PHONGKHAMI 8 - Kathara Bible (BSI)

Kashine Mahor

¹ Yaonao china kashine mahor chi sākakhai tharan pungkhai sha̱kha kazingram va̱rihaphaowa.

² Chiwui thili Varewui mangāli kazingrao shini khanganing chi ina thei, kala athumli talla̱ shini mihaowa.

³ Chiwui thili khangatei kazingrao akha hanphut ngalemli rānganinga, ana nganamkaphā thao riktā khavai sinā tengkot akha singa, kala katharabing saikorawui seihā kasāli chigatrum khavai ali nganamkaphā thao kachungkha mi, kazingrao china kachigat chi wungpamkong mangāli khalei sinā hanphuttungli pha̱phayāmi.

⁴ Kazingrao chiwui pāng eina anganam chiwui akhut chi katharabingwui seihā kasā eina ngasoda Varewui mangāli kashunghaowa.

⁵ Chiwui thili kazingrao china anganamkhong chi khuida chi hanphutwui mei eina chipemkhui kala okathuili hortāhaowa; chieina kazing ngashumkakang rikhān ngasheida neina̱la khanuka.

Talla̱bing

⁶ Chiwui thili talla̱ shini kasinga kazingrao shini china talla̱ khongkhavai khangarān sāhaowa.

⁷ Khare kazingrao china awui talla̱ chi khonguwa; chieina theih eina mei ashee manātlaga okathuili rotai. Okathui khum kathumwui khumkha chuitāhaowa, thingrong khum kathumwui khumkha chuitāhaowa, khamateka khawola chuitāserhaowa.

⁸ Kazingrao kakhane china awui talla̱ chi khonguwa; kala mei chuida khalei phungrei kathā akha shamadruli horsanghaowa.

⁹ Shamadru katonga khum kathumwui khumkha ashee onhaowa. Chili khalei manglākapai khum kathumwui khumkha thihaowa, kala chili zatkasā jahas khum kathumwui khumkha shimānhaowa.

¹⁰ Kakathuma kazingrao china awui talla̱ khonguwa; kala sirā khareiva̱ akha zārmei sharmaling kahai thada kazing eina tātungda kong eina ura̱pam khum kathumwui khumkhali tāzanga.

¹¹ Sirā chiwui aming Khāshi kahai hoi; kala tara̱ khum kathumwui khumkha khāshihaowa; chieina khāshi kahai tara̱ chi khamang eina mi kachungkha thihaowa.

¹² Khamate kazingrao china awui talla̱ chi khonguwa; kala zimik kai kathumwui kaikha, kachāng kai kathumwui kaikha, sirā kai kathumwui kaikhali sāza̱da khum kathumwui khumkha tangmanghaowa, ngashunla, ngayāla khum kathumwui khumkha ngamihaowa.

¹³ Ina yangkhavā tharan khalāng akha kazingramli yongzatta panglāk eina khavao shai, “Kakhanang, kakhanang, kakhanang ngasāranu, okathuili kapambing, kazingrao kathum china khongluifaki kaji talla̱khon chiwui vang.”