ROMNAO 3 - Kathara Bible (BSI)

¹ Chithākha chili Jihudiwui tongkaza khi leikhala, kala ahui rimkashokwui kānkhanā khi lei?

² Kachungkha lei: Rimeikapta Varewui tui chi Jihudibingwui pāngli sangmi.

³ Kha kaikhana shitkasang ningmatongakha kathara? Athumwui mashitkasang ningmakatong china Varewui ningkatong chi shimān ngasakshapralā?

⁴ Maningphutmana! Kapi kahai thada mikumo hina khayona ngasāsālala Vareva khamashunga ngasāchingranu. “Nawui tuina nali mashung ngasakta, nali bichar kasā tharan nana yuira.”

⁵ Kha ithumwui makaphā kasā china Varewui khamashung chi theingasakta leiakha ithumna khi hāngra? Varena ithumli tandi khami chi a yona jira̱lā? (Ina hi mikumo akha thada kahāngna)

⁶ Maningphutmana! Vare khangaronga maningsi kaje ana kathada okathuili bichar sapairakhala?

⁷ Iwui makhamashung china Varewui khamashung phongshokpaiakha kala ali tekmatei ngasakpaiakha khisāda ili arui eina tangda morei phunga da phenkhala?

⁸ Chithākha khisāda “Kaphā shokkhavai makaphā sāusa majithu?” Ina hi matuiya da ili mashātta kaphena mi kaikha lei! Athumli khayon khami chi mashunga.

Khipākha Mamarongmana

⁹ Chithākha ithum Jihudibingna Gentilebingli phākhamei leilā? Maleimana, maleilākmana. Kachiwui vangkhala kaja Jihudibingla, Gentilebingla saikora morei pangshapwui azingli leisera da ina hānghaira.

¹⁰ Hithada kapihaida lei: “Khamashunga mi akhala maleimana, maleilakmana,

¹¹ theishingkakhui khipākha maleimana lah Vareli kaphā khipākha maleimana.

¹² Saikora mathuihaira; athum tongda nguihaira; khipākha kaphākasā maleimana, akha eina tangtala maleimana.”

¹³ “Athumwui chanhānva chikhurkhaluiwui thuikhanam thai; male eina kapikkhayanga, kala morchaili phara̱wui thada kathiri leiya.

¹⁴ Athumwui tuimatuili kakhā khonshāt tuina pemtinghai.

¹⁵ Athumna mi thikhavai kasāli thaklāka.

¹⁶ Athum khalaleipamli kashimān eina ringkashi shokngasaka.

¹⁷ Athumna chingrikahaiwui apong matheimana.

¹⁸ Athumwui ningli Vareli khayākashiwui khangacheela maleimana.”

¹⁹ Ara ithumna thei kaja ainli hāngkahai kachiva̱ chi ainwui azingli khaleibingwui vangna, chiya mikumona hāngkakatei maleila okathui katonga Varewui bichar kasāli zangkhavaina.

²⁰ Kachiwui vangkhala kaja ainwui otsak china mikumo khipālikha Varewui mangāli mashungkhami maleimana. Ainwui eina kashok chiya mikumona morei sāhaira da theikhui khangasakmanga.

Varena Mikumoli Mashungkhami

²¹ Kha ara Varena mikumoli mashungkhamiwui apong chi phongmihaira. Ain eina marānbingnala chili shākhi mihaisālala chi ainwui eina ngateihanghai.

²² Varena mikumoli mashungkhami hi Jishu Khristali shitkasangwui mangā einana. Jishu Khristali shitkasang mi saikorali Varena chithada sāmi, khikhalajila chili khikha khangatei akhala maleimana.

²³ Mi saikora morei sāserhaoda Varewui tekhamatei chili makāshungmana.

²⁴ Kha Varewui lukhamashan lemmet chiwui athishurda Jishu Khristana ngatangkhamiwui mangā eina athumli mashungmihaira.

²⁵ Mikumowui morei chi shitkasangwui mangā eina pheomi khavai Varena Jishu Khristali pha̱mi. Hi Varewui khamashung-khangarong chithei khavaiwui vangna.

²⁶ Ridava ana ja̱mida athumwui moreila yangkheimisai, kha ara a khamashung-khangarongana da chithei khavai morei chila mayangkheimimana. Hithada sāda Vare amāngna khamashungana kala Jishuli shitkasanga mi kachiva̱li ana mashungmi kaji chitheimi.

²⁷ Chithākha ithumna khi langso khavai leili? Khikha maleilakmana. Khisāda? Ain khamayonwui vangla maningmana, kha shitkasangwui vangna.

²⁸ Kachiwui vangkhala kaja mi akhali mashungkhami hi ain khamayon eina maningla shitkasangwui vangna kaji ithumna thei.

²⁹ Chi maningakha Vare hi Jihudiwui vangmāngmalā? A Gentilebingwui Vare maningthulā? Mha, ā Gentilebingwui Varena.

³⁰ Vare akhamaya, chieina Jihudibingli athumwui shitkasangwui mangā eina mashungmira.

³¹ Chithākha shitsanghaowada ain hi maleiluimana jirala? Chila maningmana. Ainla singpapamda lei.