ROMNAO 9 - Kathara Bible (BSI)

Varewui Miyurbing

¹ Ina kahāng tui hi mashun tuina; chiya I Khristawuina da ina kahāng hi kakapik tui maningmana. Manglā Katharana mungda khalei iwui mashun-makhui hina I makapikmana kaji shākhi sai.

² Chiya iwui kakhanang hakmahālakhaowa kala kakhanang katang mavaimana,

³ kaja phasāwui pongli iwui theisābing kala ichināngarāwui phākhavai athumwui eina ili Varena khonshida Khristawui eina ngatei ngasakhaowa jilala khikha maleimana.

⁴ Athum Varena kapang kahaia miyurna: athumli Varewui naongarā sāngasakta awui tekhamateila samphang ngasaka, athumli tuingashit chi mida ainla singngasaka; khamashung khokharumla athumli lei; Varewui ngashit kahai chila athumna samphanga.

⁵ Athum mingkhamayanga Jihudi yurwui awo-ayibingwui ara̱-azāna kala Khrista hi phasāwui pongli athumwui yurna. Saikorawuitungli khamunga Vareli katang mavaila sochikatchingranu! Amen.

⁶ Israelnao saikora Varewui kapangkhui kahai maningserthuwa kajiwui vang Varewui ngashitmi kahai maungshungthura da kahāng maningmana.

⁷ Abrahamwui ara̱-azā saikora Varewui naongarāna kajila maningmana kaja Varena Abrahamli hānga, “Isaacwui naotunbingmāngli nawui ara̱-azāna da shānkhuira.”

⁸ Hiwui kakhalata Varewui naongarā maningmana, kha Varewui ngashit kahai athishurda rākashoka naongarā chi khamashunga ara̱-azāna da khui.

⁹ Ngashit kahai tui chi hina, “Angarit ungkashung tharan ina rāluishitra kala Sarahna naomayara akha samphangra.”

¹⁰ Kala himāng majimana, Rebekahnala ithumwui awo khararra Isaacwui naomayara khani pharai.

¹¹ Kha nao akhali kapangkakhui china Varewui kaphaning ungshungchao khavai sha̱nao chili Varena hithada hānga, “Khararrana khanganoli otram ngatha̱mira.”

¹² Ana hi ani mapharāranglakha kala kaphā lah kashila khikhala masālakranglakha hāngkahaina. Chieina Varewui kapangkakhui hiya otsakli khayang maningla awui kaholi pheisin sai.

¹³ Hithada kapihaida lei, “Jacobli ina leishi kha Esauli ina ningkachai.”

¹⁴ Chithākha ithumna khi hāngra? Varewuili makhamashung leilā? Maningphutmana.

¹⁵ Kaja ana Mosesli hānga, “Ina lumashankhangai chili lumashanra, leishikhangai chili leishira.”

¹⁶ Chieina hi miwui ningkachāng otsakli maleila Varewui lukhamashanli lei.

¹⁷ Kaja Kathara Lairikli Pharaohli hithada hānghai, “Iwui pangshap nawui eina theikhui khavai kaja okathui hupta iwui ming ngayao khavai khangarān chiwui vang nali awunga sākhangasakna.”

¹⁸ Hithada sāda Varena lumashankhangai chili lumashana kala wuklung makang ngasakkhangai chili makang ngasaka.

Varewui Malungkhavāt kala Lukhamashan

¹⁹ Chithākha nathum akhana ili hāngra, “Khisāda Varena mikumoli khayon phenkhala? Khipāna awui kaphaning khāmshaprakhala?”

²⁰ Kha Vareli ngahānkākashapa na khipākhala? Ngaleihamna hamkasā chili “Ili khisāda hithada sākhala?” da hangpairalā?

²¹ Ham kasaa china ngalei chi eina sākhangaingai sai, kala ngaraikachā ngalei chi eina aman kasaka kala kapaiya ham sākhui.

²² Kala Varena kasā chila hithāpapama. Varena awui malungkhavāt chishotta mibingli awui pangshap theingasakngai, kha sāshimān khavai ngarānping kahai, ana malungvāt kahai mibingli kasāngkha ningzingharingmi.

²³ Awui lukhamashan samphangda khalei, awui tekhamatei samphang ngasakkida ngarān kahai ithumli ana heirormi kahai awui khavāt makhalei tekhamatei chi chitheingai.

²⁴ Kaja ithum ana hokhui kahaibingna, Jihudibingmāngli maningla kha Gentilebingla zanga.

²⁵ Hi ana Hosea lairikli hāngkahai tuina: “Iwui mibing makhaninga chili Iwui mibing hora. Ina maleikashe yur chili Iwui Leikashe hora.

²⁶ Kala ‘Nathum iwui miyur maningmana’ da athumli kahāng apam chichang chili ‘Kharinga Varewui naongarā’ da athumli hora.”

²⁷ Isaiahna Israelwui pongli vāoshoka: “Israelwui naongarā shamadruwui situi ngayālala, athumwui ngachaili shākkahaibingmāngli huikhuira.

²⁸ Kaja Prohona okathui saikorali bichar kasā chi thaklāk eina kuphaora.”

²⁹ Kala Isaiahna marānhaikasā thada “Pangshapa Prohona ara̱-azā kateokha mahaisasi kaja ithum Sodom eina Gomarrah thāhairara.”

Israel kala Paokaphā

³⁰ Chithākha ithumna khi hāngra? Chiya khamashung khangarongli makhangahoma Gentilebingna shitkasangwui mangā eina khamashung samphanghaowa.

³¹ Israelnaobingna khamashung hi ain eina phālala chiwui athishurda masamphangmana.

³² Khisāda masamphangthu? Athumna shitkasang eina maphāla otsak eina phāhaowa. “Ngaphok khavai ngalunggui” chili athumna phei ngaphokhaowa.

³³ Kaja hithada kapihaida lei: “Yanglu, ina Zionli lunggui haihaida lei, chili mibingna phei ngaphokra, lunghār china athumli konglui ngasakra. Kha ali shitkasanga mi chili makhayak ngasakmara.”