ROMNAO 14 - Kathara Bible (BSI)

Nachināli Bichar Masālu

¹ Shitkasang khangazanali ngakuikhuilu, kala awui theikakhuiwui pongli mangayātalu.

² Mi akhanava shaiphāphāpai da phaninglapai, kha shitkasang khangazana chiya hanthing-hanrāmāng shai.

³ Kashaiya china makashaiya chili mamana̱shiaranu kala makashaiya china kashaiwuitungli mamashātaranu. Kaja Varena alila mayā kahaina.

⁴ Na khipāda akhavā khangateiwui raoli bichar kasākhala? Awui ot ungkashung maungkashung bichar saki kaje chiya rao chiwui akhavāmānga kala rao china nganingshapra, khiwui vangkhala jilaga Prohona ali nganingshap ngasakshapa.

⁵ Mi akhana kachikathā zimiksho akhaliva khangatei zimiksho akhana phameiya da phaninglapai kala khangatei akhanala zimiksho katonga ngaraichāsera da phaninga. Chiwui vang eina mi kachiva̱na kachichāwui ningli theishingkakhui leiphalungra.

⁶ Kachikathā mina kachikathā zimiksho akhali saklak eina kaphaning chi Proholi khayākashina, kaja kachikathāna shaiser kaji chi Proholi khayākashiwui vangna, khikhalajila ana kashakazāwui vang Vareli ningkashi mi. Kachikathāna mashai-mashakphāphā kajila Proholi khayākashiwui vangna, anala Vareli ningkashi mi.

⁷ Ithum khipākha khalattawui vang kharing maningmana, khipākha khalattawui vang kathi maningmana.

⁸ Ithumna ringlala Prohowui vang kharingna; kala thilala Prohowui vang kathina. Chithākha thilala ringlala ithum Prohowuina,

⁹ kaja Khristana kharing kala kathiwui Proho sākhavai thimi kala ringluishita.

¹⁰ Nachināwuitungli khisāda bichar sākhala? Khisāda mana̱shikhala? Ithum Varewui bichar sākhavai karotli kānganingsera.

¹¹ Hithada kapihaida lei; “Prohona hānga, ina ringda khaleiwui vang mi kachiva̱ khuktida ili khorumra, kala I Varelaka da yur kachiva̱na hāngphatra.”

¹² Chieina ithum ichichāna sākahai chi Vareli chitheira.

Nachināli Morei Masā ngasakalu

¹³ Chithākha ithum akhana akhawuitungli bichar masā ngarokluisa. Kha achinā akhali phei mangaphok khavai lah moreili matāzang khavai sāthusa.

¹⁴ Ina Proho Jishuli khangashik eina makathar kashakazā maleimana kaji theishingkhui ngasaka, kha kashakazā chi matharmana da phaninghaiakha awui vanga makathar ngasāhaowa.

¹⁵ Nawui kashakazāna nachināli ning saza̱ ngasakakha leikashiwui otsak maningmana. Khristana thimi kahai mi chili nawui kashakazā china mashimān ngasakalu.

¹⁶ Nana phai da kasā chili shāt makā ngasaklu,

¹⁷ kaja Vare wungram hiliva kashaikashakna akachanga maningmana, kha Manglā Katharana khami khamashung-khangarong, chingri kahai kala ringkaphā china,

¹⁸ kala kachikathāna hi tākam eina Khristali otram ngatha̱khami tharan Vareli ningyāng ungngasaka kala mikumonala mayai.

¹⁹ Chithākha ithumna chingrihai khavai otsak kala reisang khavai apong chili kharom ngarokphalungra,

²⁰ kashakazāwui vang eina Varena sākahai chi mashimān ngasaklu. Kashakazā saikora zāpaisera, kha awui kashaikashak china kachikathā akhali moreili tāzang khavai leiakha chi khayonna.

²¹ Khamashunga otsak chiya: nachinā ngarā konglui khavai leiakha sā makashai, zamkhor makhamang mashunga.

²² Hiwui apongli nawui shitkasang chi Vare naniwui ngachaili hailu, kachikathā ot akha kasāli mashunga da theishingkhuilaga ningkakashak maleilakla kasā mi chili ringkaphā ngasāranu.

²³ Ningmaongda zākasang chi khayonna, kaja shitkasang eina kasā maningmana. Shitkasangwui eina makashok otsak ayāyāva̱ moreina.