PHONGKHAMI 15 - Kathara Bible (BSI)

Khanaowa Unshimui

¹ Chiwui thili ina kazingramli hakhamahā matakhak kahai khudam akha thei: kazingrao shinina unshimui shini khuiphunga, hina naomeikap kajena. Khikhalajila hina Varewui malungkhavāt akatanga ngasāra.

² Mingshenwui shamadruli mei khamanāt katha akha thei. Sāyur kala awui ama̱, chili lāngda amingwui mashing chili khayuibing china Varena khami tingteilā singda shamadru chiwui ngalemli nganinga.

³ Athumna Varewui rao Moseswui laa, kala Yaonaowui laa sai: “Hakhamahā, matakhak kahai nawui otsakna, O Sāshap-pangshapa Proho! Kaphā eina mashun nawui apongna, O thotthotwui Awunga!

⁴ Khipāna namingli mangacheera kala matekmatei ngasakrakhala, O Proho? Khikhalajila namāngna katharana. Yur saikorana rāda nali rākhorumra; kaja nawui mashun bichar theiserhaira.”

⁵ Chiwui thili ina khayang eina, kazingramli khalei shākhi khamiwui kachonshim chiwui khorumshim chi shokahai thei.

⁶ Kala chiwui eina unshimui shini khuikaphunga kazingrao shini chi shoka. Athum kachon ngavai kala mathikli sināwui shānneira̱ neiya.

⁷ Chiwui thili sāyur matiwui ngachaili akhana kazingrao shini chili mashimānda makashimān kharinga Varewui malungkhavātwui sinā tengkot shini chi mi.

⁸ Kala Varewui tekhamatei kala pangshap china kathara shim chi meikhut thada puihaida, kazingrao shini china unshimui shini chi makhuishokranglakha eina tangda khipākha khorumshim chili mazangrarthuwa.