ROMNAO 1 - Kathara Bible (BSI)

Shālam Tui

¹ Varena awui paokaphā hashok khavai hokhui kahaia rao Paulna kachiphun chithina.

² Kathara lairikbingli kapi kahai thada Varena achālakhawui eina awui marānbingli paokaphā hi hāshok khavai ngashitmihaira.

³ Tui hi awui Naomayara ithumwui Proho Jishu Khristawui aponglina. Mikumowuishong einava a Davidwui ara̱-azāna.

⁴ Varewui tharkhamathengshong einava kathiwui eina ringkashokwui vang ali pangshap khaleia Varewui Naomayara ngasā ngasaka.

⁵ Miyur saikorali shitkasang kala kahāng khanganāli thānsangmi khavai Khristawui mingwui vang awui mangā eina ili paokazata akha sāngasaka.

⁶ Hi Khristawui ngasā khavai Varena hokakhuili zangkahai Romeli khalei nathumla zanga.

⁷ Kathara mi sākhavai hokhui kahaiya Varena leikashe Romeli khaleiya nathum saikorali kagapina: Ithumwui Avāva̱ Varivara kala Proho Jishu Khristana nathumli lukhamashan kala chingri kahai miranu.

Ningkashiwui Seihā Kasā

⁸ Rimeikapta, nathum saikorawui vang Jishu Khristawui mangā eina iwui Vareli ningshiya, kachiwui vangkhala kaja nathumwui shitkasang chi okathui katongali ngayaovāhaira.

⁹ Anaomayarawui paokaphāwui vang ina ningtonglak eina otram khangatha̱ hi Varena shākhina. Iwui seihā kasā kachiva̱li nathumli khamalai masāla phaningungchinga kaji hila Varena thei.

¹⁰ Ara nathumli rāsamphangpai khavai Varena ngarānmira kaji hi iwui kapona.

¹¹ Kaja manglāwui sokhamili ngarum khavai kala manglārin makangmei khavai nathumli samphangngailaka.

¹² Khikhalajila iwui shitkasangna nathumli kala nathumwui shitkasangna ili pangmei khavai akhana akhali ngachonmi ngarokra kajina.

¹³ Ivānao ngarā, ina nathumli theingasakkhangaina kaja ina Gentilebingwui eina athei samkaphang thada nathumwui einala samphang khavai nathumli rākida tarākhashida khangarān sai, kha ili masākapai leichinghaowa.

¹⁴ Greekbinglila, makhaningbinglila, thangkhameibinglila, khaninili ina samikhangayi kachungkha lei.

¹⁵ Chiwui vang eina Romeli khalei nathumlila paokaphā hi hāshokngailak eina khaleina.

Paokaphāwui Pangshap

¹⁶ Ina paokaphāwui vang makhayakmana, khikhalajila hi shitkasanga mi kachiva̱li, rimeikapta Jihudibingli kala Gentilebinglila huimi khavai Varewui pangshapna.

¹⁷ Kaja, Varivarana mikumoli kathada mashungmikhala kaji hi pao khamathāna phongmi: hi khare eina thuilaga khanao eina tangda shitkasang mangā einana. Hithada kapihaida lei, “Shitkasangwui mangā eina khangaronga ā chi ringra.”

Mikumowui Khayon

¹⁸ Mikumowui makaphā-makhayā kala morei saikora china khamashung chi mathei ngasakthuwa, chiwui vang kazingramwui eina Varewui malungkhavāt phongshoka.

¹⁹ Khikhalajila Varewui pongli theikhuiki kaji hi athumwui vang kasak maleimana, kachiwui vangkhala kaja chi Varena athumli chitheimihaira.

²⁰ Okathui kasā eina thuilaga Varewui matheikharar magunbing, awui katang makhavai pangshap eina tharkhamathengwui khangachā chi ana semkahai otbing chiwui eina mibingna tharzā eina theihaira. Chiwui vang eina athumna phayatkhui khavai apong katei maleiluimana.

²¹ Kachiwui vangkhala kaja athumna Vareli thatheilaga ali Varelaka da khayāmashimana kala ningkashila mamimana, athumna phaningphāphā machukphāphāda athumwui ninglila mashun-makhui maleithuwa.

²² Athumna thangkhamana da hāngmāngmada mangkhama̱ ngasāhaowa,

²³ kala athumna kathi makhangavā Vareli makhorumla thikapaiya mikumoli, vānaoyurbingli, sāyurbingli kala phara̱-pharāli ngamānda sākakhui ama̱bingli khorumhaowa.

²⁴ Chiwui vang eina athumwui wuklungli makathar khamathangli leikashiwui vang Varena chihohaida athum akha eina akha khayākhamalā ot sai.

²⁵ Athumna Varewui pongli khamashung chi kakapik sāngasakhaowa kala katang makhavai, sokhame Kasā Akhavā chili makhorumla ana sākakhuiya otbingli khorumthuihaowa, kala otram ngatha̱thuihaowa! Amen.

²⁶ Chiwui vang eina Varena athumli horhaida khayākhamalā khamathang ot sāngasakhaowa. Sha̱naobingla khangachā khangaso maningla athum khalatta khayākhamalā ot sai.

²⁷ Chithada sāda mayarnaobingnala khangachāwui khangashang chi horhailaga athum akha eina akha mathangmarangda mayarnao eina mayarnao khayākhamalā ot sai. Chieina athumna sāyon kahai chiwui samphangkhangayi shongrān chi athum khalatta samphangra.

²⁸ Athumna Vareli theikhangai ning makhaleiwui vang Varena athumli makhamathā kala makhangayi achamli zatngasakhaowa.

²⁹ Athumwui makaphā-makhayā, zakkashi, khangamar kala mikpaikashiwui acham, yangkashi, shaokathat, khangama̱-khangazai, kateikazā, shimān khavai kasā kala morkasapna pemtinghai.

³⁰ Athuma satkakharata, Vareli ningkakachaia, mana̱kashe, langkasoa, kachorkashe, kachipata, ava̱ avāwui kahāng makhanganā,

³¹ mangkhama̱a, mashitsangkapai kala lukhamashan makatheibingna.

³² Hikathāthā ot saakha thira kaji Varewui ningkhami chi theilala athumna chi kasāmāng majila khangatei chithada kasābinglila mayāmi.