PHONGKHAMI 20 - Kathara Bible (BSI)

Zingkum Thingkha

¹ Chiwui thili kazingramwui eina kazingrao akha katā ina thei; ana makatang leizingkhurwui sho kala kharita mari-khara̱ akha apāngli singa.

² Ana dragon, kasara phara̱, Chipeela, Satanla kaho chili tukhuida mari-khara̱ eina khalapa, kala kum thingkhawui vang narhai;

³ leizingkhurli horsanghaida shungnamhailaga mahor namshānhaowa, kaja kum thingkha makāshungranglakha eina tangda ana mili maminamlui khavaina. Chiwui thili hunkhawui vang chiholuinaora.

⁴ Chiwui thili wungpamkhong kachungkha ina thei, bichar sākhavai mayāmi kahaibingna chili pama. Varivarawui tuiwui vang kala Jishuwui kathar tuiwui vang akui rangtāmi kahaibing, sāyur chili kala awui ama̱li makhokharumbing, kala apāngli, akhaveili mahor makhanambingwui manglāla ina thei. Athumna ringluida Khristali ngasoda kum thingkha munga,

⁵ khangatei kathebing chi zingkum thingkha makāshungranglakha maringungmana. Hi ringkhalui khare china.

⁶ Ringkhalui khareli kazang athum sokhami kala kathara ngasāranu! Chikathāwuitungli kakhane kathi china khipangshapkha maleimana kha athum Vare eina Khristawui pāngmon sāda athumna ali ngasoda zingkum thingkha mungrumra.

Satanli Khayui

⁷ Zingkum thingkha kāshung kahai eina Satanli zurshimwui eina chihora;

⁸ ana okathui achikun mati kaja Gog eina Magogli khalei hupvali minamda rai sākhavai kazipkhui khavai shokra, athumwui raimi yireiwui situi ngayāra.

⁹ Chithada athumna khamashā okathuili zatta katharabing kala Varewui leikashe keinungli kuinamra. Kha kazingwui eina mei tāda athumli mutngasaka; kala

¹⁰ athumli mikhanama chipee chili rida sāyur eina minama marānli horsang kahai meiri eina kachuia meiwui ngayili horsanghaowa kala athumli chili ngashun ngayā katang mavaila rekharekra.

Khanaowa Bichar

¹¹ Chiwui thili charshi kahai wungpamkhong kahakva akha chili kapama chili thei, awui mangāli kazingla okathuila shimānhaida athumwui pam maleisāmana.

¹² Kathebing khareila kateola wungpamkong mangāli khanganing kala lairikbing harkahai chi ina thei. Khangatei lairik akhala harluihaowa, chiya kharingawui lairikna. Lairik hili kapi kahai tākam eina kathebingli athum kachichāna sākahai athishurda bichar sai.

¹³ Shamadruna kathebingli chishota, Kathe eina Kazeiramnala kathi chi mathumrarmada chishota; kala saikorali kachichāna sākahai athishurda bichar sāsera.

¹⁴ Chiwui thili Kathe eina Kazeiramli meiwui ngayili horsanghaowa. Meiwui ngayi hi thikakhanena;

¹⁵ kala kachikathāwui aming kharingawui lairikli mazangthura̱-akha chikathā mili meiwui ngayi hili horsanghaowa.