PHONGKHAMI 19 - Kathara Bible (BSI)

¹ Chiwui thili kazingramwui eina mi kachungkhawui akhon thada ina shai; kala vaowa; “Hallelujah! Huikhami, tekhamatei pangshap Varewuina,

² awui bichar mashungrik kahaina; shāmsāda okathui makhao khangasaka khayora akhavaiva̱li Varena bichar sāhaira. Varewui raobingwui ashee tākahai chiwui vang ali athut khuimihaira.”

³ Akha shida vaolui, “Hallelujah! sha̱naowui eina meikhut katang mavaila kāda lei.”

⁴ Kala arar maga̱da mati kala kharinga sāyur mati china ngakhumshamhaida wungpamkhongli kapama Vareli khorumda hānga, “Amen. Hallelujah!”

Yaonaowui Shakazā Zātkhān

⁵ Kala wungpamkhongwui eina akhon akha vaorāda hānga, “Ithumwui Vareli solu, awui rao saikora! Ali khangachee kharei kateo hupta.”

⁶ Chiwui thili mi kachungkhawui akhon-akhak thada, kongkathui thada kala kazing khangashum thada hithada shāluishita, “Hallelujah, khikhalajila ithumwui Proho Vare Sāshapa china munghaira:

⁷ Ithum mathānda ringphāsa kala aming tekmatei ngasaksa, khikhalajila Yaonaowui shakzāt atam rāhaira, awui Mākkhām kahaiva̱ ngarānpinghaira;

⁸ khamenga, kahora, kathara kachon ngavai khavai mayāmihaira, kaja khamenga sāri kachon hi katharabingwui khamashung khangarong otsakna.”

⁹ Kala kazingraona ili hānga, “Hi kapikhuilu: Yaonaowui shakazā zātkhānli kahobing chi sokhami ngasāranu” kala ana ili hānga, “Hi Varewui tuilaka.”

¹⁰ Chieina ina ali khorum khavai ngakhumzanga kha ana ili hānga, “Chi mathāpaimara! ila na thada kala Jishuwui vang shākhi kasā nachinā ngarā thada otram ngatha̱kharuma akhana. Varivarali khorumlu.” Khikhalajila Jishuwui shākhi chi phongkhamiwui manglāna ngashitkhami chilaka.

Kachara Sigui katonga

¹¹ Chiwui thili kazingram shokahai ina thei; kala chili sigui kachara akha leisai; katongapa chili Ningkatong kala Khamashunga hoi; kaja bicharlila rai khangararlila ava mashunglaka.

¹² Awui mik meiwon thai kala kuihon kachungkha ngahona. Awuili kapisang kahai aming chi a maningla khipākha matheimana.

¹³ Ana asheeli rurkahai kachon ngavai, awui aming Varewui Tui hoi,

¹⁴ Kazingramwui raimibingna kachara sigui tongda tāngpat hānshi kahai khamenga sāri shaksāda awui thi shurzata.

¹⁵ Miyurbingli maikashi mikhavai akhamorwui eina kazana raighai shoka. Ana mari-khāmshui eina mungra, kala khamunga Varivarawui malungkhavāt surkhui khavai chili ana naikazamra.

¹⁶ Awui kachonli kala akhaishāngli “Awungabingwui Awunga kala prohobingwui Proho” da aming kapisanghai.

¹⁷ Chiwui thili kazingrao akha zimikli khanganing thei, kala kazingramli yongkazata vānao saikorali vaowa: “Varewui kahaka zātkhān kasāli rāzanglu.

¹⁸ Awungabingwui, raimibingwui, pangshap khaleibingwui, sigui kala katongbingwui, mi saikora kaja rao kala shimva̱ kala kharei kateo huptawui asā rāshaiserlu!”

¹⁹ Chiwui thili sā eina awungabing china raimi thānphungda sigui katonga eina awui raimibingli ngarar khavai kharā ina thei.

²⁰ Sāyur chili kala ali ngasoda minama marān, awui mangāli matakhak kahai ot sāda sāyur chiwui mahor namkahai kala awui ama̱li khokharumbingli minamkakhuiya chili tuknarhaowa. Ani khanili meiri eina chuida khalei meiwui ngayili kharing eina horsanghaowa.

²¹ Kateibingli sigui katongawui khamor eina kashoka raighai eina sāthatserhaowa; kala vānaobingna athumwui asā eina thokhui.