PHONGKHAMI 11 - Kathara Bible (BSI)

Shākhi Khami

¹ Chiwui thili nāp tamkhavai khāmshui kathā akha ili mida hānga; “Ngakarthuida Varewui shim eina hanphut chi nāp tamkhuilu, kala khorumda khaleibing athum chi shānkhuilu.

² Kha khorumshimwui ayar yāngkhup chi matamkhuialu; chiya miyur khangateili mikahaina kala athumna kathara keinungtungli kachāng hangmatida khani naikazamra.

³ Ina iwui shākhi khanili bora ngavailaga zimiksho thingkha shākhani hangtharukthang marān ngasakra.”

⁴ Okathuiwui Prohowui mangāli khalei Olivething khani kala thaomei khani chi shākhi khani china.

⁵ Kachikathāna anili makaphā sākida khangarān saakha, khamorwui eina mei shokta yangkashibingli shimān ngasakra; kala anili makaphā saki kaje mi chili chithada sāthatra.

⁶ Ani hi kazing shungkham khavai pangshap lei, chieina anina khamarān atamli kazing maromara; kala tara̱ ashee onkhavai ura̱okwuitungli aniwui pangshap lei, okathuili kazātkashishi rāngasak khangangaili chihoshapa pangshapla lei.

⁷ Kha aniwui shākhi mikup kahaiwui thili makatang leizingkhurwui eina kashoka sā china rai shokngararra kala yuihaida anili sāthathaora.

⁸ Kala aniwui angun chi athumwui Proholi shaothat khavai apam, kahaka keinung chiwui chānreili haira. Khudam eina kaho keinung chili Sodom eina Egypt hoi.

⁹ Zimiksho kathum tangkhai thang, miyur, tuiyur kala jat kachiva̱na angun chi theilala machifa ngasakmara.

¹⁰ Okathui mibingna ani kathiwui vang mathānmareoda kala ringphāda otla ngalon ngarokra, kaja marān khani china okathuili kapambingli chotchāng ngasaksai.

¹¹ Kha zimiksho kathum tangkhaiwui thili Varewui khaksui zangmida anina ngakarthuiuwa kala chi kathei mi kachiva̱ ngacheeyikhaowa.

¹² Chiwui thili kazingramwui eina akhon panglāk eina khavao anina shai, “Hishong kālu”. Chieina ani muiyā tongda kazingram kakā chi yangkashibingna thei.

¹³ Pung chichangli neina̱ panglāk eina khanuka, kala keinung khum tharāwui khumkha shimānhaowa. Neina̱ kakhanuk chili mi thingshini thihaowa; kateibing china ngacheeshunhaida kazingramwui Vareli masot chikata.

¹⁴ Kakhane kakhanang thuihaira, yanglu, kakathuma kakhanang thākta rāluira.

Kashine Talla̱

¹⁵ Chiwui thili kashine kazingrao china awui talla̱ chi khonguwa; chiwui thili kazingramli akhon panglāk eina vaoda hānga, “Okathuiwui wungram, ithumwui Proho kala awui Messiahwui wungram ngasāhaira, ana katang mavaila mungra.”

¹⁶ Chiwui thili wungpamkhongli pamda khalei arar maga̱da mati china mai mashunzangda Vareli khorumda

¹⁷ hānga: “Aruila, achāla chiching kaje sashap-pangshapa Proho Vare, Ithumna nali ningshi, khikhalajila nana nawui kharei pangshap chi singda mungphokhaira!

¹⁸ Miyur khangateibingna malungvāta, kha nawui malungkhavāt rāhaira; kathebingli bichar sākhavai, narao paokazatbing, katharabingli, namingli khangacheebing, kharei kateoli sāman mikhavai kala okathuili sākakhaibingli sākazamki kaji atam rāhaira.”

¹⁹ Chiwui thili kazingramli khalei khorumshimwui khamong shohaowa; kala khorumshimlungli tuingashitwui oko chi thei. Chiwui thili rikhān ngasheiya, akhonla shai, kazingla ngashuma, neina̱la khanuka, kala theih panglāk eina tai.