PHONGKHAMI 16 - Kathara Bible (BSI)

Varewui Malungkhavāt Tengkot

¹ Kathara shim chiwui eina akhon panglāk eina kazingrao shini chili kahāng ina shai, “Varewui malungkhavātwui tengkot shini chi okathuili aheitālu.”

² Chieina kazingrao khare china awui tengkot chi okathuili aheitai; kala sā chiwui aming kapi kahaibing kala ama̱li khokharuma athumli shuinamsā eina moksā thada khangashei kazāt za̱haowa.

³ Kakhanena awui tengkot chi yireili heisanga, kala mi sākathat thada ashee ngasāthuiser haowa, kala ngayilungli khalei manglākapai saikora thihaowa.

⁴ Kakathumana awui tengkot chi kong eina ura̱okli heisanga, kala tara̱ chi ashee ngasāthuiserhaowa.

⁵ Chiwui thili tara̱wui kazingraona kahāng shai, “Nawui bichar mashungrikhai, aruila kharelila na chiching.

⁶ Mibingna katharabing eina marānbingwui ashee heitai. Chieina ara athumli ashee mangkhavai nana mihaira. Athumna samphangkhangayi chi samkaphangna.”

⁷ Chiwui thili hanphutwui eina khavaokhon chi shai, “Sashap pangshapa Vare Proho! Nawui bichar mashungrikhai.”

⁸ Khamate kazingraona awui tengkot zimikli heirora; kala kasā china mili chuingasaka.

⁹ Athumli chiyākha kasāna ngator ngasaklala unshimui hiwuitungli pangshap khaleia Vareli khonshida ningla mangateingai, khayāla mashingaithuwa.

¹⁰ Kaphangā kazingraona awui tengkot chi sāyur chiwui wungpamkhongli heirora; kala awui wungram chi tangmangtinghaowa. Chotchāngnahaida mibingna athumwui male makeikazama,

¹¹ kha kakazā kachot chiwui vang Vareli khonshi, athumna sākahai chiwui vang ning mangateingaimana.

¹² Katharuka kazingraona awui tengkot chi Euphrates kaho kahaka kong chili heisanga; kala chiwui tara̱ thengkhok ngasakta zingshoshongwui awungabing rāpai khavai apong sāmi.

¹³ Chiwui thili dragonwui khamor eina, sāyur chiwui khamor eina, minama marānwui khamor eina, makathar manglā khaifa thada kathum kashok thei.

¹⁴ Manglābing chi chipeena, athumna matakhak kahai ot sāshapa. Khamunga Proho Varewui kahaka zimiksholi rai sāki kajiwui vang okathuiwui awungabingli hokhui khavai athumna yongshang yongtai.

¹⁵ “Yanglu ina khale thada rāki kaji chi chithangna. Chithang kashankachon ngavaipamkasāpā chi sokhami ngasāranu, kaja ana yaruiwui miktāli mahongda mazatmara kala kakhayak masamphangmara.”

¹⁶ Chieina manglābing china awungabingli hokhuida Hebrew tui eina Armageddon kaho apam chili khuirai.

¹⁷ Chiwui thili kashine kazingraona awui tengkot chi masili heirora; kala katharapam wungpamkhongwui eina akhon akha vaoda hānga, “Ngachanghaira.”

¹⁸ Chithākhaleoda rikhān phikphik phākphāk ngasheida, kazing ngashuma, kala neina̱ panglāk eina khanuka. Okathuili mi okthuikaphok eina thuida aja rāshungda chikathā mashoklakranga.

¹⁹ Kahaka keinung chi kaikathum sāhaowa; miyurbingwui keinungbing kongluihaowa kala Varena kahaka Babylonli mamalailakmana, chieina awui khangachee-khangacha athut kakhuina pemkahai tengkot chi mimanga.

²⁰ Yikuiram saikora shimānserhaowa; phungreila akhanida matheithuwa.

²¹ Theih sorkhangasai, pound shākhashikha kharitana miwuitungli tākrora; theih katā marnāhaida mibingna Vareli khonshi.