PHILIPPINAO 2 - Kathara Bible (BSI)

Khristawui Sitkhamahui

¹ Nathumwui mirin Khristali khalei china nathumli pangngasaka, kala awui leikashi china nathumli ringphā ngasaka. Nathum Manglāli ngarumsak lei kala akhana akhali phaningmida lumashanthei ngaroka.

² Leikashi akhawui lungli ningphanin akha eina khokkha-yāngkha sāda ili ringphāchao ngasakmilu da poli.

³ Khalatta masotmasaoalu, kha akhana akhali phāmeiya da phaning ngaroklu.

⁴ Khalatawui vāngmāng maphaningalu, kha ningaishi ngaroklu.

⁵ Nathumla Jishuwui kasākhavā thada sālu.

⁶ Varewui khangachā chi awuili leichinga, kha ana Vareli ngaraichā khavai masālakmana.

⁷ Akhalattana mareojeo awui khalalei saikora horhailaga rao akhawui khangachā sai, mi akha ngasālaga mikumowui khangachā eina rai.

⁸ A malung nimlaka kala kathi eina tangda kahāng nganai— krushli thimi.

⁹ Chiwui vang eina Varena ali juimeikap kaji pamli khāngkai kala saikorawuitungli hakmeikap kaje aming chi phokmi.

¹⁰ Chieina kazingramlila, okathuilila, apuk-apagalila, manglākapai saikorana Jishuwui mingli khayāshida khuktilaga khorumra,

¹¹ kala Avāva̱ Varivarali tekmatei khavai, yur saikorana Jishu Khrista hi Prohona da hāngphatra.

Okathuili Kahor

¹² Chieina, iwui leikashebing, nathumna atam kachida kahāng nganā kahai thada, aruila, imiktāmāngli maningla kha lāngmeikharda I makhalei tharan Vareli khangachee kala kachiham eina nathumwui huikhami chi mapung phakhavai hotnakhuilu.

¹³ Kaja awui kaphaning chi sāngairareo sākhavai kala sāshap khavai Varena nathumwui alungli ot sāda lei.

¹⁴ Ot saikora ngakaikashi maleila sāngairareo eina sālu.

¹⁵ Chithākha khamakhao okathui hili nathumna morei kaphunga mibingwui alungli okthuilala khayon makhalei kala kathara, Varenao thada okthuira. Kharingwui chānpao chi athumli mida, sirāna kazingram horkhangasak thada athumwui ngachaili nathumna horphalungra.

¹⁶ Kharingwui tui singtitakha Khristawui Zimiksholi iwui sākahai ot saikora arema mangasāmana da nathumwui vang eina I langsokapai apong leisāra.

¹⁷ Nathumwui shitkasangwui pha̱kaphayā kachigatli iwui ashee heirorra jilala I ringphai, kala ina nathum saikorali mathānrumra.

¹⁸ Chi tākam eina nathumla ringphāphalungra kala nathumwui khamathān chila ili chitheiphalungra.

Timothy eina Epaphroditus

¹⁹ Prohowui khamayāna jiakha ina Timothyli nathumwuili thaklāk eina chihorāra, chieina nathumwui pao shāda I ringphāpaira.

²⁰ Nathumwui vang phākhavai ningsangda samiki kaje a kathā mi khangatei maleimana.

²¹ Khangateibing chiya Jishu Khristawui otli ning masangla kachichāwui phakhavaimāng sai.

²² Kha Anaomayarana Avāva̱li otram khangatha̱ thada, ana ili ngasoda kathada paokaphāwui vang otram ngathahaira̱khala kajila, awui kākashungla nathumna theihaira.

²³ Ina khi sāmameirakhala kaji theikhuikhaleoda ali chihorā khavai phaningda lei.

²⁴ Ila nathumwuili thaklāk eina rāshaphaolapai da Proholi chihana.

²⁵ Ili otsakruma kala otram ngatha̱mida nathumwui paokaphunga sāmida khalei ichinā Epaphroditusla nathumwuili chihovāphalungrali da phaninghaira.

²⁶ Ana nathum saikorali theingailak eina leili, kala a kazāda leili kaji nathumna shāhaira kajiwui vang ning chotta lei.

²⁷ Mha, a kazāpapama, kathila thinaikhaya: kha Varena ali lumashanmi; amāngli maningla kha wukkakhanang mangaror khavai ilila lumashanmi.

²⁸ Nathumna ali theiluishitlaga ringphāpai khavai, kala iwui ning kachotla suitā khavai, ina ali chihorāngailaka.

²⁹ Ringkaphā eina Prohowui mingli chinaongarā thada ali samphangmilu kala athum kathāli khayāshilu.

³⁰ Kaja nathum khalattana ili mangachonmikharar chi ngachonmi khavai ana manglā hamlaga Khristawui vang ot sāda thinaikhaya.