PHONGKHAMI 22 - Kathara Bible (BSI)

¹ Chiwui thili kharingwui tara̱ khalonga kong akha ili chithei, mathingrikhai, Varewui wungpamkhong kala Yaonaowui eina longshoka,

² konungwui chānrei alungthungli longa; kongphei lākharipta atheiyur tharāda khani khamathei kharingwui thingrong phora, kala kachāng kachida mathei. Chiwui thingnah miyurbingwui kazāt raikhavaina.

³ Chili Varena khonshi kahai kaho akhala maleiluimara. Kha chili Varewui eina Yaonaowui wungpamkhong haida, awui raobingna ali khorumra;

⁴ athumna awui mai theira kala athumwui khaveili awui aming kapisangsera.

⁵ Khangayā mavailuimara, thaomeiwui kala zimikwui kahor masāvailuimara kaja Proho Varena athumwui kahor sāra; kala athumna mashimānda mungra.

Jishu Rāki kaji

⁶ Chiwui thili kazingrao china ili hānga, “Tuibing hi shitsangpaiphalung kaje khamashung tuina. Marānbingwui Manglāwui Vare Proho china thākta shokki kaji awui raobingli chithei khavai kazingraoli chihohaira.”

⁷ “Yanglu, I thākta rāra. Phongkhami lairik hiwui tui khamayonabing sokhami ngasāranu,”

⁸ Saikora hi kashā kala katheia chi John ina. Hibing hi ina kashā kala kathei eina ili chitheikhame kazingrao chili khorum khavai ina ngakhumzanga.

⁹ Kha ana hānga, “Chi mathāpaimana! Iya nali, nachinā ngarā marānbingli, kala lairik hiwui tui khamayonbingli ngasoda otram ngatha̱kharum akhana. Vareli khorumlu.”

¹⁰ Kala ana hānga, “Lairik hiwui phongkhami tuibing hi mahor manamshānhaialu, khikhalajila atam chi nganaihaira.

¹¹ Makaphā kasaa china makaphā sāsāranu, khamakhaoa china awui khamakhaoa chili ngaphumsāranu, khangaronga china mashun chi sāsāranu, kala kathara china tharda leisāranu”

¹² “Yanglu, I thākta rāra, kachichāwui ot kasā athishurda mikhavai sāman ina khuirāra!

¹³ I Alpha eina Omegana, khare eina khanaoana, haokaphok eina katangana.”

¹⁴ Kashankachon tharzā eina ngasa̱kahaibing sokhami ngasāranu! Athumna kharinga thingrongwui athei chi shaipaira, kala keinungli ngavei chieina zangpaira.

¹⁵ Ayarle, fa, meoworkashon mi, shāmkasā, mi shaokathat, kameoli kapha̱ kala mikhanamli akachang kasābingmānga.

¹⁶ “Jishu ina, churchbingli shākhitui hi hāngmi khavai iwui kazingrao kashirātna. I Davidwui angayung kala naotun, kahora zingthānwona”,

¹⁷ Manglā kala Khām kahaiva̱ china “Rālu” da hānga. Nganāda khalei mi kachiva̱nala “Rālu” da hāngranu. Ra̱kachanga mi china rāranu, ningkachānga a china kharingwui tara̱ chi aman mamila rāmangkhuiranu.

Tuikup

¹⁸ Lairik hiwui phongkhami tui kashā mi kachiva̱li ningngashar khavai ina hāngkhamathinna; kachikathāna hili mataisangakha lairik hili hāngkahai unshimuibing chi Varena awuitungli mataisangmira;

¹⁹ kala kachikathāna phongkhami lairik hiwui tui khuishokhaiakha lairik hili hāngkahai kharingwui thingrong kala kathara keinung chiwui eina awui sharuk khuishokhaora.

²⁰ Saikora hili shākhi khame china hānga: “Kachangkhat I thākta rāra!” Amen, rāmilu, Proho Jishu!

²¹ Proho Jishuwui lukhamashan katharabing saikorali ngasomichingranu. Amen.