PHILIPPINAO 1 - Kathara Bible (BSI)

Shālam Tui

¹ Khristawui rao Paul eina Timothywui eina— Philippili khalei church kathanabing eina khangachonabing zangda Khristali ngarum kahai Varewui mibing:

² Ithumwui Avāva̱ Varivara kala Proho Jishu Khristana nathumli lukhamashan kala chingri kahai chi tāshungmiranu.

Paulna Seihā Sākhami

³ Ina nathumli phaningung kachida iwui Vareli ningshi;

⁴ seihā kasā kachiva̱li nathumwui vang khamathān eina ina seihā sai.

⁵ Kharewui eina thuida aja rāshungda paokaphāwui ot nathumna sākharumwui vang ringphai.

⁶ Kala nathumwui lungli kaphā ot sāphokkhame Varena, Khrista Jishuwui Zimiksho eina tangda ot chi sāchingrada shitsangchaowa.

⁷ Nathum iwui ningli leichinghaoda ina hithada kaphaning hi ngayilaka, kaja arui ina phātopli leilakhala kala paokaphā hi khamashungana da shākhi khami kala khanganing atamlila nathumna ili ngasoda Varewui lukhamashan samphangruma.

⁸ Ina nathumli leikashi hi Khrista Jishu a khalattana chitheimi kahai leikashi eina kharāna kaji hi mashun tuina da Varena thei.

⁹ Kala theikakhui eina chukkhamaja̱ ngasoda nathumwui leikashi mataisangmamān khavai ina seihā sai.

¹⁰ Chithada sāda nathumna phameikap kaje chi kapangkhuishapra kala Khristawui Zimiksholi makathar kala mina kaphen saikora maleisāmara.

¹¹ Vareli tekmatei khavai kala masochikat khavai, Khrista Jishumāngna mikashap kaphā magunbing chi nathumwui mirinli pemtinghaora.

Kharing hi Khristawui Vangna

¹² Ivānaobing, ina nathumli theingasakngaiya kaja iwuili shokkahai ot china kachangkhat paokaphāli mangā vāngasaka.

¹³ Khristali otram khangatha̱wui vang ili phātop sanghaowa kaji hi konung khamayonabing kala chili khalei mi khangateibing saikoranala thei.

¹⁴ Ina phātopli kazangwui vang avānao kachungkhali Proholi kachihān mataisang ngasaka. Chieina athumna khangachee maleila paokaphā hashok khavai thangkachida malung pingkhangai pinga.

¹⁵ Mi kaikhana yangshāt kala mikpaishāt eina Khristawui pao hāshoka, kha khangatei kaikhana kaphā ningngai eina hāshoka.

¹⁶ Chithada kasā chi leikashiwui eina kharāna, kaja Varena ili paokaphāwui vang nganing khavai mikahaina kaji hi athumna thei.

¹⁷ Kateibing chiya ningkathar eina Khristawui pao tamkachithei maningla khalattawui tongzā khavaiwui ningngai eina kasāna. Ina photopli leilakha mataimeida iwui vang eina khonzār khavai sārada phaninga.

¹⁸ Chithālala khikha maleimana! Sākakhaningranu, khamashungranu saikora chi Khristawui vang I mathāna kala mathānchingra.

¹⁹ Kaja nathumwui seihā sākhami kala Jishu Christwui Manglāna ngachonkhami mangā eina ili chihomira da thei.

²⁰ Thilala, ringlala, atam kachida, mataimeikapta aruihon malungkaping eina I khalatta chikatchaohailaga Khrista maiyā khavai kasāli ina machihohailakmara kaji hi iwui ningkachāngna.

²¹ Iwui vanga ringlala Khristali kharingna; thihailala tongmei.

²² Kha ina ringvāfasi kaja kaphā ot kachungkha sākapai lei. Chithālala, kachipā kasāna phameinikhala da matheirarthura.

²³ Khani hiwui ngachaili kapangkhui khavai iwui vang saklaka. Thihailaga Khristali ngasokapam hi iwui ningkachāngna, chi phāmeikhara.

²⁴ Kha nathumwui vang eina I kharing phāmei.

²⁵ Nathumwui reikasang kala shitkasangli khamathān chi mataisang khavai nathumli I okthuirumvāfara kaji ina theishinghaira.

²⁶ Kaja hina nathumna Khristali tekkmatei khavai apong chungmeida samphangra.

²⁷ Nathumwui mirin chi paokaphāwui athishurda kazata mirin ringphalungra. Chieina ina nathumli rātheilala, marātheilala nathumna paokaphāli shitkasangwui vang ning khokkha sāda ngararrumda lei, kala ning akha sāda nganingtitta lei kaji pao kashā samphangra.

²⁸ Yangkashebingli mangacheelakalu. Atam kachida malung pinglu, chithākha nathumna yuichingra. Kachiwui vangkhala kaja khayui hi Varena khamina.

²⁹ Khristali shitkasangmāng maningla kha awui vang kachotkachāng phungda otram ngatha̱ khavai nathumli atam kachā mihaira.

³⁰ Ara nathumla ili ngasoda ngararrumpaihaora. Ina khangarar arui nathumna shāda khalei hila ina rida ngarar kahai chipapama.