PHONGKHAMI 12 - Kathara Bible (BSI)

Sha̱nao eina Dragon

¹ Chiwui thili matakhak kahai akha kazingramli shoka: sha̱nao akha zimik eina sāri sai, kachāngli pheinai sai, kala awui kuihonli sirā tharāda khani kāda leisai.

² A nao vaisāda pharaukida nao ra̱khaung eina ringai.

³ Kazingramli matakhak kahai kakhane shoklui: akui shini, angachee tharā kala akui ava̱va̱li kuihon khangahona kahaka dragon kahunga akha shoka.

⁴ Ana akhamei eina kazingwui sirā khum kathumwui khumkha okathuili khayittāhaowa. Nao pharātākhaleoda shaikhavai dragon china preiva̱wui mangāli nganinga.

⁵ Yur saikorali mari khāmshui singlaga mungki kaje mayarnao akha pharāhaowa. Kha nao chili Varewuili kala awui wungpamkhongli khuikāhaowa;

⁶ kala preiva̱ chi zimiksho thingkha shākhani hangtharukthang nganaomiki kaje Varena ngarānmi kahai lamhāngli yāmvāhaowa.

⁷ Chiwui thili kazingramli rai shoka. Michael eina awui kazingraobingna dragon chili rai ngararra. Dragon china awui raobingli ngasoda ngararra.

⁸ Kha dragon chili maikashi mihaoda a eina awui kazingraobing kazingramli pamkhavai athumwui pam maleithuwa.

⁹ Chieina phara̱ kasara, okathui katongali thānkhanguia, aming Satanla, Chipeela kaho dragon chi awui kazingraobingli ngasoda okathuili hortāhaowa.

¹⁰ Chiwui thili kazingramli panglāk eina vaoda kahāng ina shai: “Ara Varewui huikhami rāhaira! Ara Varena awunga thada pangshap chitheihaira. Ara awui Khristana awui sāshap pangshap chitheihaira. Varewui mangāli ngashun ngayā mateila ichinā ngarāli khayon kaphenapa chili kazingramwui eina horshokhaira.

¹¹ Yaonao chigatkhami mangā eina, kala kathar tui athumna shākhi kasā chi eina ali yuihaira; kaja athumna manglā kachiho mashivāmana.

¹² Chiwui vang eina mathānlu, O kazingram kala chili khaleibing! Kha okathui eina shamadru, kakhanang ngasāranu, kaja chipee china awui atam ungshungrāli kaji theida nathumwuili malungvātlak eina tāhaira.”

¹³ Okathuili hortā kahai chi theilaga dragon china naomayara pharākakhui preiva̱ chili suiphokuwa.

¹⁴ Kha lamhāngli kum kathum yongung-yongvā khavai khalāngwui angachāng kahakva̱ khani preiva̱ chili mi, chiya dragon china mangaphan khavaina.

¹⁵ Preiva̱ chili tara̱na kheithui khavai dragon china akhamor eina tara̱ kachungkha kapha̱vai.

¹⁶ Kha ngaleina ngachonmida dragonna kapha̱kashok tara̱ saikora chi ngaleikakaili zimsanghaowa.

¹⁷ Chi theilaga dragon china preiva̱ chili malungvātshunhaida, anaongarā kateibingli, kaja Varewui ningkhami khamayonabing chili rai sākhavai thuihaowa.

¹⁸ Kala dragon china shamarupheili anganinga.