PHONGKHAMI 5 - Kathara Bible (BSI)

Lairik Akhalui kala Yaonao

¹ Chiwui thili, wungpamkhongli kapama chiwui yāpāngli alungla ayarla ngaworthang kapilaga mahor shini namkahai lairik akha ina thei.

² kala kapanga kazingrao akhana panglāk eina hithada vaoda hānga, “Lairik akhalui hi harlaga, mahor namkahai sakhaikhangayia chi khipakhala?”

³ Kazinglila, okathuilila, ngaleizingshonglila lairik hi hārshapa, kala yangshapa khipākha maleisāmana.

⁴ Lairik chi hārkhavai kala chiwui alungli kazang chi yangkhavai khangayia khipākha maleikasā chi theilaga na chapsasuihai.

⁵ Chieina arar akhana hānga, “Machapalu, yanglu, Davidwui Angayung, Judah shangwui Kazingkha̱ china yuihaira, chieina ana lairik akhalui kala mahor shini chi sākhaishapra.”

⁶ Chiwui thili ina kharinga sāyur mati kala ararbingna kuikhanam wungpamkhongwui alungthungli Yaonao akha khanganing thei, taithat kahai thai, angachee shini, amik shini kai. Amik shini chi Varewui manglā shini okathui achikun-achikaili chiho kahai china;

⁷ Kala Yaonao china wungpamkhongli kapama chiwui yāpāngwui eina lairik chi akhui.

⁸ Kakhui eina kharinga sāyur mati kala arar maga̱da mati china Yaonao chiwui mangāli ngakhumsangsera. Athum chi tingteilā ava̱va̱, kala nganamkaphā thao pemting eina kazang sinā tengkot akharip singa, chi kathara mibingwui seihā kasāna,

⁹ kala athumna laa kadhar akha sai: “Lairik akhalui chi khuida chiwui mahor namkahai sākhaingayilak kaje chi nalāka, khikhalajila nali sāthathaowa, laga nawui asheena shang kachiva̱wui eina, tuiyur kachiva̱wui eina, miyur kachiva̱wui eina, kala ngalei kachiva̱wui eina, Varewui vang mi lokhuihaira.

¹⁰ Vareli otram ngatha̱ khavai nana athumli pāngmonbingwui wungram akha semmi, kala athumna okathui hi mungra.”

¹¹ Ina yangvāluishit kaji eina kazingrao thingthing thingnamwui akhon shai! Athum kharinga sāyur mati kala ararbing chi wungpamkhong chili kuimareida nganinga,

¹² kala akhon chi pangda vaowa, “Shaothat kahai Yaonao chi pangshap, kashāng, thangkhamei, yāng, khayākakā, tekhamatei kala masot samphangngayilaka!”

¹³ Chiwui thili kazingramli, okathuili, ngaleizingshongli kala ngayilungli kala haori-haorāngli khalei manglākapai yur saikorana, laa kasā ina shai: “Masotlaa, khayākakāla, tekhamateila, pangshapla; katang mavaila wungpamkhongli kapama, Yaonao chiwui sāranu.”

¹⁴ Kala kharinga sāyur mati china ngahānkai, “Amen!” kala ararbing china ngakhumshāmhaida khoruma.