ROMNAO 11 - Kathara Bible (BSI)

Israelli Varewui Lukhamashan

¹ Chieina ina ngahāna, “Varena awui miyurli horhairalā?” Maningphutmana! Ila Abrahamwui ara̱-azā, Benjaminshi shangnaona.

² Varena rida kapang kahai awui miyurli mahorhaimana, kathara lairikli Elijahna Israelwuitungli mamayāmada Varewui mangāli kahāng chi nathumna thei.

³ “Proho nawui marānbingli athumna sāthathaira kala nawui hanphutpam sākhaihaira, ara imang leili kala ilila sāthat khavai ngarānchinga.”

⁴ Varena ali khi ngahānkākhala? “Ina Baal kameoli makhokharuma mi thingshini iwui vang kaziphaida lei.”

⁵ Chi tākam eina aruila Varewui lukhamashan eina kapang kahaia kānglup kateowa akha lei.

⁶ Kaja Varewui kapangkakhui hi miwui otsakli khayangna jisi kaja awui lukhamashan chi khamashunga lukhamashan maningmana.

⁷ Chithākha khida? Israelnaobing athumna phākazat chi masamphangmana. Chiya, Varena kapang kahai kateowa kānglup china samkaphangna; kha khangateibing chiya khanā khangakhok thāhaowa.

⁸ Hithada kapihaida lei: “Varena athumli aja eina tangda ningmakashok manglā, yanglala makathei mik, nganālala makasha khanā mi.”

⁹ Davidna hānga. “Athumwui zātkhān chi khalen ngasāda athum manranu; chom kala tandi ngasāranu!

¹⁰ Mathei khavai athumwui mik ngapeohaoranu, athumwui khumkhor kaogada leichingranu.”

¹¹ Chieina ina ngahāna, athum phei ngaphokta kongluihaola? Maningphutmana! Athumna morei sāhaoda Jihudibingli mik mathak ngasak khavai huikhami chi Gentilebingli mihaowa.

¹² Jihudiwui moreiwui vang okathuina sokhami chungmeida samphanga kala athumwui manglārin khangazanwui vang Gentilebingli sokhami tarākha samphang ngasaka. Chithākha Jihudi katonga ungzanghaosi kaja sokhami kayākha mataimeirali!

Gentilebingli Huikhami

¹³ Ara ina Gentilebing nathumli kahāngna: Ina Gentilebingwui paokazata sāda leilakha eina tangda iwui ot hi maiyārong eina sāra.

¹⁴ Kaja ina ot kasā eina iwui yurwui mibingna mik mathakhaolapai kha otsak chieina athum kaikhali Varena huikhuipai.

¹⁵ Athumli horkahai tharan Varewui yangkashe sākasā Gentilebingna awui khamashita ngasāhaowa, chithākha Varena athumli khuikasang tharan khi ngasāra! Kathebingna ringkhaluiwui ringkaphā thāhaora.

¹⁶ Khamui akai khare chi Vareli chigatakha, khamui ahāng katonga chila awuina, kala thingrongwui angayung chi Vareli chigatakha aphāng saikorala awuina.

¹⁷ Lingsang kahai oliverongwui aphāng tektāhaiakha khararwui oliverongwui aphāng khuilaga phonkhui. Gentile nathum chi khararwui Oliverong kathāna kala ara nathumna Jihudibingwui khamaling manglārin chi samphangrumda lei.

¹⁸ Chiwui vang eina nathumna aphāng thada tektā kahaibing chili machipatalu. Nathum kathada langsopairakhala? Nathumva aphāngmaya, nathumna angayung chi ringkhangasak maningmana, kha angayungna nathumli ringkhangasakna.

¹⁹ Kha nathumna hāngra, “Mha, I phonpai khavai aphāng chi tektā kahaina.”

²⁰ Chi mashunga. Athumna mashitsangthuda tektāhaowa kala nathumva shitsanghaoda makhangacheina kajiwui vang malangsoalu kha ningngasharlu.

²¹ Varena aphāng akachanga Jihudibing eina tangtalila mashivāmakha nathumle shivāmra da phaninglā?

²² Hili Vare hiya kayākha lumashankatha kala sākashekhala kaji ithumna thei, chiya konglui kahaibingli sāshilaka, kha nathumna awui lukhamashanli ngasāmakha lumashanmi; chi mathaakha nathumlila katathaora.

²³ Kala Jihudibingna athumwui mashitkasang chi horhaiakha, athumwui pamli unglui ngasakpapamra, kaja chi Varena sāshapa.

²⁴ Gentile nathumva tektā kahai khararwui olive aphāng kathāna kala akachanga Oliverongli phonkasangna. Jihudibing hi lingkakhuiya Oliverong kathāna, chieina tektā kahaia Jihudiwui aphāngbing kharewui thingrongli ungphonkida Varewui vang paimeikhara.

Varewui Lukhamashan

²⁵ Nathum khalatta thangmeiya da kaphaning chi maphaning khavai ngathum kahai mashun tui ina chitheingaiya kaja Gentilebing marāzangseranglakha eina tangda Israel kaikhali ning makang ngasak kahaina.

²⁶ Hithada sāda Israel katongali huikhuihaora. Hithada kapihaida lei: “Huikhame chi Zionwui eina shokra. Kala Jacobwui ara̱-azāwui eina makaphā-makhayā saikora khuishokmihaora.

²⁷ Ina athumwui morei pheomi kahai eina, athumli tuingashit hi sāra.”

²⁸ Jihudibingna paokaphā khalan kahaiwui vang Varena Gentilebingli yanghaoda athum Varewui yangkashe ngasāhaowa. Kha Varena athumli kapangkakhui ngasāhaoda, athumwui awo-ayibingwui vang eina athum Varewui leikashebingna.

²⁹ Kaja Varewui sokhami kala kaho hiya mangacheiluimana.

³⁰ Gentile nathum achālakha Varewui kahāng manganāsāmana, kha ara Jihudibingna kahāng makhanganāwui vang eina nathum Varewui lukhamashan samphanghaira.

³¹ Nathumna lukhamashan samkaphang chi tākam eina Jihudibingnala chikathā chi samphangpai khavai, ara athumla Varewui kahāng manganāthura.

³² Kaja mi saikorali lukhamashan chithei khavai Varena athum saikorali kahāng makhanganāwui rao sāngasakhaira.

Vareli Masot Kachikat

³³ Vare kayākha shāngmataikhala? Awui thangkhamei kala awor kayākha thukkhala? Khipāna awui bichar meikhaishapkhala?

³⁴ Hithada kapihaida lei: “Khipāna Prohowui ning thei? Khipāna ali hāngmachinshap?

³⁵ Varena run khavai, khipāna ali ot ngaronhairakhala?”

³⁶ Kaja ot saikora ana kasāna kala awui mangā eina khaleina, kala awui vang khaleisera. Vareli katang mavaila tekmateichingranu. Amen.