PHONGKHAMI 21 - Kathara Bible (BSI)

Kazingram Kadhar eina Okathui Kadhar

¹ Chiwui thili ina kazingram kadhar akha eina okathui kadhar akha thei kala kazingram khare eina okathui khare chi shimānhaida ngayila maleithuwa,

² kala mākhām kahaiva̱na gaharali samphang khavai shaksākazak kahai thada kathara keinung, kadhara Jerusalem chi kazingramwui Varivarawui eina katā chi ina thei,

³ kala wungpamkhongwui eina panglāk eina khavaokhon akha ina shai; “Yanglu, Varena mili okthuirumkachangda lei! Ana athumli ringrumra kala athum awui mi sāra, Varivara A khalattana athumli ngasopamra.

⁴ Ana athumwui chara̱ mitmira; kathi, malung kharing, kachot, chapkhangachāla maleiluimara, kaja kachama chi shimānhaira!”

⁵ Wungpamkhongli kapama china hānga, “Yanglu, ina ot saikora dharngasakta lei!” Ana hānglui, “Hi kapikhuilu; khikhalajila hi makhangapata khamashung tuina”,

⁶ kala ili hānga, “Kuphaira! I Alpha eina Omegana kaja haokaphok eina katangana, ra̱kachanga chili kharinga uraokwui eina ina khalem eina mimangra.

⁷ Khayuia china shimluikat kāra kala I awui Vare sāra, a inaomayara sāra.

⁸ Kha malungmakazanga, mashitkasanga, khamakhaoa, mi shaokathata, ngalā khangashāma, meoworkathema, meoma̱li khokharuma, kala kapikkazarra, athumwui apam chiya meiri eina chuida khalei meiwui ngayi china, chi thikakhane china.”

Kadhara Jerusalem

⁹ Chiwui thili kazingrao shiniwui ngachaili naomeikap kaje unshimui shini pemting eina kasinga kazingrao akhana ili rāhānga, “Ralu, mākhām kahaiva̱, Yaonao chiwui preiva̱ chi ina chitheira.”

¹⁰ Laga phungrei kahak kajuiva akhali Manglā eina ili thānkai, kala Varewui kazingramwui eina kathara keinung Jerusalem katā chi chithei.

¹¹ Varewui tekhamatei chi aman kasaka hirāmukta kala jasperwui kahān thada mathingrikhai.

¹² Chiwui phākho haklaka kala juishuna, kala ngavei tharāda khanili kazingrao tharāda khani lei, chili Israel shang tharāda khaniwui aming kapisanghai

¹³ Zingshoshong ngavei kathum, atungshong kathum, azingshong kathum, zingtunshong kathum lei.

¹⁴ Keinung chiwui phākho shunkhui khavai ngalungphei tharāda khani lei, kala chili Yaonaowui paokazata tharāda khaniwui aming kapihai.

¹⁵ Ili khangazeka kazingrao china keinung kala chiwui ngavei eina phākhowui asān-aret nāp tamkhui khavai sinā khāmshui akha singa.

¹⁶ Keinung chi chithek mati sai, asān eina aret ngaraichai, awui tamkhavai thing chi eina onlaga kilometer thingkhani shāmati sānga; asānla aretla kajuila ngaraichāsera.

¹⁷ Kazingrao china phākho chi tamlaga khuining shākha hangmatida mati juiya, kaja ana miwui pānglam eina tamkhui.

¹⁸ Phākho chi jasper eina sai, kha keinung chiya sināmāng eina sai, kala mingshenwui kahān thai.

¹⁹ Keinung chiwui phākho shimphung chi hirā ayur peida sanga, khare chi jasperna, kakhanena sapphire, kakathumana agate, khamatena emerald,

²⁰ kaphangāna onyx, katharukana cornelian, kashinena chrysolite, kachishatana beryli, kachikona topaz, katharana chrysoprase, tharāda kharena jacinth, kala tharāda kakhanena amethystna.

²¹ Ngavei tharāda khani chiya khaying mānga, khayingwui khamtong ava̱va̱sera. Keinung chiwui shongfa sināmāng eina sai, ka̱lāra̱ngayot thada mathingrikhai.

²² Keinung lungli khorumshim khalei matheimana; khikhalajila chiwui khorumshim che Proho Varivara kala Yaonao china.

²³ Kala keinung chili hormi khavai zimikla kachāngla khikha masāvaimana; kaja Varewui tekhamateina chiwui kahorna, kala Yaonaona chiwui thaomeina.

²⁴ Kahor chieina yur saikorana yaothuira, kala okathuiwui awungabingna athumwui lan khuirāsera.

²⁵ Keinung chiwui ngavei shungkahai mavaimara, khangayāla mavaimara,

²⁶ yur saikorawui tekhamatei kala khayākakā hili khuirāsera

²⁷ Kha khamakhao ot akhala hili mazangpaimara, sākakhamāng kala khayon-khamāng ot kasābing mazangpaimara; kha Yaonaowui kharinga lairikli aming kapikahaibingmāng zangra.