PHONGKHAMI 9 - Kathara Bible (BSI)

¹ Chiwui thili kaphangā kazingrao china awui talla̱ chi khonguwa; kala sirā akha kazingramwui eina okathuili tākatung ina thei, kala sirā chili makatang leizingkhur shokhavai sho chi mi.

² Chieina ana leizingkhurwui akhur chi shohaowa, kala meifa shatrung kahaiwui meikhut thada, akhur chiwui eina meikhut ngapuishokuwa. Chieina akhur chiwui meikhut china zimikla kazingramla tangmangtinghaowa,

³ meikhut chiwui eina khaoh shokta okathuili tai kala ngaleiwui seithatna pangshap khalei thada athumlila pangshap sangmihaowa.

⁴ Khawoli, khamateka thingnā-rahāli kala thingrongli masāza̱paimara, kha khaveili Varewui mahor makakābingli makei khavai athumli kasoi.

⁵ Mibingli sākathatva masāthatla seithatna mili kapharikwui khangashei thada ngashei khavai athumli kachāng phangā rekharek khavai mayāmi;

⁶ chitharan mibingna thikhavai phāshang phatāra, kha kalikha masamphanglakmara; athum thingaināra; kha kathina yāmhaora.

⁷ Khaohbing chiwui azak raiwui vang ngarān kahai siguibing thai. Kuili sinā kuihon thada ngahona; athumwui azak mimai thai.

⁸ Athumwui samna sha̱naobingwui kuisam thai, athumwui ahāna kazingkha̱hā thada kai;

⁹ kala athumwui thikkom chi mari thikkom thai; athumwui angachāngwui akhon chi raili vaukida sigui-gari kachungkha ngasamkazatkhon thai;

¹⁰ Athumwui akhamei chi seithat thai, kala akhaler kai kala mikumoli kachāng phangā rekharek khavai akhameili pangshap sangmi.

¹¹ Athumwuitungli awunga akha lei, chi makatang leizingkhurwui kazingraona, awui ming Hebrew tuili Abaddon hoi, Greek tuili Apollyon (Kakhalatna “Sākakhaiya”) hoi.

¹² Khare khonshāt kānhaira, yanglu, khani rāluifara.

¹³ Chieina katharuka kazingrao china awui talla̱ chi khonguwa; kala Varewui mangāli khalei sinā hanphutwui angachee matiwui eina akhon akha kashok shai.

¹⁴ Akhon china talla̱ singda khalei katharuka kazingrao chili hānga: “Kahaka Euphrates kongli narkahai kazingrao mati chili chihohaolu.”

¹⁵ Chieina kazingrao mati chili chihohaowa, athum hiya pung, zimiksho, kachāng kala zingkum chi tāzak eina mikumo saikorawui khum kathumwui khumkha chi shaothat ngasak khavai ngarān kahaibingna.

¹⁶ Kala sigui katong raimibing chiwui mishān chi thingnam thing shākhaninada ina shai.

¹⁷ Kala ili mahākhamili sigui chi hithada thei; katongbingwui thikkom chi meiwui kahung, sapphire thada kazing machu kala meiri thada yaingang machu thai; siguikuina kazingkha̱kui thai, kala athumwui khamor eina mei, meikhut, kala meiri shoka.

¹⁸ Kazātyur kathum kaja sigui khamor eina kashoka unshimui kathum, chiya; meiwon, meikhut kala meiri china miyur khum kathumwui khumkha chithithaowa.

¹⁹ Kaja Siguibingwui pangshap akhamor eina akhameili lei, akhamei phara̱ thada akui kālaga chi eina makei.

²⁰ Khangatei kharingabing, kazātyurbing hina masākathatbing china athumwui pāngna sākakhuiwui eina mai mangareiung mana, katheila mathei, kashāla mashā, kazatla makazat sinā, lupā, pithrai, ngalung kala thing eina sākakhui meoma̱bing chili khokharumla mathāhaimana.

²¹ Kala mi shaokathat, khara̱kasang, khamathang-khamarang lah khaleekasa̱wui eina ningla mangateimana.