkashok hi khiwui kakhalatkhala?

¹² Egyptli leilakha, ithumna nali ‘Chimathālu, ithum Egyptli rao satha̱ra’ da kahāng chi hi maningmala? Kachiwui vangkhala kaja lamhāngli thiki kajiwui vanga Egyptnaobingli otram ngatha̱khamina phāmeiki kajina.”

¹³ Kha Mosesna mibingli hānga, “Mangacheealu, nganingshinglu, laga aja Prohona nathumli kanmiki kaji chi yanglu; kaja aja nathumna kathei Egyptnaobing hi nathum matheiluilakmara.

¹⁴ Prohona nathumwui vang ngararmira, nathum kasaikha pammalu.”

¹⁵ Prohona Mosesli hānga, “Khisāda nathumna ili ngakaokhala? Israelnaobingli mangāshong zatvā ngasaklu.

¹⁶ Kha nawui khāmshui khāngkāda ngayitungli katingvālaga ngayi chi ngayarkhaihaolu, chieina Israelnaobingna ngayilungli ngalei kathengli zatvāpaira.

¹⁷ Kala ina Egyptnaobingwui wuklung mararmihaida athumna shurzangra, chitharan Pharaoh kala awui raimi katonga, awui siguigari, kala sigui katongbing saikorawuitungli iwui tekhamatei chitheira.

¹⁸ Ina Pharaoh eina awui siguigaribing kala siguigari kathaobingwuitungli tekhamatei chithei kahai tharan Egyptnaobingna Proho chi ina kaji theikhuira.”

¹⁹ Chiwui thili Varewui kazingrao, Israelnao raimibingwui mangāli kazata china athumwui khanukshong unghaowa; kala muiyāwui pākra̱ china kaseiungda athumwui khanukli ungnganinghaowa,

²⁰ china Egyptnaobingwui raimi eina Israelnaobingwui raimi ngachaili nganinghaoda lākhashong muiyāna tangmanghaowa, lākhashong horngasakta ngayā pongda akhashila akhashili mavā ngarokmana.

²¹ Chieina Mosesna ngayivāk apāng katingvai; kala ngayā pongda Prohona kapanga zingshoshongwui masi phanngasaka, kala tara̱ chi lānmihaida ngayi thengngasaka, kala tara̱ chi ngayarkhaimihaowa.

²² Tara̱ china athumwui uishong yāshong phaklāng thāda sāmi, kala Israelwui mibingna ngayilungwui katheng chili zatvai.

²³ Egyptnaobing, Pharaohwui siguibing, siguigaribing kala katongabing saikorana athumli shamadrulungli kharomzanga.

²⁴ Ngathor kazing kathang eina muiyāwui kala meiwui pākra̱ eina Prohona Egypt katongali yangtai, kala Egypt raimi katongali pa̱ngapā ngasaka.

²⁵ Sigui gariphei ngaphumda ritnahaida mazatthukthuwa; chieina Egyptnaobingna hānga, Israelnaobingwui eina yāmusa kaja Prohona athumwui vang Egyptnaobingli ngararmida lei.

²⁶ Chiwui thili Prohona Mosesli hānga, “Egyptnaobing, athumwui siguigari, katongabing chiwuitungli tara̱ latung khavai ngayili napāng katingvālu.”

²⁷ Chieina Mosesna ngayitungli apāng katingvai, kala kazing kathang eina tara̱ chi khangachāwui thāda longunghaowa; kala Egyptnaobingna chili yāmsangda Prohona ngayilungli ngaphumthat ngasakserhaowa.

²⁸ Tara̱ hanungda siguigarila, sigui katong mila, Pharaohwui shipai ngayilungli shurkazanga katonga ngaphumhaowa, akha eina tangda mashokmana.

²⁹ Kha Israelnaobingwui vang tara̱na uishong yāshong phaklāng sāmida ngayilungli katheng eina zata.

³⁰ Chithāda sāda chithang, Egyptnaobingwui pāng eina Prohona Israelnaobingli kanmi; kala Israelnaobingna ngayipheili Egyptnaobing kathi chi thei.

³¹ Egyptnaobingwuitungli Prohona hakkhamahā ot kasā chi Israelnaobingna theilaga Proholi ngachee, kala Proho eina awui rao Mosesli shitsanga.