ROMNAO 16 - Kathara Bible (BSI)

Paulwui Khanaowa Tui

¹ Cenchreaewui churchli deacon kasava̱ ithumwui azarva̱ Phoebe hi khamathā sha̱nao akhana da nathumli chitheingai.

² Katharabingli sāmikhangayi thada Prohowui mingli ali ngarokkhuilu, kala nathumna ali ngachonkapai chi ngachonmilu, kaja ana kachungkhali ngachonmihaira, ilila ngachonmihaira.

³ Khrista Jishuwui vang otram ngatha̱kharuma Priscilla eina Aquilali iwui shālam hāngmilu.

⁴ Anina iwui vang manglā hamda ngachonmi. Anili ningshilaka, imāngna majila kha Gentilebingwui churchbingnala ningshisera.

⁵ Aniwui shimli kazip khangaruma churchlila shālam mili. Asia ngaleili Khristali shitsangkhare iwui leikashiya ngasotnao Epaenetusli shālam mili.

⁶ Nathumwui vang eina panglāk eina ot kasava̱ Maryli shālam mili.

⁷ Ili phātop zangkharuma iyur Andrionicus eina Juniasli shālam mili; ani paokazatbingwui ngachaili maholaka kala ili anina Khristali samphangriya.

⁸ Prohowui lungli iwui khamashita Ampliatuslila shālam mili.

⁹ Khristawui mingli otsakruma Urbanus eina iwui khamashita Stachylila shālam mili.

¹⁰ Khristali ningkatum chithei kahaiya Apellesli shālam mili. Aristobulusshi shimkhurwui mi saikoralila shālam mili.

¹¹ Iyurwui mi Herodion eina Narcisusshi shimkhur Khristali khuisang kahai ngasotnaobingli shālam mili.

¹² Prohowui otram khangatha̱li kazanga Tryphaena eina Tryphosa kala Prohowui vang otram tarākha ngatha̱me iwui khamashita Persislonglila shālam mili.

¹³ Prohowui ot kasāli nganingshing kahai Rufus eina ili nao thada kasā ava̱va̱li iwui shālam mili.

¹⁴ Asyncritus, Phlegon, Hermes, Patrobas, Hermas kala athumli ngasokapam ngasotnao saikorali shālam mili.

¹⁵ Philologus eina Julia, Nereus eina azarva̱ kala Olympas athumli ngasokapam katharabing saikorali shālam mili.

¹⁶ Nathum akha eina akha leishi ngarokta pāngla ngasinkhui ngaroklu. Khristawui church saikorana nathumli shālam mili.

Khamachin

¹⁷ Ivānaongarā, ina pokhangai hina, sākakhayāngbingli kala nathumli tamchithei kahai chi mashurla khangatei tamchitheida shitkasang mashongachei ngasakta khalei mibing chili ningngasharlu. Athumli mangasoalu.

¹⁸ Kaja hithada kasā athum chiya Khristawui otram khangatha̱ maningla paiphonwui vang ot kasāna, athumwui kashim tui kala sotkhamasao akhon eina matheithangkhameibingli yonngasaka.

¹⁹ Nathumna paokaphāli singtit kajiwui pao shāhaira, kala hiwui vang ina ringphai. Nathumli kaphāwui apongli thangkhamei kala zakkashiwui apongli mangkhama̱ ngasā ngasakngai.

²⁰ Chingri kahaiwui ura̱ Vare china Satanli nathumwui phei eina naikazam ngasakhaora. Ithumwui Jishu Khristawui lukhamashan chi nathumli leichingranu.

²¹ Ili otsakruma Timothyna nathumli shālam mili; kala iyur Lucius, Jason kala Sosipater athumnala shālam mili.

²² Chithi hi kapikhame Tertius ininala Prohowui mingli shālam mili.

²³ Churchna kaziprumching kaje iwui shimva̱ Gaiusna shālam mili, keinung hiwui lanse Erastus eina ichinā Quartusnala shālam mili.

²⁴ Ithumwui Proho Jishu Khristawui lukhamashan chi nathumli leichingranu. Amen.

Khanaowa Masot Kachikatwui Seihā

²⁵ Ithum Vareli tekkmatei ngasaksa! Ina hākashoka paokaphā Jishu Khristawui chānpao athishurda kala achālakhawui eina ngathumhaikasā khamashung chi phongmi kahai athishurda Varena nathumwui shitkasang pheisin ngatar ngasakshapa.

²⁶ Kha marānbingna kapi kahai chiwui eina khamashung chi theingasakhaira, chiwui vang eina yur saikorana ali shitsang khavai kala kahāng nganā khavaina.

²⁷ Khristawui mangā eina theivāser kaje Vare mingli tekkmateimeiranu. Amen.