PHONGKHAMI 18 - Kathara Bible (BSI)

Babylon Kongkhalui

¹ Chiwui thili ina kazingrao khangatei akha kazingram eina katā thei; pangshap leilak kahai akhana, awui kahān china okathui horchamrihaowa.

² Kala mashonsei eina ana vaotai. “Kongluihaira, khareia Babylon kongluihaira! Kameobingwui pamkhavai makathar manglā ngapha̱ khavai; makathar ningkakachai vānaopam sāthuihaira,

³ kaja yur saikorana awui makathar khamathangwui zamshei manghaira, okathuiwui awungabing ali ngashāmserhaira kala okathuiwui leihkhalonbing awui saphāphā kaji lan eina shāngkhuiserhaira,”

⁴ Chiwui thili ina kazingramwui eina akhon akha shālui. “Iwui mibing! awui eina yāmulu. Awui morei kasāli zangpaishina, awui ka̱lāshatli zangpaishina!

⁵ Kaja awui morei kazing kāshungda kaziphaira. Varena awui khayonkhalāng phaningunghaira.

⁶ Ana sākahai tākam eina alila sāmilu, ana sākahai chili khumkha mataida runkālu, ana khamanāta tengkotli khumkha mataida chipemmilu.

⁷ A khalatta tekmatei ngasakta khangkāser ot kasā chiyākha, rekakharek chapkhangachā alila tāzakta milu. Awui ningli, ‘Ina awungva̱ sāda pama, rameiva̱ maningmana, chapkhangachā matheilakmara’, da phaninga.

⁸ Awui kasaka tandi thangkhawui alungli rāra; sākazāt chapkhangchā kala zāt kasak rāra, ali meina chuithathaora; kaja ali bichar kasaa Proho Varivara chi Pangshap sāshapana”.

⁹ Ali shāmkasa, awui khangkāserli kazang okathuiwui awungabingna, ali chuikatāwui meikhut chi theilaga malung ringda chapngachāra.

¹⁰ Ali rekakharek chi theilaga ngacheenahaida khalāda nganingda hāngra, “Iyavo, iyavo, khareia keinung! Sāshapva̱ keinung, Babylon! Pung akhawui alungli nawui bichar rāshunghaira.”

¹¹ Okathui leihkhalonbingla awui vang chapa, kaja awui leih sākhavai ot, sinā, lupā,

¹² hirā, mukta, kachon kahunga, hungrisi, silk, khameng kachon, nganamkaphā thingyur, mafahā, amankasak thingyur, pithrai, mari, marble, sākom, maroimarāng,

¹³ nganamkaphā thao myrrh, frankincense, zam, thao, mathir, kehu, yao, sei, sigui, siguigari kala raonao kaja miwui manglā eina tangda khipānakha maloluithuwa.

¹⁴ “Naningna kakahao athei nawui eina thuihaira, nawui lan kala kasaka ot shimānserhaira, masamphangluimara”

¹⁵ Otbing hi leih sāda awui eina samkaphang leihkhalonbing china rekakharek chi theida khalāda nganingra, kala malung ringda chapngachāda hāngra,

¹⁶ “Iyavo! iyavo, khareia keinung! Hungrisi, hungping kahai khangavaiva̱, sinā kala hirā muktā thāngpeo kahaiva̱!

¹⁷ Pung akhawui alungli lan hupta shimānhaowa.” Chiwui thili marikhong akhavābing, chili katongbing, marikhong kahuibing, kala shamadruli zatta leihkhalonbing china khalāda nganingda

¹⁸ ali chuikatāwui meikhut chi theilaga hānga, “Khareia keinung hikathā kali leiluirakhala!”

¹⁹ Athumna kuili hotlā parrorda chapsasui hānga, “Iyavo, iyavo, khareia keinung! Shamadruli jahas leida leihkhalonbingna shāngkhui khavaipam! Pung akhawui alungli shimānngalānghaira.”

²⁰ Awui kashimānwui vang mathānlu, He Kazingram! Mathānlu, He katharabing, paokazatbing, marānbing! Nathumwui vang Varena ali mashun bichar sāmihaira!

²¹ Chiwui thili pangshap khalei kazingrao akhana chakringalung thada lungpha kahakva akha khuilaga shamasruli horsangda hānga, “Hithada khareia keinung Babylonla hortāhaora, kala maleiluimara;

²² nawuili tingteilā kahuikhon, mazuikhon, sipa̱khon, talla̱khon mashāluimara; pāngthem ot akhala maleiluimara; mā kharungkhon mashāluimara!

²³ Thaohmei akhala mahorluimara, mākkhām kahaia kala mākkhām kahaiva̱wui akhon mashāluimara; kaja nawuili leihkhalonbing okathuiwui khangam-khareimānga, kala yur saikorali nawui meowor eina minama!”

²⁴ Kala marānbing eina katharabingwui ashee awuili leisai, okathuili shaothat kahaibing saikorawui asheela leisai.