SHONGZĀ 1 - Kathara Bible (BSI)

Israelnaobingli Egyptli Rekkakharek

¹ Jacobli ngasoda Egyptli khavā Israelwui naomayara ngarāwui shimkhur kachiva̱wui amingbing chi hina:

² Reuben, Simeon, Levi, kala Judah;

³ Issachar, Zebulun kala Benjamin;

⁴ Dan eina Naphtali, Gad eina Asher;

⁵ Jacobwui naotun katonga hangshinina; Joseph rida Egypt ngaleili vahairasai.

⁶ Khaleilaga Josephla, achinā ngarāla, kala athumwui thot saikora thiserhaowa,

⁷ kha Israelwuiwui naotunbing, athei matheida mataisanglakhaowa; athum chungkhangai chungsangda kapanga yur sathuihaowa, chieina ngalei chi athumna pemhaowa.

⁸ Chiwui thili Josephli makatheiya awunga akhana thuimunga.

⁹ Kala ana awui mibingli hānga, “Yanglu, Israelnaobing chungnāhaira, kala ithumli singyuihaira.

¹⁰ Rālu, ithumna athumli sāshilak eina sāsa, maningakha athum chungsang mamānda ithumli yangkashebingna rai rakatā tharan, athumna yangkashibingwui mijang zangda ithumli ngararda yāmshokhaowa.”

¹¹ Chiwui vang eina athum ot chotlak eina sākhavai kashina phāsanga, kala Pharaohwui lanshim keinung khani, Pithom eina Ra-amses sākhui.

¹² Kha mataimeida rekharek, chungmeida mataisang kala chungmeida ngayaovai. Kala Egyptnaobingna Israelnaobingli ngacheehaowa.

¹³ Chiwui vang Israelnaobingli chotlak eina otram ngatha̱ ngasaka,

¹⁴ kala athumwui mirin sipsālak eina sāmida chek kachanla, luiwui ot kasā saikorala, kala otpam kachida chotlak eina sāngasaka.

¹⁵ Chiwui thili Hebrew sha̱naobingwui nao khuitākhamiva̱ khani; Shiphra eina Puahli awungana hānga,

¹⁶ “Hebrew preinaona nao kapharā tharan, pharākatā chi yanglaga, mayarnaoakha sāthathaolu, kha sha̱naoakha ringngasaklu.”

¹⁷ Naosak kasingva̱ khani china Vareli khangacheewui vāng Egypt awungana kakaso athishurda masāmana, kha mayarnaobingla ringngasaka.

¹⁸ Chieina Egyptwui awungana anili hokhuida hānga, “Khisāda angangnao mayarnaobingli ringkhangasakkhala?”

¹⁹ Anina Pharaohli hānga, “Kachiwui vangkhala kaja, Hebrew preinaobing hiya Egypt preinao mathāmana, athuma yāng kāhaida naosak kasingbing marāranglakha pharāhairasāsā ji.”

²⁰ Chithāda Varena naosak kasingbing chili ngasomi, kala mibing mataisangda panglākhaowa.

²¹ Kala naosak kasingbing china Vareli khangacheewui vāng athumwui shimkhurla mataisang ngasaka.

²² Chiwui thili Pharaohna awui mi saikorali kasoi, “Hebrew shimkhurli kapharā mayarnao saikora Nile kongli horsanghaolu, kha sha̱naobinga ringranu.”