PHONGKHAMI 4 - Kathara Bible (BSI)

Kazingramwui Khokharum

¹ Chiwui thili ina yanga, kala yanglu kazingramwui khamong shokahai ina thei, kala ili talla̱khon thada khangazeka ina shākhare akhon china hānga. “Hishong kālu, hiwui thili shokki kaji otbing chi ina nali chitheira.”

² Kala chithākhaleoda I Manglā eina leihaowa, kala yanglu kazingramli wungpamkhong akha runghailaga wungpamkhong chili akhana pama,

³ chili kapamapā chiwui zakmai amankasaka ngalung jasper eina cornelianwui kahān thai kala wungpamkhong chi aman kasaka ngalung emerald machu kathā changjeengawut akhana ngawutphina,

⁴ Wungpamkhong chi kuimareida khangatei wungpamkhong maga̱da mati lei, chili kachara wungsari ngavaida sinā kuihon khangahona arar maga̱da mati pama.

⁵ Wungpamkhong chiwui eina rikhān ngasheiya, kazing ngashuma kala akhon shoka, wungpamkhong mangāli thaomei shini shārhai. Chi Varewui manglā shinina.

⁶ Wungpamkhong chiwui mangāli mathingrik kahai shamadru mengshen thada lei kala kuimareida shingāla, khanukla mikmāng kaja manglākapaiyur mati lei.

⁷ Khare manglākapai chi kazingkha̱ thai, kakhane chi mukvā thai, kakathuma chiya mimai thai, khamate chi yongkazat khalāng thai.

⁸ Manglākapaiyur mati chi angachāng tharukrip kai, alung ayar mikna pema, ngashun ngayā laa kasā mangasāmmana. “Kathara, Kathara, Kathara, Sāshap-pangshapa Proho Vare, leikasā, khaleia kala rāki kaje!”

⁹ Mashimānda ringching kaja wungpamkhongli kapampā chili manglākapaiyur mati china tekhamatei khayākakā ningkashi khamiwui laa sai. Laa sākachida

¹⁰ wungpamkhongli kapama arar maga̱da mati china ngakhumshām eina, katang mavaila ringching kaje wungpamkhongli kapama chili khoruma. Athumna athumwui kuihon chi wungpamkhongwui mangāli laa sāda haitai;

¹¹ “Ithumwui Proho Vare, tekhamatei, khayākakā pangshap samphangngayilaka, khikhalajila ot saikora nana sākhuisera, saikora nawui kaphaning eina shoksera kala sākhuisera.”