RUTH 4 - Kathara Bible (BSI)

Boazna Ruthli Khangakum

¹ Kala Boazna ngaveishong shokta chili apamzanga; kala yanglu, ana kahānga shimluikat khuirānpa chi rārāsai. Chieina Boazna, “Ngasāmkhuilu, ngasotnao, hishong rāpamlu” da hānga; kala ana chivāk vāda apama.

² Kala ana konung chiwui khararnao tharāli hokhuida athumli hānga, “Hili rāpamzanglu,” kala athumna apamzanga.

³ Chieina ana shimluikatpa chili hānga, “Moab ngaleiwui eina latkhaungva̱ Naomina, ishi theisā Elimelechwui lam akha yorda lei.

⁴ Ina nali hi hāngrada phaningsāda kahāngna, hili pamda khaleibing kala iwui mibing ararbingwui mangāli lokhuilu. Kalikha nana makhuimara jiakha, ili hānglu, kaja nana mangatangkhuimara jiakha, nawui thili ina khuirāna kaji ina theihaora.” Chieina ana hānga, “Ina ngatangkhuira.”

⁵ Chieina Boazna hānga, “Nana Naomiwui lui lothang, Moabpava̱ rameiva̱ Ruthlila khalona, kaja kathepawui ming chi shimlui china mahut sāda leingasakki kajina.”

⁶ Chieina shimluikatpa china hānga, “Chithakha I makhuirarmara, kaja iwui shimluili saza̱paishina. Ina ngatangkhuirān chi nana khuihaolu, kaja I mangatangkhuirarmara.”

⁷ Nganingkakhui kala ngatha̱ khangarokwui shiyan, khareli Israelwui alungli hithāda sāsai: chitha ngarokhaira kaji kachithei sāda kachikā mi china awui pheihop khuishoklaga akhapali mihaiakha china Israelwui shākhi sāsai.

⁸ Chieina shimluikatpa china Boazli, “Na khuilu” da awui pheihop khuishokmida hānga.

⁹ Chiwui thili Boazna khararnaobing kala mibing saikorali hānga, “Aja Naomiwui pāng eina Elimelechwui khalalei, Chilionwui, Mahlonwui saikora ina khuihaira kaji hi nathumna shākhina.

¹⁰ Kala Mahlon preiva̱ rameiva̱ Moabpava̱ Ruthli ipreiva̱ sākhavai ina khuihaira; kaja shimlui hi kathepawui ming leiching khavai chinao ngarāwui kala kha̱wui eina makanthui khavai ina khuihaira kaji hi nathumna shākhina.”

¹¹ Chieina ngaveili leikasā mi saikora, kala khararnaobing china hānga, “Ithumna shākhina. Rachel eina Leahna ngarumda Israel shimkhur sākakā thāda, nawui shimli rāki kaje preiva̱̱ chili Prohona chithāda reisang ngasakranu. Nala Ephrathah pamli reisangda Bethlehemli aming zatranu;

¹² kala Perezwui shimkhurli Tamarna Judahli kapharā thāda Prohona khaminaobing chi ngalāva̱ hina pharākhuida nashili chikathā ngasaranu.”

Boaz Kala Awui Ara̱-azā

¹³ Chieina Boazna Ruthli khuida apreiva̱ sāhaowa; kala Prohona ali nao vaingasakta ana mayarnao akha pharai.

¹⁴ Chieina nao chi kapharā eina preinaobingna Naomili hānga, “Athei machat khavai aja eina tangda nali mahorhai kaje Proho chili sochikatlu; kala awui ming Israelli ngayaovāranu!

¹⁵ Ava nawui mirin shirinkhame kala asārlam nali ruikhame ngasāra; kaja naomayara shinili mataikhamei nali leikashiva̱ narihāna pharāmihaira.”

¹⁶ Chieina Naomina nao chi vamda ana khuipama.

¹⁷ Kala khongnai preinaobingna aming phokmida, “Naomili nao akha pharāmihaira” da hānga. Athumna ali Obed phokmi; Obed hi Davidli kapharā Jessewui avāva̱na.

¹⁸ Perezwui ara̱-azā hina: Perezna Hezronli pharai;

¹⁹ Hezronna Ramli, Ramna Amminadabli,

²⁰ Amminadabna Nashonli, Nashonna Salmonli,

²¹ Salmonna Boazli, Boazna Obedli,

²² Obedna Jesseli, kala Jessena Davidli pharai.