PHONGKHAMI 7 - Kathara Bible (BSI)

Mahor Namkahai Israelnao 144,000

¹ Hiwui thili kazingrao mati china okathui achikun matili khanganing chi ina thei; ngaleilila, shamadrulila, kala thingronglila masi maphanza̱lak khavai athumna achikun matiwui masi chi singtita.

² Chiwui thili zingshoshong eina khangatei kazingrao akha kharinga Varewui mahor singlaga kharā chi ina thei; kala ngalei eina ngayili sāshimān khavai pangshap mikahaia kazingrao mati chili panglāk eina ana vaoda hānga.

³ “Varewui raobingwui khaveili ithumna mahor manammiranglakha eina tangda shamadruli, ngaleili maningakha thingrongbingli khikha mashimān ngasaklu.”

⁴ Kala mahor nammi kahaibingwui mashing chi ina shai; Israel shang saikorawui eina thing shākha hangmatida matili mahor namhaowa.

⁵ Judah shangnaowui eina thingtharāda khani, Reubenshi thingtharāda khani, Gadshi thingtharāda khani,

⁶ Ashershi thingtharāda khani, Naphtalishi thingtharāda khani; Manassehshi thingtharāda khani,

⁷ Simeonshi thingtharāda khani, Levishi thingtharāda khani, Issacharshi thingtharāda khani,

⁸ Zebulunshi thingtharāda khani, Josephshi thingtharāda khani, kala Benjaminshi thingtharāda khanina.

Hakkhamahā Yāruikazip

⁹ Chiwui thili ina khayang tharan, yanglu, mina mashānkharar mikazip akha ngalei kachiva̱wui eina, shang kachiva̱wui eina, miyur kala tuiyur kachiva̱wui eina kachara sāri shaksālaga pāngli khaneinā singriplaga wungpamkhong kala Yaonaowui mangāli nganingserlaga;

¹⁰ akhon pangda vaosera: “Huikhami hi wungpamkhongli kapama, ithumwui Varivara kala Yaonao chiwuina.”

¹¹ Kazingrao saikorana wungpamkhong, ararbing, kala kharinga sāyur mati chili kuimareida nganinga kala athumna ngakhumshām eina Vareli khorumserda hānga,

¹² “Amen! masotla, tekhamateila, aworla, ningkashila, khayākakāla, pangshapla, saikora mashimānda ithumwui Varewuina! Amen”.

¹³ Kala arar akhana ili hānga, “Sari kachar khangavaibing hi khipālong kala kachiwui eina kharākhala?”

¹⁴ Chieina ina ali ngahānkai, “Amei, nana katheina,” Chieina ana ili hānga, “Athum hiya kachotkachāngwui eina shokkahaibingna kala athumwui sāri Yaonaowui ashee eina ngasa̱hailaga charshi eina sākhui kahaibingna.

¹⁵ Chiwui vang eina athumna Varewui wungpamkhong ngalemli nganingda ngashun ngayā awui shimli otram khangatha̱na; kala wungpamkhongli kapama china awui ngasokhami china athumli khayinmira.

¹⁶ Athum mathailuilakmara, mara̱changluimara, zimikwui kala khangateiwui kasānala athumli makāng ngasakmara;

¹⁷ khikhalajila wungpamkhong alungthungli kapama Yaonao china athumli hommida kharinga tara̱ khawur ura̱pamli thanvāmira; kala Varena athumwui mikwui chara̱ mitmisera.”