PHONGKHAMI 6 - Kathara Bible (BSI)

Mahorbing

¹ Chiwui thili Yaonao china mahor khare sakakhai chi ina thei; kala sāyur matiwui ngachaili akhana kazing khangashumwui akhon thada, “Ralu” da kahāng chi ina shai.

² Kala yanglu ina kachara sigui akha thei, chili katongapa chi malā akha singa. Ali kuihon akha mi, kala ana yuiyuida yuishum khavai zatthuihaowa.

³ Yaonao china kakhane mahor sākakhai eina, sāyur kakhanepā china “Rālu” da kahāng ina shai.

⁴ Kala chili hungping kahai sigui akha shoka. Chili katongapali okathuiwui eina chingri kahai khuithuihaida athum akha eina akha shaothat ngarok khavai pangshap mi, kala ali raighai kahakva̱ akha mi.

⁵ Kala Yaonao china kakathuma mahor sākakhai eina, kakathuma sāyur china “Ralu” da kahāng ina shai. Chieina yanglu, ina sigui kazika akha thei; chili katongapana pāngli khān onkhavai akha singa.

⁶ Kala sāyur mati chiwui alungli ina akhon akha shai, “Thangkhawui ngalangman gehu horsaikha kala thangkhawui ngalangman barley horsai kathum, kha olive thao eina drakhāra̱ chi masāza̱alu.”

⁷ Kala khamate mahor chi ana sākakhai eina, khamate sāyur china “Ralu” da kahāng ina shai,

⁸ kala yanglu ina charrisi kahai sigui akha thei, chili katongapawui ming Kathi hoi, kala kazeiramna ali shurzata. Ali okathui khum mati sālaga khumkhawuitungli raikhai, chām, kazātkashi kala ramsā eina chithit khavai pangshap mi.

⁹ Kala kaphangā mahor chi sākakhai eina, Varewui tuiwui vang kala Vare tuili shākhi kasāwui vang shaothat kahaibingwui manglā hanphutwui azingli leisāser kaji ina thei.

¹⁰ Athumna panglāk eina vaowa: “O Proho, kathara, khamashunga, okathuili khalei mibingna ithumli shaokathatwui bichar kala tandi miki kaji atam chi leifala?”

¹¹ Athum ava̱va̱li kachara kachon akharip mi, kala athumwui otram ngatha̱kharum achinābingli athumwui thada masāthatranglakha kasha̱kha ngasāmsālu da athumli hānga.

¹² Ana katharuka mahor sākakhai chi ina thei. Chili neina̱ panglāk eina khanuka; kala mehā kazik eina rakkakhui borāshi thada zimik zikrik haowa, kachāngla ashee thada hungpinghaowa.

¹³ Unshimuili khaorāthei kapa̱ thada kazingramwui sirāla, okathuili tātungserhaowa;

¹⁴ kazingla lairik thada khaluithuihaowa; kala phungreila yikuiramla athumwui apam eina ngacheiserhaowa.

¹⁵ Chiwui thili okathuiwui awungabing, khangam-khareibing, shipaiwui akhavābing, kashānga, akhavā kasābing, pangshap khaleia, rao kachiva̱la, kachichā khalatta okathuibingla lungkhurli kala kaphungkhurli ngathumserhaowa.

¹⁶ Kala athumna phungreibingli kala lunghārbingli ngakaoda vaowa, “Wungpamkhongli kapama chiwui miktheiwui eina, kala Yaonao chiwui malungvātwui eina thummida ithumwuitungli minrormilu,

¹⁷ kachiwui vangkhala kaja athumwui malungkhavātwui kahaka zimiksho rāhaira, khipāna nganingshaprakhala?”