SHONGZĀ 10 - Kathara Bible (BSI)

Khaoh Rākhangasak

¹ Chiwui thili Prohona Mosesli hānga, “Pharaohli vālu, kaja ina iwui khudambing hi athumli chithei khavai awui wuklung, kala awui otshinabingwui wuklung marartit ngasakhaira.

² Kala I Prohona da theikhavai, ina Egyptnaobingli kathāda sānganaokhala, kala ina khi khudam chitheimameikhala kaji nanao ngarā kala ara̱-azāli hāngkhavai kasāna.”

³ Chieina Moses eina Aaronna Pharaohli vāda hānga, “Hebrewwui Proho Varena hithāda hānga, ‘Iwui mangāli nana karankha mahamsangngaimarakhala?’ Ili otram ngatha̱ khavai iwui mibingli chihohaolu.

⁴ Kaja nana iwui mibingli thuikhavai mamayākha, akhama nawui ngaleili ina khaoh rāngasakra,

⁵ kala ngalei pemhaida leimai matheimara; theina matākthatkhangakān kala luili khalei thingnā-ra̱hāla athumna shaiserhaora,

⁶ kala navā ngarā lah nawo ngarāna okathui hili rāthang eina thuida aja rāshungda athumna matheilakrang kaji khaohbingna nawui shimla, nawui otshinabingwui shimla Egypt katongawui shim pemhaora.” Chiwui thili ana ngareithuida Pharaohwui eina shokhaowa.

⁷ Pharaohwui otshinabingna ali hānga, “Mi hina ithumli karankha khalen sangfarakhala? Athumwui Proho Vareli akhorum khavai thuingasakhaolu, Egypt shimānngakan kahai hi arui eina tangda na matheikhuirangla?”

⁸ Chieina Moses eina Aaronli Pharaohwuili khuiraluishitta hānga, “Proho nathumwui Vareli akhorumulu! — kha khipālong vāra?”

⁹ Mosesna hānga, “Khararnaosan mateila, naomayarabing, naongalava̱bing, kala ithumwui yaola, seila, ngasovāserra; kaja Proho mingli ithumna phanit asaki kajina.”

¹⁰ Chieina ana anili hānga, “Ina nathumli kala nathumwui ayaonaosan eina tangda nathumli ngasovā ngasakakha Prohona ngasomiranu! Nathumwui ningli makaphā akha lei.

¹¹ Masākapai otna, mayarnaomāng akhorumlu, chi shapa.” Kala anili Pharaohwui eina kashamshokhaowa.

¹² Chieina Prohona Mosesli hānga, “Khaoh shokkhavai Egypt ngaleili napāng katingkālu, chithāda sāda theina matāktākhangakan thingnā-ra̱hā saikora shaimiserhaoranu.”

¹³ Chithāda Mosesna awui khāmshui singda Egypt ngaleili apāng khāngkakā eina Prohona zingsho masi phanrā ngasakta ngashun pongda kala chithang ngayā pongda phana; kala ngathorshong zingshoshongwui masi china khaoh phanrai.

¹⁴ Kala khaohbing chi rāda Egypt apam saikorali ngayaohaowa, chiyākha kachunga khaoh asum eina Egypt ngalei katongali rākapam chi ridala marāshokrangsai, lah naodala mashokluimara.

¹⁵ Kaja apam kachiva̱ pemhaida leimai chi zikhaowa, kala thingnā-ra̱hā, athei-arai theina matakhangakān chi athumna shaimiserhaowa, khamatek anui kashon kaho akhala mataimimana, Egypt ngalei peida thingla akharla mataimilakmana.

¹⁶ Pharaohna Moses eina Aaronli katotlak eina hokhuida hānga, “Ina Proho nathumwui Varewui mangāli, kala naniwui mangāli morei sāhaira.

¹⁷ Chiwui vang eina iwui morei akhashida pheomida, kathibing hi iwui eina khuithuimi khavai himang Proho nathumwui Vareli seihā samiluda kapona.”

¹⁸ Chiwui vang ana Pharaohwui eina shokta Proholi seihā sai.

¹⁹ Kala Prohona zingtunshongwui masi panglāk eina phanngasakta khaoh saikora Red Seali phansang ngasakserhaowa, kala Egypt ngaleili khaoh akhanidala maleilathuwa.

²⁰ Kha Prohona Pharaohwui wuklung mararmihaida Israelnaobingli machihomithuwa.

Tangkhamang Rākhangasak

²¹ Chiwui thili Prohona Mosesli hānga, “Egypt ngaleili tangmang khavai napāng kazingramshong katingkāda, tangmangtinghairanu.”

²² Chieina Mosesna kazingramli pāng katingkakā eina Egypt ngalei saikorali kathumthang tangmangtinghaowa;

²³ akha eina akha mathei ngarokrarthumana, kathumthang athumna khaleipam chiwui eina mangatha̱paithuwa; kha Israelnaobinga athumwui pamkhavai chili kahor samphanga.

²⁴ Chieina Pharaohna Mosesli hokhuida hānga, “Thuiulu, nathumwui naoshinaobingla thānvāda Proholi otram angatha̱ulu; kha nathumwui sha̱kei makhuivāpaimara.”

²⁵ Kha Mosesna hānga, “Proho Vareli pha̱phayā khavai kala rikkatā hanphut sakhavaila nana mayāmiphalungra.

²⁶ Ithumwui sha̱keila ithumli ngasovāphalungra, akha eina tangda manothapaimara, kaja ithumna ithumwui Vare Proholi chigat khavai khuivāphalungra, kaja apam chi mavāshungranglakha eina tangda khi chigatra̱khala kaji ithum matheimana.”

²⁷ Kha Prohona Pharaohwui wuklung mararmihaoda athumli machihothuwa.

²⁸ Kala Pharaohna athumli hānga, “Iwui eina thuihaolu; kala ning ngasharlu, ili marāluilakalu, izak theithang na thira.”

²⁹ Mosesna hānga, “Nana kahāng thāda ina nali nazak matheiluilakmara.”