PHONGKHAMI 14 - Kathara Bible (BSI)

Yaonao eina Awui Mibing

¹ Chiwui thili ina yangkaje Yaonao chi Zion kaphungli nganingsai. Ali ngasoda, a eina Avāva̱wui ming khaveili kapisang kahai athum thingshākha hangmatida mati leisai.

² Kala kong kathui thada kala kazing khangashum thada kazingramwui eina akhon akha ina shai: Chiya tingleila kahuiwui akhonna.

³ Athum china wungpamkhong, kharinga sāyur mati kala arar maga̱da mati chiwui mangāli laadhar akha sai. Okathui katongawui eina ngatangkhui kahai athum thing shākha hangmatida mati maningla khangatei khipānakha laa chi matamkhuirarmana.

⁴ Mibing chiya sha̱naoli makhayonabing; kachingbingmānga kala Yaonaona khavāvāli ngasozatching kajebingna, Vare eina Yaonaowui vang athumli mikumowui matheikhare sāda ngatangkhui kahaina.

⁵ Athumwui maleli kakapik maleimana, khikhalajila athum chukkakhara̱ maleimana.

Kazingrao Kathum

⁶ Chiwui thili kazingram alungthungli kazingrao akha yongkazat ina thei, ana katang makhavai paokhamathā khuiphungda okathuili khalei yur, jat kala tuiyur kachiva̱li hāshokazatna.

⁷ Ana panglāk eina vaoda hānga, “Vareli ngacheeda khorumlu; kaja ana mibingli bichar sākhavai atam rāhaira. Kazingla ngaleila tara̱ kala ura̱ kasaa chili khorumlu!”

⁸ Chiwui thili kakhane kazingrao shurrāda ana vaowa, “Pangshapa Babylon kongluihaira! kongluihaira! Yur saikorali awui khamathangwui zam mangkhangasakpava̱ chi kongluihaira!”

⁹ Kakathuma kazingrao china khare khaniwui thi shurshokta hānga, “Sayur chili kala awui ama̱li khokharuma kala khaveili nilala, pāngli nilala awui machut khavai achuk kakāpā chi

¹⁰ Varewui malungkhavātwui drakhāra̱ mangra, khikha mamanātlakla malungkhavātwui tengkotli mangra. Athumli kathara kazingraobing eina Yaonao chiwui mangāli mei kala meiri eina rekharekra.

¹¹ Athumli rekakharekwui meikhut mashimānda ngapuira; sāyur chili kala awui ama̱li khokharumbing kala awui mingwui achuk samkaphangbing ngashun ngayā ngasāmkakhui mavaimara.”

¹² Varewui ningkhami khamayona kala Jishuli shitsangtit kaje katharabingna khāngshap khavai khangahotna.

¹³ Chili lāngda, kazingramwui eina akhon akhana kahāng ina shai; “Hi kapikhuilu, aja eina thuida Prohowui vang eina thikahaibing sokhami ngasāranu,” “Sokhami ngasākachangkhatranu, kaja athum kachotkachāngwui eina ngasāmkhuipaira; athumwui khamathā otsak chi athumli ngasozatta lei,” da Manglāna hānga.

Okathui Hātkakhui

¹⁴ Chiwui thili ina muiyā kachara akha thei, kala muiyātungli miwui Naomayara thada akha pama. Akuili sinā kuihon ngahona, kala kazanna chāngkui akha singa.

¹⁵ Chiwui thili kazingrao khangatei akha khorumshim eina shoklaga muiyālungli kapampā chili panglāk eina hānga: “Nawui chāngkui singda hātkhuilu, kaja mā kahāt atam rāhaira, okathuiwui heithei minchaohaira,”

¹⁶ chieina muiyāli kapama china awui chāngkui okathuiwuitungli khayitta okathui hi hātkhuihaowa.

¹⁷ Chiwui thili kazingrao khangatei akha kazingramwui khorumshim eina shoka, ala chāngkui akha singa.

¹⁸ Khangatei akhala hanphutwui eina shoklui, ava meiwuitungli pangshap khalei kazingraona, kala kazana chāngkui kasingpa chili vaoda hānga, “Chāngkui khāngkāda okathui drakhā yāmguiwui eina amazānbing chi hātkhuilu, athei saikora minhaira!”

¹⁹ Chieina kazingrao china chāngkui singda okathuiwui drakhāthei saikora hātkhui, kala Varewui malungkhavātwui drakhāthei surkhavai chili horsanghaowa.

²⁰ Surkhavai keinungwui ayarli naikazama, kala surkhavai chiwui eina ashee longkashok chi sigui nārenra̱ kāshunga kala mile shākhani longvai.